Тематикон имисæн бон
Фидибæсти Устур тугъди райдайæнмæ дæр, æ фæуунмæ æма Уæлахези бæрæгбонмæ арæзт æрцæуй аллихузон мадзæлттæ, цæмæй нæ адæмæй, ирæзгæ фæлтæрæй иронх макæд уа, советтон адæм ци уодуæлдай тох кодтонцæ, цæйбæрцæ тог никкалдтонцæ тохи будури, уой фæдбæл. Чиколай фиццаг астæуккаг скъолай дæр арæзт æрцудæй тематикон бæрæгбон, растдæр ба, æвæдзи – имисæн бон.
Архайдтонцæ си райдайæн кълæсти ахурдзаутæ, 8 – 9-аг кълæсти ахурдзаутæ, ахургæнгутæ, скъолай хуæрæндони косгутæ æма сувæллæнтти бабатæ æма нанатæ, кæцитæ еци тогуарæн тугъди хабæрттæ хуæздæр зонунцæ.
Аци бæрæгбон бацæттæ кæнун æма исаразун æрæфтудæй скъолай ци уæлæмхасæн ахуради Центр косуй «Точка роста», зæгъгæ, уой ахургæнæг Фезиляти Светланæ Маирбеги кизгæ 8-9-аг кълæсти ахурдзаути хæццæ.
Сувæллæнттæ дзурдтонцæ æмдзæвгитæ тугъд æма уæлахезбæл, разардтонцæ патриотикон зартæ. Хестæр кълæсти ахурдзаутæ син радзурдтонцæ, скъола ке ном хæссуй, еци Фидибæсти Устур тугъди бæгъатæр Махъоти Алихани цард æма тугъдон фæндæгтæбæл. Сувæллæнттæ ма базудтонцæ, ци скъолай ахур кæнунцæ, уой историкон фæндаг тугъди рæстæги куд адтæй, ци берæ гъуддæгтæн æвдесæн æнцæ æ фæрстæ æма ин абони уæхæн кадæ цæмæ ес, уой туххæй.
Хестæр фæлтæри минæвæрттæ радзурдтонцæ ахурдзаутæн тугъд куд цудæй нæ гъæуи, ци устур хъазауатдзийнадæ равдистонцæ знаги нихмæ æрмæст тугъди ка адтæй етæ нæ, фал фæсфронт дæр. Алли цæрæг дæр æ хъаурæ куд адтæй, арæхдæр ба куд на `дтæй, уотæ устурæй, сувæллонæй куд агъаз кодта тугъдонтæн.
Аци скъолай ахургæнгутæй дæр беретæ рандæй фашистон лæгмартæ дæрæн кæнунмæ æма сæ нæ бæстæй фæссорунмæ. Абони си, зæгъун нæ бон æй, æгас некебал ес, фал син æносмæ кадæ кæнæн æма æносмæ æнцæ нæ зæрдити. Уомæн æвдесæн æй скъолай тургъи син ци циртдзæвæн æвæрд æрцудæй сæ нæмтти хæццæ, е. Уоци циртдзæвæни размæ сувæллæнттæ ниввардтонцæ деденгути бæститæ, сæ сæртæй син ниллæг ракувдтонцæ æма сæркъолæй балæудтæнцæ Сабурдзийнади минутти.
Бæрæгбони кæрони ба æгас архайгутæн дæр сæ бон адтæй будурон цæлгæнæн ке фæххонунцæ, уоми æфсæддон касæ бахуæрун æма цай бацумун, цæмæй арфдæр банкъаронцæ ци мадзал арæзт æрцудæй, уой фæстеугутæ.
Гъулæггагæн, анзæй анзмæ республики минкъийдæр кæнгæ цæуй нæ уæлахез æрхæссæг ветеранти нимæдзæ. Байзадæй ма си еугæйттæ, ма син гъæуамæ устур кадæ, устур аргъ кæнæн нæ еугурдæр. Ирæзгæ фæлтæр гъæуама зона æма сæрустур уа еци æхсаргин адæмæй, кæцитæ еузæрдионæй багъæуай кодтонцæ райгурæн зæнхæ, сæ реуи æмбæрцæ цудæнцæ знаги нихмæ тохи, æма сæ бæгъатæрдзийнадæй устур кадæ искодтонцæ нæ Фидибæстæн. Ауæхæн равдиститæ æма бæрæгбæнттæ ба æнцæ уомæн агъаз.
Бабочити Э.