ТАХЪАЗТИ Федар

(Идарддæр. Райдайæн № 43)

Уотемӕй, рӕстӕгӕй-рӕстӕгмӕ будурӕй ци адӕн æрбаледзидӕ Дигоргоммӕ, бунӕттон цӕргутӕ уони хӕццӕ хӕлӕмулӕ кодтонцӕ ӕма си исӕхсистӕй нури дигорон адӕн. Дигоргоми ба фӕззиндтӕй цуппар ӕхсӕнади: Донифарс, Тъӕпӕн-Дигорӕ, Устур-Дигорӕ ӕма Уӕллагком. Рæстӕги фӕсте, кӕд ести гегӕдзийнадӕ фӕззиннидӕ ӕхсӕнӕдти ӕхсӕн, уӕддӕр сӕхе ӕнкъарун райдӕдтонцӕ еу адӕнбӕл. Донифарс ӕрӕги уӕнгӕ дӕр Тъӕпӕн-Дигори хӕццӕ нӕ федудтонцӕ. Фал еци нӕфедуддзийнадӕ рахизтӕй Баделиатӕ ӕма ӕлдайради нихмӕ буцӕутӕмӕ.

Идарддӕр ци цаутӕ цудæй, уонӕмæ лӕмбунӕг ку ӕркӕсӕн, уӕд бафеппайдзинан, еци хецӕндзийнӕдтæ уӕддӕр арф фӕд ке ниууагътонцӕ, ӕма Дигоргом устур кӕд нӕй, уӕдта си адӕн дӕр тӕккӕ фулдӕр цардæй 24 минемæ хӕстӕг, уӕддӕр сӕ дзурд ба кӕрӕдзебӕл некӕд исбадтӕй æма еумæйаг ӕхсӕнадӕ не саразтонцӕ. Еумӕйаг ӕхсӕнадæ ке не саразтонцӕ, е ба лӕгъуз ӕрдӕмӕ фӕббӕрӕг уидæ, ескӕцæй знаг ку фӕззиннидӕ Дигоргоммӕ ӕма хецӕн ӕхсӕнадӕбӕл, кенӕ гъӕубӕл, хатгай ба хецӕн муггагбӕл дæр ку истохидӕ, уӕд имӕ иннетӕй ӕнхус не ʹрбацӕуидӕ. Еци гъуддаг, ӕнӕмæнгӕ, устур зиан хаста ӕгас Дигоргомӕн дӕр.

Ӕхсӕнади арӕзтади туххӕй ку дзорӕн, уӕд нин таурӕхътӕмӕ гӕсгӕ байзадӕй берӕ ӕвдесӕнтӕ.

Дигори адӕн ку раберӕ ʹнцӕ, ӕма си ӕхсӕнӕдтӕ ку фӕззиндтӕй, уӕд раздзӕуӕгӕй исӕвзариуонцӕ уоли. Уоли ӕвзурстонцӕ ӕрмӕст Тъӕпӕн-Дигорӕ ӕма Донифарси. Уӕллагком ӕма Тъӕпӕн-Дигорӕн еу уоли адтӕй. Фал емини фӕсте, Дигоргоми ма цуппар минемӕ хӕстӕг ку байзадӕй адӕн, уӕд Уӕллагкоми адтӕй ӕстӕн цӕрӕг. Ӕма ʹймӕ ХIХ-аг ӕноси райдайӕни берӕ адӕн ӕрбалигъдӕй Уӕллагири комӕй. Уомӕ гӕсгӕ ба Уӕллагком хецӕн ӕхсӕнадӕ иссæй. Фал уӕдмӕ Тъӕпӕн-Дигори дӕр уоли нӕбал ӕвзурстонцӕ. Уӕллагири коми дӕр не ʹвзурстонцӕ уоли ӕма, уомæ гӕсгӕ ба, уоли ӕвзаруни ӕгъдау Уӕллагкоми ӕхсӕнади дӕр нӕбал фӕззиндтӕй.

