Культурӕ ӕма аййевадӕ –  ирон адӕми ӕхсӕнадон царди кӕрӕдземӕн ӕнӕрагӕлдзгӕ дууӕ федар цӕгиндзи, кӕцити хурфи арф уедӕгтӕ рауагътонцӕ нӕ рагфиддӕлти уодварни хӕзнатӕ – иннӕ адӕмихӕттитӕй нӕ ци рӕсугъд ӕгъдӕуттӕ ӕма фӕткитӕ, аллихузон трӕдицитӕ хецӕн кӕнунцӕ ӕма нӕ ирӕзгӕ фӕлтӕртӕ кӕбӕл гъомбӕл кӕнунцӕ, еци хъаурӕгин рахуӕцӕнтӕ.

    Гъулӕггагӕн, адтӕй уӕхӕн рӕстӕгутӕ дӕр, нӕ паддзахади медӕгӕ аци ахсгиаг фӕззелӕнтӕмӕ «гъос дард» ку нӕбал цудӕй. Гъӕутӕ ӕма горӕтти Культури Галауантӕ ӕма Хӕдзӕрдтӕ ӕнӕгъудгонд, ревӕд ӕма ӕдзӕмӕй ку лӕудтӕнцӕ. Ӕрмӕст, мӕнӕ ӕрӕгитӕй ардӕмӕ ба, культурӕ ӕма аййевадӕмӕ цӕстӕнгас цӕхгӕр фендӕрхузи ӕй, балӕдӕргӕй, етӕ царди социалон - экономикон ирӕзти къабӕзти дӕр ахсгиаг гъуддӕгутӕ ке ӕнцӕ, уой.

       Уӕлдай активондӕрӕй сӕ кусти ихӕстӕмӕ устур байвӕрд хӕссун райдӕдтонцӕ культури аллихузон хайӕдти косгутӕ сӕхуӕдтӕ дӕр, цӕмӕй нӕ дессаги рагфиддӕлти намус, ӕфсар , кадӕ ӕма кӕдзостогдзийнадӕ ма фесӕфонцӕ, фал цӕмӕй сӕ «гагки» нӕуӕгӕй федар исбадонцӕ ӕма нӕ фӕсевӕд дӕр нӕ фиддӕлти хуӕздӕр  ӕгъдӕуттӕ ӕма фӕткитӕбӕл гъомбӕлгонд цӕуонцӕ.   

   Еци надбӕл ӕрлӕуди фӕстаг нӕ баизадӕнцӕ Ирӕфи райони культури артдзӕститӕ дӕр. Нӕуӕгӕй цӕхӕр искалдтонцӕ ӕма си  фӕсевӕд ӕвдесуй аййевади алли хузтӕмӕ дессаги скурдиӕдтӕ,

хестӕртӕ син разамунд дӕтгӕй ӕма син сӕ фӕлтӕрддзийнадӕй ба цӕстуарзонӕй хай кӕнгӕй, аллихузон националон проектти, зӕгъӕн, мӕнӕ нуртӕгки ци «Семья»-й проект цӕуй, уой ахадӕггун моралон ӕма материалон ӕнхусдзийнӕдтӕй пайда кӕнгӕй.  

    Нӕуӕгӕй исарӕх ӕнцӕ аллихузон, раздӕр «агитацион  цӕугӕ бригӕдтӕ» ке худтонцӕ, уони концертон къуӕрдти равдиститӕ туристон базити иуазгутӕн, санаторон-курортон уолӕфӕндӕндти сӕйгӕ хестӕр адӕмтӕ ӕма нӕфӕразгӕ сувӕллӕнтти скъолати, нӕ дессаги рӕсугъд культурӕ ӕма тог син алли кавд, алли зари дӕр ӕвдесгӕй.

     Ӕнӕсцохӕй, зӕгъун ӕнгъезуй, алли бон дӕр, культурон учрежденити сӕ куст хӕссунцӕ ахадӕггун кружоктӕ, фембӕлдтитӕ, фӕлладуадзӕн ӕма тематикон изӕртӕ, мастер-класстӕ, музыкалон инструменттӕбӕл фӕсевӕдон къуӕрттӕ ӕма ӕригондӕр сабийти ахуртӕ.  Еци еудадзуг куст идарддӕр дӕр минӕг нӕ кӕнуй, фал нигки устурдӕр ирӕзт ӕвдесуй нӕ номдзуд адӕмихатти уодварни хӕзнатӕ ӕма культурӕ багъӕуай кӕнуни ӕма федар бундор ивӕруни гъуддаги.  Ӕма, нӕ культури ирӕзтбӕл архайгутӕн сӕ къохи ӕфтуйӕд устурдӕр ӕма фулдӕр ӕнтӕститӕ!

                                                      Чихтисти Риммӕ

Хузистити: райони гъӕути культурон-аййевадон косӕндӕндти алли   

                     рауӕнти дӕр цӕунцӕ конд репетицитӕ ӕма ахуртӕ   

           хецӕн адӕмтӕ ӕма фӕсевӕдон къуӕртти хӕццӕ.