Нуртæккæ мæ радзорун фæндуй еу хъиамæтгун, курухон нанай туххæй. Е æй Æфсæнти Дзаболай кизгæ Асиат, кӕци райгурдæй 1931 анзи Къуссуй гъæуи берæ бийнонти æхсæн. Хуарз кизгæ гъæуæй æндæмæ ка уадзуй? Асиати ностӕн байагурдтонцæ Гобети бийнонтæ Петяй номбæл. Асиат еци хӕдзарӕмӕ бахаста æ хæццæ фарнæ ма кадæ. Ездон уогӕй, лæвардта ӕгъдау кæддæриддæр муггагæн. Балæвар син кодта æртæ кизги ма дууæ фурти. Царди сæ æривардтонцæ æ бийнойнаг Петяй хæццæ.

Асиат кæддæриддæр нимадта хæстæгути, муггагæн аргъ кодта. Сæ хæдзарæ Гобетæн - гъæуи сæри, фал иуазæггин адтæй кæддæридæр, Асиати берекет къохтæ берæ адæн раздахтонцæ.  Басилтӕ сӕмӕ æрбацæугӕй, Асиат алли сувæллони дæр хецæнæй нимадта. Ӕхуӕдӕг сувæллонæй дæр хъиамæтгун адтæй. Æ минкъий къохтæй солдаттæн бидта цъиндатæ. Æ кари сувӕллӕнтти хæццæ ба сæ фæххонионцæ акъоппитæ къахунмæ.

Гобети Петя къолхоз «Ирæфи» куста бригадирæй, ма Хизалай бӕхдонӕ ку кодтонцæ, уæд си Асиат æма æ сувæллæнтти хъиамæт берæ адтӕй. Уомæй рахезгæй, Асиат 40 анзи фæккуста Стур - Дигори скъолай æфснайæгæй, ма æхeцæй ездондæр дуккаг адæймаг нæ адтæй. Æхсæнади астæу - игъæлдзæг ма гиризгæнагæ. Берæ кæстæр кизгуттæ исахур кодта Асиат æлвесунбӕл, цъиндатæ кæнунбӕл, къеретӕ кæнунбӕл дӕр.

Асиати бийнойнаг, Гобети Петя, фæззиан æй æнзти размæ, ма ин гъай-гъай берæ зиндæр фӕцæй уæд. Фал æй хъисмæт уобæл кæми ниууагъта, - уæдмæ фæззиан æй æ фурт Артем. Нигки ба ма æ киндзæ Октябринæ, машинæ æй ниццавта горæти. Асиат мæститæ исæмбурд кодта æ зæрди, фал Хуцауи размæ æ бон ци адтæй? Уой фӕсте ба, кæд цæфæй нæ мæлис, уæдта дин рæхуст, зӕгъгӕ, Украини зæнхæбæл Сæрмагонд æфсæддон операций мæлæти цæф фæцæй æ бæдоли бæдолæ Гобети Серго. Уӕд Асиат бунтондæр æхемæ нийгъуста æма ӕй незтæ сæ буни искодтонцæ. Кæсунцæ имæ æ хуарз кæстæртæ, хуасæ гъæуагæй нæ уадзунцæ.

Мæ зæрдæ зæгъуй Асиатæн райнæнез ун. Уæхæн фарнæитауæг хестæрти фæрци ан мах нивгун æма амондгун.

Хайманти Антонинæ