Тъӕпӕн-Дигорӕ ку фæззиндтӕй, уӕд си фиццаг уоли адтæй Дигор-Хъабан. Уой фӕсте ба ӕ фурт Айдарухъ. Айдарухъи рӕстæги ба коммӕ æрбацудӕй Бадели ӕ адӕни хӕццӕ. Айдарухъ ку базӕронд ӕй, уӕд адӕн Баделий исӕвзурстонцӕ уолийæй. Уой туххӕй зар дæр ма байзадæй. Еци зари зӕронд Айдарухъ, Баделий ке исӕвзурстонцӕ, уой ку базудта, уæд гъенцъун кодта, Дигорæ, дан, бабун ӕй, Баделийӕй ӕндӕр лӕг кӕд нӕбал иссирдтонцæ, уæд, зӕгъгӕ. Баделий фӕсте ба Тъӕпӕн-Дигорӕ дӕр уоли нæбал ӕвзурста. Хецауеуӕг кӕнун син райдӕдтонцӕ Баделий цӕуӕт - Туйгъантӕ, Абисалтӕ ӕма Хъубадтӕ.

Донифарси ба уоли ӕвзурстонцӕ XIX ӕноси ӕмбесмӕ. Донифарси фӕстаг уоли адтӕй Хъанухъти Есе.

Не ʹвзурстонцӕ уоли Стур-Дигорӕ дӕр. Тъӕпӕн-Дигорӕ ӕма Донифарсӕй фӕстагдӕр фӕззиндтӕй цӕргутӕ Стур-Дигори. Ӕма си адӕн цалдӕн берӕ кодтонцӕ, уӕдмӕ Цӕргӕсатӕ исхъаурӕгин ӕнцӕ ӕма етӕ сӕхемӕ райстонцӕ бартӕ.

Ӕнккӕт Дигоргомӕн еу разамонӕг некӕд адтӕй, фал сӕ еумӕйаг гъуддӕгтӕбӕл баунаффӕ кӕнуни туххӕй ба син адтӕй еумӕйаг нихӕс. Нихӕс алли гъӕуи дӕр адтӕй. Уӕдта алли ӕхсӕнадӕн дӕр адтӕй еумӕйаг нихӕс. Коми еумӕйаг нихӕстӕ адтӕнцӕ цалдӕр рауӕнеми. Зундгонддӕр нихӕстӕ адтӕнцӕ Мӕцутӕ, Стъона (Мӕхчески) ӕма Мадзаскӕ (Къуссуй сӕрмӕ). Алли гъӕу дӕр (хатгай ба - ӕхсӕнадӕ еумӕйагӕй) равзаридӕ минӕвӕрттӕ разагъддӕр хестӕртӕй, ӕма, раздӕр бадзурдмӕ гӕсгӕ, ескӕци нихӕсуатмӕ ӕрӕнбурд уиуонцӕ. Нихӕсмӕ хаст цудӕнцӕ сӕ царди аллихузи фарстатӕ. Ести зӕронд ӕгъдау ӕййивд, кенӕ нӕуӕг ӕгъдау арӕзт ку ʹрцӕуидӕ, уӕд исесиуонцӕ «гъолон гъелӕ» ӕма федог рагъӕр кæнидӕ: «Уӕхӕн ӕма уӕхӕн гъуддаги туххӕй гъолон гъелӕ ист ӕрцудӕй». Ӕма уӕд еци унаффӕн раййевӕн нӕбал адтӕй, ӕ сӕрти рахезӕн дӕр нӕбал адтӕй.

(Уодзæнæй ма)

Сурх-Дигори 90 анзей юбилеййи кадæн

Дзабайти Фузӕ

«Сурх-Дигори фӕсевӕд

сӕ минкъиййӕй се´стурмӕ

Ахурмӕ ку тундзунцӕ, гъей.

