Хабæрттæ будуртæй
Дæргъвæтийнæ уарунтæ æма уазал рæстæг радаргъ кодтонцæ уалдзигон –будурон куститæ нæ райони еугур хузи хæдзарæдти дæр. Кæд æма зæнхкосæги раздæр æнзти багъæуидæ къуар бони раггæндæ культуртæ ниййаразун æма батаунæн, уæд нур дууæ мæйей медæгæ райони хумзæнхитæй дзæвгарæ фæзуæттæ изайуй æнæ арæзт аллихузон культуртæй, фал фулдæр ба – нæмугæн нартихуари будуртæ.
Агротехники рæстæгути нийхæлд æнæмæнгæ исбæрæг уодзæнæй федæни тиллæгæрзæдтæбæл дæр, уомæ гæсгæ ба алли хæдзарадæ, алли арендон зæнхикустгæнæг еуæг дæр цурд лæууй æма архайуй испайда кæнун кустæн бæзгæ алли сахаттæй дæр.
Еу уæхæн бон, хори цæстæ бабæй æнæуаргæй ку æрбатавта зæнхæ æма е ку фæббæзтæй тауни кустæн, уæд нæ уацхæсгути къуар дæр исфæндæ кодта, Чиколай гъæуи алливарс хæдзарæдтæн ци хумзæнхитæ ес, уонæми ци куст цæуй, уомæ æркæсун æма зæнхкосгути хæццæ радзубанди кæнун цæбæл æй сæ тухст хъæбæрдæр, ци син бантæстæй бакосун, фæсарæйнаг бæстити хæццæ рахастдзийнæдтæ æма сæ санкцити ниввæрд исбæрæг æй Уæрæсей зæнхкосæги кустбæл æви нæ.
ООО «Ираф-Агро» - й зæнхити еу хаййи баййафтан косгути къуар, кæцитæ рæстæгæй-рæстæгмæ рагъæуай кæниуонцæ, ци мегътæ рабадтæй арви реубæл, уонæмæ. Сæ хæццæ радзубандийæй базудтан Хохти Эльбрус, Дедегкати Алан æма Абисалти Славикмæ ке ес аренди, уæлдæр ке кой ракодтан, еци хæдзарадæй 30 гектари, нартихуар нæмугæн бакæнунмæ. Сæ хæццæ радзубандий исбæрæг æй ке косунцæ хе техникæй, рагацау ке æрцæттæ кодтонцæ нæхемæ муггæгтæ æма минералон гъæцæнтæ рагæй дæр рæвдзæ ке адтæнцæ, фал сæ рæстæги нифхæлд ке нæ бауагъта агротехники домæнтæмæ гæсгæ хуæздæр рæстæгути цурд февналун. Уомæ гæсгæ арендатортæ фæттагъд кодтонцæ кустмæ, цæмæй син фулдæр бантæса нæмуг «фæддæлбилæ» кæнун. «Интернет бабæй исон амонуй тæркъкъæвдатæмæ, уомæй тæрсæн, æндæр нæ, нæ нихмæ паддзахæдтæ ци «санкцитæй» тæрсун кæнунцæ, етæ ба æрмæстдæр «ронбастдæр» кæнунцæ косунмæ, архайунмæ, фадуæдтæ агорунмæ дæр. Бакосæн æма ескæмæти нæ тиллæгæрзæдтæй кæсгæ дæр фæккæнæн. Хуцау хуарз æй, нæ зæрдæ дардзинан нæ кæдзос хъиамæтбæл, кæд нин байанхус кæнидæ «сæрггаг», - дзурдта нин Эльбрус, æ куст дæр нæ уадзгæй.
Æ фермерон хæдзаради зæнхи гæппæли, кæци ахæссуй 45 гектари, хæлæфæй косгæ баййафтан чиколайаг Къолойти Рамазани дæр. Е дæр гъаст кодта, рæстæги фудæй ке радаргъ æнцæ нартихуар тауни куститæ, уомæй. Аразуй «Пионер» æма «Краснодайраг» муггæгтæ. «Нæхе муггæгтæ нецæмæй фуддæр æнцæ, ку сæбæл бакосай, уæд лæгъуздæр тиллæгæрзæдтæ нæ раттунцæ», – дзурдта нин Рамазан. Дзæвгарæ раздæр ма Къолой - фурт ниййаразта картоф еу дууæ гектари. Уой дæр, кæд рæстæг бауадза, уæд гъæуама багъуд кæна. Техникæ, муггæгтæ, минералон гъæцæнтæ – алцидæр имæ адтæй рагацау рæвдзæ.
Нæ идарддæри фæндаг ракодтан Гæтити Аликки арендон хумзæнхитæбæл, кæцитæ ахæссунцæ 180 гектари. Алик нин куд радзурдта, уотемæй еци фæзуæттæ арæзт æрцудæнцæ æнæкъулумпитæй, агротехники домæнтæ æма хуæздæр рæстæгутæй пайда кæнгæй. Уомæн ин фадуат равардта, зæнхи кустити имæ устур фæлтæрддзийнадæ ке иссæй, е дæр. Хе техникæй имæ алцидæр ке ес, уомæ гæсгæ æй некæд багъæуй хезун. Нуртæгки, хе фæзуæдтæ багъуд кæнгæй, Алик нин куд радзурдта, уотемæй æнхус кæнуй техникæй æ фæрстæмæ синхаг арендатортæн, цæмæй æгæр ма рафæстеуат уонцæ уонæн сæ куститæ.
Гъæууон хæдзарадон управлений бæрæггæнæнтæмæ гæсгæ ба ма 25 маймæ райони хумзæнхити 10500 гектаремæй æнæ арæзт изадæй 5000 гектари. Фулдæр - устурдæр хæдзарæдти, фал, зæнхкосæгæн æ уæгæ нæ мæлуй, гидрометцентри бæрæггæнæнтæ еу рæстæг устур уарунтæ нæ амонунцæ, æма етæ дæр сæ хъазауат æма æнæкъулумпитæй бакустбæл дарунцæ сæ зæрдæ.
Чихтисти Р.
Хузистити: зæнхкосæг будуйрон кустити рæстæги.