Меценатти ном хæссунцæ æ меддуйне гъæздуг кæмæн æй, царди рæсугъддзийнæдтæ арфдæр ка инуй ма сæ парахат кæнунбæл ка архайуй материалон æгъдауæй æ фарс ка бадаруй культури дæр, спорти дæр, етæ. Уонæй еу æй нæ хуæздæр фæсевæди минæвар Махъоти Батрази фурт Хетæг, кæци арæх æ дæнцæгтæй æвдесуй, куд хъæбæр вазуггин гъуддаг æй адæймагæн байагъаз кæнун. Берæ хуарз гъуддæгтæ ес йе ʹвæрæнти, кæд ма нур æригон æй, уæддæр. Æ фæрци разæнгард кæнунцæ, кæмæ æ фарс бадаруй, етæ, ма сæ къохтæ не ʹруадзунцæ, фал размæ турнунцæ, нæуæг æнтæстдзийнæдтæмæ.

Ци райони райгурдæй, уой цардмæ кудфæнди цæстæнгасæй нæ кæсуй, фал еудадзугдæр архайуй æ райрæзтбæл, æ адæми хуарздзийнадæбæл. Арæх имæ сæхе бахатунцæ культури косгутæ, ма сæ некæд раздахта æнæ исрæвдзæ кæнгæ. Алкæддæр син æ анхуси хай бакæнуй: йе концерт ласонцæ, йе бæрæгбон кæнонцæ сувæллæнттæн, йе ба сæ цигъæуæгти. Лæдæруй æй, куд хъæбæр гъæугæ гъуддаг æй алли адæмæн дæр æ культурæ, æ искусство, йе ʹсфæлдистадæ. Адæми зæрдитæмæ рохс ке уадзунцæ аци артдзæсти адæм. Уой дæр ма фæббæрæг кæнæн, ма си æрмæст хестæр адæм нæййес культури косгути æхсæн. Ардæмæ цæуй берæ фæсевæд, кæцитæн гъæуй дæттун нифс, разæнгард кæнун сæ гъæуй. 

Æрмæст культурæ ма искусстви нæ, фал спорти гъуддаги дæр минкъийдæр нæ агъаз кæнуй æригон исуйнаг спорсментæн. Активонæй архайуй уони хъисмæти дæр, æ зæрдæ сæбæл ресуй. Фæндуй æй, цæмæй нæ исони бони æнгъæлдзаутæ, нæ ирæзгæ фæлтæри цард уа рæсугъд, амондгун, сæребарæ. 

Уомæй рахезгæй, æ фарс бадаруй ахурадон учрежденити цигъæуæгтæмæ дæр. 

Устур арфиаг æнцæ Хетæгæй райони газет «Ирæфи» коллектив дæр, уомæн æма мухур рафинсуни кампаний рæстæги æ усхъæ бадаруй ма рафинсуй газеттæ анхусгъæуагæ адæмæн.

Хетæг куд адæймаг, уотæ дæр æй бафæнзуйнаг. Зонун æй æ сувæллонæй, ма алкæддæр æй ездон, æгъдаугин, уæззау зунд, æ карæмæ гæсгæ нæ, фал цума цард бацардæй, уæхæн цæстæнгас ма рахастити хæццæ. Ахур кодта хуарз, алкæддæр имæ адтæй турнундзийнадæ устурдæр зонундзийнæдтæ æма уæлахезтæмæ. Ма сæбæл архайгæ дæр кæнуй. Æ алли бони архайдæй дæр царди ивæрæнтæмæ цидæр хуарздзийнадæ бахæссуй.

Райгурдæй 1994 анзи. Каст фæцæй Чиколай фиццаг астæуккаг скъола хуарз бæрæггæнæнти хæццæ. 2015 анзи каст фæцæй Цæгат Кавкази хуæнхон металлургон институт ма райста дæсниадæ: «Промышленон æма граждайнаг арæзтадæ». 2021 анзи каст фæцæй РАНХиГС, кæцими райста дæсниадæ «Паддзахадон æма муниципалон унаффæйадæ». Æй Республикæ Цæгат Иристон – Аланий Парламентти Секретариатти иуонг, фракци «Единая Россия»- йи иуонг. 

Хетæг æй ООО «ДИГ – АГРО»-й генералон сæргълæууæг.

Ес имæ Арфи гæгъæди Республикæ Цæгат Иристон – Аланий сæргълæууæгæй. Парламентаризми райрæзтмæ устур ивæрæнтæ бахæссуни фæдбæл ма активон æхсæнадон кусти фæдбæл æвдæймаг созывы депутат Махъоти Батрази фурт Хетæг цитгингонд æрцудæй Уæрæсей Совет Федерациййи сæрдари Арфи гæгъæдийæй, кæци ин лæвæрд æрцудæй Матвиенко Валентинæн æхе къохтæй Совет Фракций æригон закъондæтгути æмбурди. 

Хетæг хуарз дæнцæг æй нæ фæсевæдæн, нæ адæмæн еугуремæн дæр æмткæй райсгæй. Берæ адæммæ ес фæрæзнитæ, берети бон æй байагъаз кæнун. Ма ка кæнуй, етæ дæр зунд æнцæ. Хетæг уонæй сæ еу æй, кæци рæдаукъохæй æ анхоси хай дæттуй, æ зæрдæ зæгъуй æ адæмæн хуарз, ма ин устурдæр æнтæстдзийнæдтæ æ къохи æфтуйæд. Æ зæрди хуарздзийнадæй циййес, етæ ин бантæсæнтæ. Устур уæлахезти бæрзæндæмæ исхезæд зæрдæрохсæй, нивгунæй, Хуцауи арфæй ма адæми арфæй хайгин уогæй.

Бабочити Э.