Сурх-Дигори адӕм

кӕстӕрӕй, хестӕрӕй

Кустуарзонӕй ку цӕрунцӕ, гъей».

Сурх-Дигори гъӕу ӕй тӕккӕ ӕригондӕр гъӕу Цӕгат Иристони гъӕутӕй. Аци гъӕу цудӕй берӕ хъургъахъхъ нӕдтӕбӕл, фал сӕбӕл фӕццудӕй кадӕ-радӕй.

1927 анзи райдӕдтонцӕ аразун Дигори агрокомбинат, кӕций медӕги хъӕбӕр хъазауатонӕй архайдтонцӕ Цагъати Дзабола, Арсӕгти Горга, Бузойти Тъох, Малити Деко, Тауитти Тӕкъа. Еци комбинати бундорбӕл арӕзт ӕрцудӕй Сурх-Дигори гъӕу. Е адтӕй 1929 анзи.

1930-1931 ӕнзти ардӕмӕ адӕм лигъдӕнцӕ Дигоргоми хуӕнхбӕстӕй. Фиццаг рӕстӕги цӕрунмӕ кодтонцӕ уосӕнгтӕ, уӕдта сахъаралий фӕрсти хӕццӕ хӕдзӕрттӕ. Уой фӕсте ба райдӕдтонцӕ, ке куд бон адтӕй, уотӕ хӕдзӕрттӕ аразун. Адӕм кустонцӕ хъӕбӕр зӕрдиуагонӕй, бацудӕнцӕ коллективон хӕдзарадӕмӕ. Арӕзт ӕрцудӕй дууӕ колхози: колхоз «Хонх» ӕма колхоз «Демиховский»-йи номбӕл. Уой фӕсте сӕ баеу кодтонцӕ ма си рауадӕй еу колхоз, исӕйхудтонцӕ Гетъой - фурти номбӕл, кӕци адтӕй граждайнаг тугъди номдзуд хъӕбатӕр. Гъӕуи арӕзтади архайдтонцӕ Малити Дзега, Темирати Николай, Цакъоти Слангерий, Гобети Будзу, Гобети Заурбек, Гъӕргинти Габле, Гасинти Кудзий, Хайманти Хъӕрӕсе, Хайманти Сергей, Хъодзасти Хъасболат, Дзабайти Къостан, Текъойти Гӕбучи ӕма ӕндæртæ.

Аразун райдӕдтонцӕ скъола, кӕци косун райдӕдта 1936 анзи. Аци скъола аразунбӕл дӕр Сурх-Дигори адӕм адтӕнцӕ хъиамӕтгун: Алагирӕй ластонцӕ агори, гъӕдӕй гъӕдӕрмӕг, кӕций фастонцӕ Хусфӕрӕки хирхфадӕн заводи. Скъолай фиццаг директор Цӕллати Василий, ӕ фиццаг ахургӕнгутӕ ба адтӕнцӕ: Гобети Батарбек, Малити Хуасдзау, Годзойти Саухал, Дзабайти Геуӕрги, Дзабайти Лизӕ, Гӕмаонти Хадзирӕт, Гӕмаонти Дзафи. Фиццаг рауагъд скъолайӕн адтӕй 1938-1939 ахури анзи. Колхозонтӕ дӕр хъазауатон куст кодтонцӕ колхози еу талингӕй иннӕ талингӕмӕ. Сӕ цардмӕ зӕрдӕ рохс кодта, сӕхебӕл цийнӕ кодтонцӕ.

