Националон проект «Бийнонтæ» - мæ гæсгæ, кæци арæзт æй бийнонти федардзийнадæ æма еудзийнадæ багъæуай кæнуни туххӕй, райони культури Галауани косгутæ гъæздуг æма цæмæдессаг концертон программи хæццæ бабæрæг кодтонцæ Æхсæрисæри гъæу. Программи сæйраг нисан адтæй æнгом бийнонти цард не ´хсæнади ци бунат ахæссуй, уой раргом кæнун. Сæ дзурд кæрæдзебæл цæмæй бада, æмзунд - æмвæндæ цæмæй уонцæ бийнонтæ, кæрæдзей уарзгæй, кæрæдземæн аргъгæнгæй, цæмæй цæронцæ æма ирæзгæ фæлтæрæн дæнцæгæн бæззонцæ, уомæн гъæуй лимæн цæрун.

«Передвижной клуб» ке хонунцæ, уой исфæлдистадон къуар хъæбæр байгъæлдзæг кодтонцæ гъæуи цæргути зæрдитæ. Зæрддагон лæвар син искодтонцæ се ´сфæлдистадæй. Сæ программæ адтæй гъæздуг аллихузон зартæй, националон кæфтитæй. Уомæй рахезгæй ма равдистонцæ концертмæ æрцæуæг адæмæн игъæлдзæг æма цæмæдессаг номертæ, кæцитæ неке ниууагътонцæ уазалцæстæй. Амонæг æма сценари аразæг Хекъилати Людмилæ хъæбæр зæрдæй байархайдта, цæмæй концертон программæ рауадайдæ берæвæрсуг. 

Концерти архайдтонцæ Хекъилати Людмилæ, Цорити Фатимӕ, Ганоти Альбинӕ, Хабелати Альбинӕ, Дегойти Рустам æма Тедети Маринæ, культури нæлгоймæгти вокалон зарæггæнгути къуар, националон фæндурæй цæгъдгути къуар «Мелодии гор», Зæнгиати Аслан æма Кудзойти Алинӕ, вокалон группа «Ирон».

Еу загъдæй, изæр рацудæй гъар атмосфери. Концертмæ кæсгути æмдзагъдмæ гæсгæ бæрæг адтæй, куд арфиагæй байзадæнцæ, йе. Æхсæрисæри гъæуи сæргълæууæг Дзидзойти Тасолтан, ветеранти Советти сæрдар Дашити Руслан, гъæуи культури косгутæ æма æгас гъæуи цæргутæ дæр зæрдиуагæй арфæ кæнунцæ, ауæхæн рæсугъд æма игъæлдзæг изæр син ка балæвар кодта, уонæн. «Фулдæрæй - фулдæр исфæлдистадон æнтæстдзийнæдтæ сæ къохти æфтуйæд. Цийнаг бæнттæ сæбæл федауæд, сæ хæдзæрттæ кувддонæ уæнтæ, сæ бийнонтæ федар, сæ къæсæртæ бæркадæй идзаг, сæ кæстæртæ фæрнгун», - зæгъунцæ ӕхсӕрисӕрггӕгтæ.

Бабочити Э.