Мæ цубур радзурд æй чиколайаг Тамати Дафай фурт Сулейманбæл. Тугъди рæстæги куста военкомæй Ирæфи райони. Берæ фæсевæд рандæнцæ уой фæндарастæй тугъди будурмæ, берæ маддæлтæ, сæ бæдолæ кæмæн фæммард уидæ, етæ ʹзнаги цæстæй кæсун райдайиуонцæ Сулейманмæ. Бæргæ сæ лæдæрдтæй, бæргæ син тæрегъæд кодта, фал немуцаг фашистæй нæ Райгурæн бæстæ багъæуай кæнун гъудæй.
Еу бон æ сæйгæ фидæн загъта: «Баба, тугъдмæ цæун, бæргæ уин тæрегъæд кæнун, фал æртигай, фондзгай фурттæ кæмæй рандæй, етæ ба мадта ци кæнонцæ». Бæргæ никкудтæнцæ мадæ æма сæйгæ фидæ, фал «фæндараст уо», зæгъгæ, ин загътонцæ, æ кæстæр хуæри евгед сæ фæу уагъта, уотемæй рандæй. Уæдмæ немуц Чиколамæ исхъæрдтæнцæ, ке бон куд адтæй, уотæ гъæдæмæ лигъдæнцæ, партизанти къуартæ кодтонцæ. Фал немуцæн ка анхос кодта, уæхæнттæ дæр нæмæ фæззиндтæй, пъалицайтæй кустонцæ.
Еу бон Тамати хæдзарæмæ дæр немуцаг салдатти хæццæ еу уæхæн лæг сæ разæй, уотемæй фæззиндтæнцæ. Мæгур сæйгæ лæги сæргъи æрлæудтæнцæ, ма имæ дзоруй немуцаг: «Где Сулейман?!» Дафа, цума сæ нæ лæдæрдтæй, уотæ никкодта æхе. Уæдмæ иннæ дууæ фашисти фæххуæстæнцæ ин æ цæнгтæбæл, май зæнхæмæ æргæлстонцæ. Мадæ ма кизгæ сæхе багæлстонцæ сæ фидæмæ, ма уони дæр еуварс фехстонцæ, «штейн», зæгъгæ, сæбæл нигъгъæр кодтонцæ. Пъалицай размæ рацудæй ма сæмæ дзоруй: «Уæ фурт, коммунист, офицер, ма кæд партизанти командир æй, уæд æй æрхонетæ, рарвететаймæ, кенæ ба уæ еугурейдæр ниццæхддзæнцæ» .
«Хуцау дин ма ниххатир кæнæд, ду фашистæй фашист дæр дæ», - зæгъгæ, ма исдзурдта Дафа. «Банцайæ! Уæ власт фæцæй, нур ба мах власт уодзæй!» Еци дзурдти хæццæ Дафай хæрхæрæй радавдтонцæ май машинæмæ багæлстонцæ, уоми ба ма адтæй еу дууæ къомсомол кизги. Сæ нивæн, Чиколайæй куддæр Кæсæгмæ нихъæрдтæнцæ, уоми ба сæ нæхеуæнттæ æхсун райдæдтонцæ, ма сæ исуæгъдæ кодтонцæ. Фал сæ фурт Сулейман ба бæгъатæрæй фæммардæй Новороссийски горæти, æ рамæлæти уæнгæ дæр имæ æнгъæл фæккастæй æ мадæ, кæд мард нæй, зæгъгæ.
Мах, абони фæсевæд, уони бæгъа тæрдзийнадæ некæд феронх кæндзинан, сæ рохс ном син имисдзинан.
Новороссийски зæнхи нур æ цирт,
Тугъдон æмбæлдтæ йæ фарсмæ,
Фæлгæсунцæ кæрæдземæ
Есге зæнхæбæл æносмæ.
Æрæги Тамати Сулеймани номбæл Новороссийски еу гъæунгæ конд æрцудæй. Еци хабар мæбæл исæмбæлун кодта æ кизги кизгæ, æхуæдæг дæр уоми цæруй бийнонтæй, æ мадæ æгас кæд нæбал æй, уæддæр еци кизгæ æ бабай циртмæ кæсуй, ма си Хуцау исарази уæд, æ бæдæлтти хортæй æфсес уæд.
Пъинти – Малити Фатимæ
28 мартъий Ирæфи райони ахурдзаутæн райдæдтонцæ сæ уалдзигон уолæфти бонтæ, кæцитæбæл хъæбæр зæрдæй бацийнæ кодтонцæ. Цæмæ ку зæгъæн, уæд ахури анзи æртиккаг хай (четверть) фæууй тæккæ даргъдæр, ма сувæллæнтти фæффæндуй ахури анзи кæронмæ нæуæг хъаурити хæццæ сæ бæрæггæнæнтæ фæххуæздæр кæнунбæл байархайун.
Сæ уолæфти рæстæги сувæллæнттæн се ᾿скъолати, националон проект «Молодежь и дети» зæгъгæ, уой медæгæ арæзт æрцудæй фæлладуадзæн лагертæ. Æдеугурæй си архайдта 185 скъоладзауемæй фулдæр. Алли бон дæр етæ уадæнцæ скъолатæмæ зæрдæрохсæй, игъæлдзæгæй ахур кæнунмæ нæ, фал сæ рæстæг цæмæдессагæй, алливæрсуг мадзæлтти архайгæй рарветунмæ.
Сæ хæццæ архайдтонцæ ахургæнгутæ. Аразтонцæ син спортивон, исфæлдистадон, логикон, патриотикон, наукон, «Орлята России» æма æндæр æздæхæнти. Устур æргом æздæхт цудæй æнæнездзийнади фарстамæ. Алли сувæллони бон дæр адтæй, æ зæрдæмæ хæстæгдæр ци тематикон æздæхæн адтæй, уоми архайун. Сæ рæстæг уотæ цæмæдессагæй æрвистонцæ, ма бон куд фæууидæ, уой лæдæргæ дæр нæ бакæниуонцæ. Сæ къах сæ хæдзарæмæ нæбал фæххæссидæ.
Алли бон дæр син дууæ хатти хуæрунгонд цудæй. Хуæруйнаг син кодтонцæ скъолати хуæрæндони косгутæ. Продукттæ уагъд цудæнцæ паддзахадон стандарттæмæ гæсгæ, уома алли бони рациони дæр адтæй халсартæ, рæзæ, фид, æхсирæй конд продукци.
Ауæхæн лагертæ ма хуарз æнцæ æрмæст бауолæфуни туххæй нæ, фал сувæллæнтти кæрæдзебæл бæттуни æгъдауи дæр. Ци дзæбæх архайдтонцæ еумæ, сæ дзурд кæрæдзебæл бадгæй. Еристи дæр куд дзæбæх разæнгардæй гъæйтт кодтонцæ. Еуей дæр си нæ евдалдæй телефони хæццæ архайунмæ. Йе æй хъæбæр хуарз гъуддаг! 5 апърели ба уолæфтæй, нæуæг хъауритæ ма бæллецти хæццæ бакъахдзæф кодтонцæ цуппæрæймаг ахури анзи хаймæ.
Нæ зæрдæ син зæгъуй ирæзгæ фæлтæрæн, нæ фæсевæд æнæнездзийнадæ, рæсугъд бæллецтæмæ турнундзийнадæ, сæребарæ цард æма устур æнтæстдзийнæдтæ.
