Скъола каст фæууни фæсте Кермен исахур кодта тæккæ гъæугæдæр дæсниӕдтæй сæ еуебæл – сувæллæнттæ ахур кæнуни гъуддаг иссæй æ царди нисан. Бийнонтæ уæдмæ Чиколай гъæумæ ралигъдæнцæ æма ами æрбунæттон æнцæ. Нигкой-фурт бакуста географий ахургæнæгæй берæ æнзти дæргъи, сауæнгæ пенсимæ рацæуни уæнгæ. Ма æ къохтæбæл ци фæлтæртæ рацудæнцæ, етæ æй нигъгъуди кодтонцæ куд фæлмæн, фал дæсни ахургæнæг, царди раст надбæл ивæрæг, уотæ. Советтони гъæуи еу рæстæгутæ адтæй скъолай сæргълæууæг дæр. Коллективи астæу ин адтæй кадæ, йе ´мгосгутæ æй уарзтонцæ, æ загъдæн адтæй бунат. 

Кермен адтæй партий рæнгъити æма абони уæнгæ дæр байзадæй æцæг коммунистæй. Зиндзийнæдтæй нæ тарстæй, æ размæ ци ихæстæ æвæрд адтæй, уони æнхæст кодта лæмбунæг, уæлдайгунтæй. Æнтæстгунæй æрмæст æ кустуæтти нæ, фал хæдзари гъуддаг дæр фæразонæй хаста, кæдмæ æ бон адтæй, уæдмæ. Æ кæстæртæн хуарз дæнцæг æвдиста. Æ уодуæлдай кусти фæрци еу æма дууæ хатти бæрæггонд не ´рцудæй уæлдæр хецауади æрдигæй. 

Нигкоти Кермени ма адæм зонунцæ куд нæ национ культурæ, æгъдæуттæ, традицитæ хуарз зонæг. Мадта дигорон адæмон фольклормæ дæр уотæ дæсни адтæй алкæддæр, ма имæ студенттæ практики рæстæги арæх цудæнцæ æрмæг æмбурд кæнунмæ. 

Кæд адæймагмæ еу хуарздзийнадæ фæууй, йе ´гас менеугутæй рахезгæй, уæд е адæмуарзондзийнадæ æй. Кермени кадæр зонуй, ке хæццæ куста, йе ´мгъæуккæгтæн, æ синхонтШкола № 2æн адтæй хуарз æмгарæ, æмбал, зундамонæг. Еунæг хатт æ хæццæ ка фембалдæй, ка радзубанди кодта, уонæн исуидæ сæ хуæздæр лимæн. Е ´нæхийнæ уод, æ зæрлхæлардзийнади фæрци имæ адæм сæхе ивазтонцæ. Аци бон дæр æй рабæрæг кæнунцæ, ма ин фæууй æхцæуæн алке индæ дæр. Æ курухондзийнади фæрци адтæй æма æй аккаг хестæр, уарзон адæймаг.

Æ цардæмбал Зои хæццæ исгъомбæл кодтонцæ æма царди тонхи рауагътонцæ сæ кæстæрти. Алкедæр си цæруй æхе бийнонтæй. Кермен ба, Еунæг Устур Хуцауи фæрци, цийнæ кæнуй æ кæстæрти кæстæртæбæл дæр æртиккаг фæлтæри уæнгæ.

Æрæги ба, æгас Уæрæсе Фидибæстæ гъæуайгæнæги бон ку бæрæг кодта, уæд Кермени, куд гъæуи хестæр лæг, уотæ бабæрæг кодтонцæ Чиколай гъæуи сæргълæууæг Гасанти Мурат, Чиколай гъæуи «Стур Нихас»-и сæрдар Таухъазахти Маирбек, «Стур Нихас»- и иуонг Таухъазахти Валодкæ зæрдæбæл дарæн лæвæрдти хæццæ. Хъæбæр æй исбоц кодтонцæ. Æ хæццæ царди фарстатæбæл фæххабæрттæ кодтонцæ, æ рагон бонтæ фемиста зæронд лæг. Е уомæн адтæй æцæг бæрæгбон. 

Нигкоти бийнонтæ хъæбæр зæрдæй арфæ кæнунцæ аци нæлгоймæгтæн се ´ргъудидзийнади фæдбæл. Хъæбæр бозæй си байзадæнцæ. «Алке дæр си ананезæй, æнæмастæй, зæрдæрохсæй цæрæд æ бийнонти хæццæ. Хуцауи фарнæй хайгин уæнтæ. Сæ хæдзæрттæ кувддонæ уæнтæ. Сæ къох алкæддæр идзаг уæд. Мах бæсти син Еунæг Устур Хуцау раарфæ кæнæд», - зæгъунцæ Нигкоти Кермени бийнонтæ.