Райгурæн бæстæ… Фиди зæнхæ… Етæ иссæнцæ æ турусатæ. Уони сæрвæлтау не`вгъау кодта æ уод. Знаг ба адтæй, уой  размæ ке нæма фæууиндæй, уæхæн æгъатир ма тогмондаг. Дзурд кæмæн на`дтæй, Европи бæститæ æ уæззау цулухъти буни кæмæн дзиназтонцæ, уæхæн цъаммар ма æнæхатир. Еци уæззау цирени арти фунхтæй Михал дæр. Æ тугъдон фæндæгтæй уин дууебæл æрлæудзæн. 133 уæлвонгбæл тохи бацæугæй, Михал ниппурх кодта знаги дууæ ахсгиаг бунати. Уой фæдбæл сурхæфсæддон хуарзæнхæгонд æрцудæй майданæй «За Отвагу». Иннæ хатт, Лигети гъæуи тохгæй, взводæн разамунд дæтгæй, бампурста æ адæми хæццæ знаги бунатмæ. Карз тухтонцæ фашисттæ сæ нихмæ, уой дæр нецæмæ æрдардтонцæ, тард æрцудæнцæ немуц еци зæнхæй дæр. 23 салдати, 3 дæрæнгæнæн мигæнæни, 6 пулеметти исæскъунун кодтонцæ, 6 нихмæлæууæги уацари райстонцæ. Уой фæдбæл дæр æхсаргин тугъдон Секъинай-фуртæн лæвæрд æрцудæй Сурх Стъалуй орден.

Радаргъ æнцæ бæгъатæр тохи бонтæ. Сугъдæнцæ нæ гъæутæ, нæ сахартæ. Сугъдæй, пеллон арт уагъта нæ ниййерæг зæнхæ, уæддæр советтон адæми тухæ нæ басастонцæ. Уæлахез æрхастонцæ. Уæлахездзауæй æ фиди уæзæгбæл исæмбалдæй сурхдигойраг Секъинати Михал дæр. Паддзахадæ ин аккаг аргъ искодта æ тугъдон фæндæгтæн: хуарзæнхæгонд ма æрцудæй тугъди рæстæги «Германибæл фæууæлахези» майданæй уæдта Фидибæсти тугъди фиццаг къæпхæни орденæй.

Сæ хæдзарæбæл ку исæмбалдæй, уæдта фæллойни фæндагбæл ниллæудтæй æ райгурæн гъæуи Гетъой - фурти номбæл колхози.

Уоми дæр цæсгомгинæй æнхæст кодта æ размæ ивæрд ихæстæ. Бийнонти гъуддаг бакодта. Æ цардæмбал Даряй хæццæ ин исæнтæстæй цуппар фурти: Солтан, Казик, Алик, Эльбрус. Алкедæр си ахурадæ райста, бийнонти гъуддаг бакодта, иссирдта царди æхе ауæдзæ. Исгъомбæл кодта кæстæртæ. Æхсæнади фæйнæ кьабаземи косунцæ.

Михали фæлтæрддзийнадæ иронх нæй. Махæн, сæ фæстегæнттæн, еци фæлтæр æнцæ не`носи имисуйнаг. Михалæн дæр æ ном нæй иронхи…

Рæмонти Зæлинæ