Зумӕг, ӕрхезӕ!

Кӕдмӕ хелдзӕй зӕрдӕрхъезӕй

Нӕ дзилагӕ, нӕ ахил?..

Ду уӕддӕр, зумӕг, ӕрхезӕ,

Ӕрцӕйуадзӕ дӕ тъӕфил.

Ком, гъӕрӕнгти ниццӕйхауӕ,

Барӕвдауӕ уод-дивил,-

Салд бауӕрбӕл ӕритауӕ

Фӕлмӕн уӕргъунау, уорс фил.

Кем ка хӕссуй нӕ фалдзосмӕ,

Фӕттогтарст уӕд ӕ йʹахил,-

Фӕццӕйледзӕд ни ӕносмӕ

Ӕ дзахӕнамӕ ивил.

Зуймон фун

Ци цъемос ӕй, нигъгъӕдӕг дӕн,

Ӕнсури мет - мӕ хуӕрнӕг,

И цайуаг дӕр мӕхуӕдӕг,

И цавддор дӕр - мӕхуӕдӕг.

Никъкъозо дӕн, ниццӕйгубур,

Фӕххуаста мӕ ӕнӕуаг

Соцъа бурдӕн, итигъд будур-

Ӕнӕкӕрон, ӕвӕндаг.

Цазӕ мегъӕ, ци гъӕуй дӕ

Мӕ тухст уодӕй, ци хуӕрзӕг?..

Дзӕбӕхӕй - ма, тӕходуйтӕ,

Ехх, иссерӕ дӕ уӕзӕг!..

Мамукъати Хъазбег

«Ирӕф» журналӕй ист, 2023 анз.