Сурхдигойраг бæгæни
Тугъд бæргæ фæцæй 1945 анзи. Еци цæхæрæй ма ци еугæйттæ раервазтæй, уонæн сæ фулдæр сахъатгин, фал уæддæр уодæгасæй æздахтæнцæ сæ райгурæн уæзæгтæмæ. Сæ берæ зинтæ феронх уогæй, адæн цийнæ кодтонцæ сæ устур Уæлахезбæл. Фал сæ æхсицгон идзулддзийнадæ берæ нæ рахаста. 1946-1947 æнзти будурти ци нæмуг байтудтонцæ, е фæззæг тиллæг нæ равардта. Æма бабæй адæн нæуæгæй уæхерий буни фæцæнцæ. Еци рæстæги фæсте нæ синхи уоститæ баунаффæ кодтонцæ кувд искæнун-«Елиай кувд». Гъома, арв æма зæнхæ кæрæдзей куд бауарзонцæ: цумгæ-хуæргæ, хор дæр сæбæл куд кæса, зæнхæ уарундонæй дæр донхуаруггонд куд цæуа, цæмæй тиллæг хуарз æрзайа, уой туххæн, Хуцауæн баковæн, кæд нин нæ кувд райсидæ, зæгъгæ.
Елиати кувд ба, фæткæмæ гæсгæ, кæниуонцæ авдисæри. Синхи силгоймæгтæ æрæмбурд кодтонцæ зад. Алли хæдзарæ дæр равардта зади къос æма си исфунхтонцæ бæгæни.
Куд гъудæй, уотæ æй ниффæлсугътонцæ, æ цъæлæ ба ин, фæлсодзгæй ци тæскъи кодтонцæ, уой хурфи ниууагътонцæ. Бæгæни фунхтонцæ синхæгтæй кедæр хæдзари. Падвали æй нивгæдтонцæ сæрмагонд къустели, æнтауæнæй æй бантудтонцæ.
Мæнæн си мæхе мадæ æфсийнæ адтæй. Сæумæраги ба дин нæ мади фæдесгъæр ку райгъусидæ: «Кизгæ, раистæ, æдосæ нин нæ бæгæни кадæр радавта æма мин дон æрдавæ, цъæлæбæл æй равгæндзæнæн, къустели дæр ма ес цидæр бунтæ - циуритæ æма рангъездзæнæй…
Елиати сайун неʹмбæлуй, гъæуама ин аци бон исковæн, кæд нæмæ æ дзæбæх цæстæй ракæсидæ, зæгъгæ. Уæдмæ иннæ æфсинттæ дæр фæззиндтæнцæ æма къеретæ кæнун райдæдтонцæ. Фус дæр косартгонд æрцудæй. Алцæмæй дæр исрæвдзæ æнцæ, æрмæстдæр сæ еу гъудтаг ба устур мæти æфтудта, дессаг сæмæ кастæй: - Кувддагмæ давунмæ ка банифс кодта, æ сæрмæ ка æрхаста уæхæн æбуалгъ миуæ бакæнун.
Гъудтаг уотæ адтæй, æма, кувд кæмæ кодтонцæ, уонæмæ адтæй еу сæ хæстæг лæг уæзласæн машинæбæл. Еци иуазæг медæхсæвæ сосæггити фестадæй, æ машини гуфи ниввардта боцикъа æма си нивгæдта, Елиай номбæл конд ци бæгæни исфунхтонцæ, уой. Е адтæй уорсдойнаг лæхъуæн, -сурхдигойраг сиахс, косгæ ба кодта Мизури. Бæгæни Мизурмæ бахъæртун кодта æмаʹй туканмæ уæйæ кæнунмæ равардта. Еци ниуæзтæй кадæриддæр фегъæстæʹй, етæ дуккаг хатт дæр тукангæсмæ бамедæг æнцæ нæуæгæй, сæ зæрдæмæ уотæ хъæбæр фæццудæй. Дуккаг бон дæр ма агурдтонцæ æзиниккон бæгæний хузæн ниуæзтæ, фал ма син кæцæй æрхастайдæ тукангæс, - нæбал адтæй.
Тукангæси æгæр тухсун кæнун ку райдæдтонцæ æлхæнгутæ, уæдта сæбæл исхъур-хъур кодта: «Еци бæгæни конд æрцудæй Сурх-Дигори, цотæ, уордигæй мин си исласетæ, æма уин æй ами ба уæйæ кæндзæнæн».
Уæлдæр куд загътон, уотемæй бæгæнидавæг адтæй сурхдигойраг сиахс, гъæуи кондгиндæр æма хуæздæр кизги æхе бакодта, фал фæстагмæ ба сæ царди уагæ ниггæлеритæ æй, кæрæдзей нæбал лæдæрдтæнцæ æма рахецæн æнцæ. Еууæхæни ба лæг Мизурæй Уорсдонмæ фæццæйцудæй æ машинæбæл, фæндагбæл авари искодта æма дзухъмард фæцæй. Гъе уотæ фæууй, сурхдигойрæгтæ хуæрзадæ бæгæний бæсти къумæл фæнниуазтонцæ Елиай кувди. Елиа ралгъиста бæгæни давæги æма нæ фæффæндараст æй. Кувди æфсинттæй ба еу уосæ кувд кæнун дæр нæбал бакумдта, - Елиа еци бæгæни давæги цæмæннæ æрцæвуй æнæтæрегъæдæй, зæгъгæ.
Еци кувди бони сурхдигойрæгтæ зæрдæй фæккувтонцæ Хуцаумæ, Елиамæ, цæмæй син фæззæги хуарз тиллæг радтонцæ, уой туххæн.
Рæстæг ниддæлæ-уæлæ кодта, æма 1947 анзи ба уæхæн берæ тиллæг æрзадæй, æма адæн сæ уæлдайæгтæ ци фæккодтайуонцæ, уой зонгæ дæр нæбал кодтонцæ. 11 адæймагемæн - сурхдигойрæгтæн сæ хъазауатон фæллойни туххæн лæвæрд æрцудæй Ленини ордентæ. Еци кувди фæсте сæбæл уæхæн æстонг анз некæдбал никкодта.
Малити Фузæ
Журнал «Ираф» № 4 2024 анз.