Берæ анзти дæргъи игъосæн, ирон, кенæ дигорон æвзаг исæфти надбæл лæууй, уой. Ке зæрдæ нæ фæрессæй уæхæн дзубандитæй? Фиццагидæр нæ маддæлон æвзаги хъисмæтбæл дзуаппдæттæг мах нæхуæдтæ ан, æ федæн ба æй нæ ирæзгæ фæлтæри къохи. Абони нæ сæйраг ихæс æй, фæсевæди æргом æ багъæуай кæнунмæ раздахун æма син аййев ирон - дигорон дзурд бауарзун кæнун. Уобæл архайунцæ нæ республики рæвдауæндæнтти.

 

Полилингвалон ахурадæбæл разæнгардæй куст кæми цæуй, уонæй еу æй Ирæфи муниципалон райони Чиколай гъæуи рæвдауæндонæ «Солнышко». Æнтæстгин коллективи куст исбæрæг кæнуни фæдбæл ами арæзт æрцудæй семинар Дзæуæгигъæуи ирон æвзаги райрæзти Центри косгути хæццæ еумæйагæй. Æ сæйраг темæ адтæй: «Полилингвалон ахурадæ æгъдау æма патриотон гъомбæлади рæвдауæндони сувæллæнтти хæццæ».

Семинар æрбамбурд кодта ахургæнгутæ, гъомбæлгæнгутæ æма наукон кустгæнгутæ, цæмæй бæстон æрдзоронцæ æма равзаронцæ, æвзаг ахургæнгæй, сувæллонмæ куд игурун кæнун æмбæлуй æ Райгурæн бæстæ, æ адæми культурæ æма традицитæмæ, еци хинцуйнаг фарстатæ.

Семинари архайдтонцæ уæхæн цитгин иуазгутæ, куд: Солтанти Дж. М. — РЦИ - Аланий ахурадæ æма науки министради национ ахуради æма æвзаги политики хаййади сæргълæууæг; Хъæбæлоти З. В. — Ирæфи муниципалон райони ахуради управлений сæргълæууæг; Моураути З. Х. æма Бестаути З. З. – ирон æвзаги райрæзти Центри наукон косæг. 

Фиццагидæр дзурди барæ лæвæрд æрцудæй Моураути Залинæ Хазбечири кизгæн, кæци раарфæ кодта рæвдауæндони косгутæн семинар бацæттæ кæнуни фæдбæл. Радзурдта æвзаги сæйрагдæр æма сæрмагонддæр фарстатæбæл.

Идарддæр гъомбæлгæнæг Хъульчити Фатимæ Ибрæгими кизгæ исаразта игон равдист нæ алфамбулай дуйне зонунадæбæл, аци анз скъоламæ ка бацаудзæй, еци къуари хæццæ «Глобусбæл балци». 

Растдзорунади ирæзтбæл игон архайд «Цъеутæ» хестæр къуари хæццæ исаразта маддæлон æвзагбæл гъомбæлгæнæг Пъинти Зæлинæ Морати кизгæ. 

Хестæр гъомбæлгæнæг Гæдзаонти Элинæ Маирбеги кизгæ бацæттæ кодта цæмæдессаг презентаци «Патриотон гъомбæл кæнунадæ». 

Æртæ мадзали дæр адтæнцæ цæмæдессаг, гъæздуг информацион æгъдауæй. Сувæллæнттæ архайдтонцæ æмхузæн активонæй. Бæрæг адтæй, сæ хæццæ ефстагмæ нæ, фал алли бон дæр куст ке цæуй, йе. Сæхе æлхъивд нæ дардтонцæ, фал адтæнцæ цурд, разæнгард.  Полилингвалон къабазæбæл архайгæй, рæвдауæндони коллектив агоруй гæнæнтæ, сæ сабийтæн федæни ци æрмæг бабæззæй, уой сæмæ хъæртун кæнунбæл дæр. Архайунцæ аллихузи дæр сувæллонмæ маддæлон æвзаги фæлмæндзийнадæ, рæсугъддзийнадæ бахъæртун кæнунбæл. Еци гъуддаг фæббæрæг кодта æ хатдзæгти Бестаути Заирæ Заурбеги кизгæ. 

Гъомбæлгæнгутæ хуарз зонунцæ сувæллæнтти зундрахастмæ раст над иссерун. Алли сувæллони уодмæ дæр арфдæр ци багъара, уæхæн дзубандитæй хъæртун кæнунцæ нæуæг темæ. Æвæдзи æ кустмæ кудфæндий цæстæй ка кæса, е аци гъомбæлгæнгути хузæн нæ архайдзæй æ гъомбæлгæнуйнæгти бæрзонд зонундзийнæдтæбæл. Уогæ дæр æрмæст маддæлон æвзаг базонуни фарстай нæ, фалæ, уомæй пайда кæнгæй, сувæллони меддуйне фæгъгъæздугдæр кæнунбæл.

Аци рæвдауæндонæ «Солнышки» коллективи куст æй бафæнзуйнаг, æрмæст полилингвалон ахуради къабази нæ, фал се ᾿нæзийнадæ архайдæй дæр къæпхæнæй-къæпхæнмæ полилингвалон (ирон-дигорон-уруссаг ахурадон хузæ) парахат кæнуни. 

Арфи дзубандитæ ракодта семинари архайгутæн райони ахуради управлений сæргълæууæг Хъæбæлоти Залим Владимири фурт.

«Архайæн, цæмæй рæвдауæндони сувæллæнттæ уарзонцæ æма дзоронцæ сæ маддæлон æвзагбæл, уа сæмæ лæдæрундзийнадæ берæ æвзæгти туххæй. Гъомбæл сæ кæнæн аргъ куд кæнонцæ, æндæр æвзæгтæбæл ка дзоруй, уонæн дæр. Ахури организаций процесси пайда кæнæн инновацион бацæуæнтæ, технологитæй. Семинари архайгутæ бакастæнцæ хестæр полилингвалон къуари ахурмæ, ма сæ зæрдæмæ фæццудæй. Нæ равдисти дзоруйнаг адтæй, дзæвгарæ анзти размæ Цæгат Иристони скъолатæ æмæ рæвдауæндæттæмæ ци полилингвалон ахурадон программæ бахастонцæ, уобæл. Æ хатдзæгтæмæ гæсгæ зæгъæн ес, æма сувæллæнттæ аци ахуради фæрци хуæздæр фæццалх унцæ маддæлон æвзагбæл», - зæгъуй рæвдауæндони сæргълæууæг Тохъайти Надя Авдулли кизгæ.

Семинари архайгутæ æгасæй дæр арфиагæй байзадæнцæ. Хуарз уайдæ, ауæхæн пайдайаг фембæлдтитæ арæхдæр арæзт ку цæуидæ, уæд.

Бабочити Э.