Фал, фал… Немуцаг цъаммар фашисттӕ 1941 анзи ӕрбалӕбурдтонцӕ нӕ бӕстӕмӕ. Сурх-Дигорӕмӕ ба ӕрбахъӕрттӕнцӕ 1942 анзи октябри мӕйи. Ӕнамонд бӕнттӕ искодта адӕмбӕл. Нӕ гъӕуи ма байзадӕнцӕ зӕрӕндтӕ, маддӕлтӕ ӕма сувӕллӕнттӕ. Тугъдмӕ нӕ гъӕуӕй рандӕй 750 адӕймаги. Нӕ гъӕуккӕгтӕ тугъди сӕхе равдистонцӕ хъӕбатӕрӕй, гъулӕггагӕн, уонӕй се´мбес тугъди будури фӕммардӕнцӕ.

 Тугъди уӕзӕ ӕрӕнцадӕй адӕмбӕл. Гъӕуи гъезӕмӕрдтӕ кодтонцӕ седзӕргӕстӕ сӕ сувӕллӕнтти хӕццӕ, зӕрӕндтӕ, бавналдтонцӕ етӕ федар усхъӕ-фӕсонтӕй сӕ ихӕлд хӕдзӕрттӕ аразунбӕл, колхози будурти хъазауатонӕй кустонцӕ, сӕ авдӕнти хӕццӕ рандӕуиуонцӕ будурмӕ ӕхсӕдунмӕ. Нӕ колхози нецибал адтӕй, нӕдӕр гъӕууон-хӕдзарадон техникӕ, галтӕ дӕр нӕбал, сӕ ихӕлд хӕдзӕрттӕ, сӕ ревӕд скъӕттӕмӕ кастӕнцӕ, фонс дӕр немуц ниццагътонцӕ.

Седзӕргӕстӕ будури куститӕ кодтонцӕ къохӕй, галтӕбӕл хумӕ кодтонцӕ, мӕнӕуӕ дӕр, нартихуар дӕр къохӕй байтауиуонцӕ, картоф дӕр  аразтонцӕ къохӕй. Ӕхсӕдгӕ дӕр кодтонцӕ къӕпетӕй, нартихуар тудтонцӕ-ӕфснайдтонцӕ къохӕй, картоф дӕр уотӕ. Мӕнӕуӕ колхозонтӕ карстонцӕ ӕхсирфӕй, тӕвди зин куст адтӕй, мӕнӕуӕ зӕнхӕмӕ ӕгъзӕлгӕ кодта. Нӕ маддӕлтӕ сӕумӕ раги рандӕуиуонцӕ ӕма ӕмбес бонмӕ ракӕрдиуонцӕ еугай бӕкъуӕлтӕ (бӕкъуӕли адтӕй инсӕй игуӕси). Уой фӕсте ба карст игуӕстӕй-еу исаразиуонцӕ цъинатӕ ӕма сӕ инайӕн машинӕй ӕхсӕвӕ инайӕ кодтонцӕ. Уотемӕй мӕнӕуӕ ластонцӕ галтӕбӕл колхози амбармӕ.

Галтӕбӕл кустонцӕ 13-15 анздзуд биццеутӕ. Етӕ адтӕнцӕ Гобети Савелий, Дзабайти Маркс, Гобети Радек, Бозурти Лазӕр, Бузойти Эдуард, Будайти Василий, Зӕгӕлти Герцен, Золойти Сергей, Кацанти Фидар, Хайманти Петкӕ, Секъинати Алешӕ, Бичегкути Геуӕрги. Силгоймаг седзӕргӕс уоститӕ дӕр галтӕбӕл хумӕ кодтонцӕ. Дзабайти Мерет радзоридӕ: «Ӕз ӕма Гасинти Сафеткайӕн адтӕй дууӕ гали, сӕ фӕсте ба готон федаргондӕй, фӕстегӕй готонбӕл хуӕстӕн ӕз, Сафетка ба разӕй галти сӕрбонсбӕл, уотемӕй цудӕй размӕ, мӕ фурт Маркс ба дзурдта галтӕмӕ, ес ӕ къохи уотемӕй. Еуӕй-еу хатт уотӕ бафӕллайанӕ, ӕма Сафетка размӕ бахауидӕ. Го