Ци æхсæнади медæгæ цæрæн, уоми алли адæймаг дæр иннетæй хецæн кæнуй куд æ бакастæй, уотæ æ уодигъæдæй дæр. Ка æхецæн нисан æрæвæруй хуарзи ном ибæл куд исбада æма ибæл архайгæ дæр фæккæнуй. Иннæ уæхæнæн ба уæлдай дæр нæ фæууй, ци цæстæй имæ кæсунцæ æ алфамбулай цæргутæ, ейæ.

       Адæми фарнæй хайгин адæймаг Хуцауи фарнæй хайгин æй. Уой туххæй ба алке дæр гъæуама æ алли гъуддагæй дæр кæна æхецæн кадæ, йе´ нхуси хай ма æвгъау кæна йе ´мхузонæн, алкæддæр йе ´усхъæ бадарунмæ уа цæттæ. Еци гъуддаг æй хаст, æдæуагæ, Хæзнидони гъæуи цæрæг адæммæ. Кæрæдзебæл æнцæ хуæст, æгъдау раттунмæ цæттæ, кæрæдзей фарсмæ балæунмæ тагъд. Уæлдайдæр ба æ куст адæми хæццæ æнгом баст ку уа, уæд.

   Абони мæ фæндуй уæхæн адæми тухæй зæгъун. Хæзнидон минкъи гъæу æй, фал си йе мбæстаг адæмæн ка лæггадæ кæнуй, уæхæнттæ ба еу æма дууæ нæ нцæ. Уæнæй æнцæ Уанити Казбек æма Чегемти Олег дæр. Мæнæ куд зæгъуй гъæуи хеунаффæйади сæргълæууæг Гегкити Рамазан, уомæй дæр бæрæг æй: «Уанити Казбек кæд æхуæдæг бæрнон кусти сæргъи лæуд æй, уæддæр еудадзугдæр æ сагъæстæ æнгом баст æнцæ æ райгурæн гъæуи хæццæ. Арæх бафæрсуй цигъæуæгтæбæл æма йе нхуси хай бахæссуй. Гъæуи администраций хæццæ æнгом бæттуй æ цард. Æрæги бабæй имæ курдиадæ бахастан, цæмæй фæккæса гъæунгти ка басугъдæй, еци цирæгътæ райевунмæ. Дуккаг загъд нæбал багъудæй кæнун. Казбек æхе фæрæзнитæй балхæдта, цал рохсгæнæн лампи гъудæй, уони. Уой уæлæмхасæн ба ма равардта машинæ сæ райевунæн. Машинæбæл бадтæй Хъульчити Игорь.

     Иннæ уæхæн, Чегемти Олег, кæци æ кустæй уæгъдæ рæстæги, хæдзари куститæ дæр фæффæстаг кæнгæй, райивта 38 цирагъи. Уой хæццæ 70 цирагъи цæгиндзи бацалцæг кодта аллихузон мизезитæ. Æ кустбæл мизд нæ райсгæй. Йе минкъи гъуддаг нæй, фал устур анхос гъæуи адæмæн дæр æма администрацийæн дæр. Нур бабæй гъæу æй æхсæвигон дæр бонау рохс. Йе æй берæ мулкити аргъ.

    Ма аци гъуддаг берæ анхосдзийнæдтæн сæ еу æй. Уомæй рахезгæй дæр Казбек æхемæ райста уæлмæрдтæмæ отсев æма циртдзæвæн ниввæруни гъуддаги ци гъæуй, уонни ласуни гъуддаг. Йе дæр æй адæмæн еугурон хуарз. Хуцау си исарази уад.

     Олегги тухæй дæр мæ зæгъун фæндуй, куд адæмуарзон, йе мхузонæн балæггадæ кæнунмæ цæттæ адæймаги тухæй. Кадæр имæ æхе бахатуй, нæгъ некæмæн зæгъуй. Алкæддæр цæттæй æ усхъæ бадарунмæ. Æз си хъæбæр арфиаг дæн. Уæхæн адæм дæ фарсмæ ку лæууа, уæд æнцондæр æй косун дæр. Арфиаг си æнцæ гъæуи цæргутæ дæр, æма сæ хъаурæ берæ уæд. Хуцауи хуæрзтæй хайгин уæнтæ».

    Мах дæр Рамазани хæццæ ан арази. Ес сæмæ æнæбæрцæ хъаурæ аци нæлгоймæгтæмæ цард рæссугъд хæссунмæ, æма нивæй, ирисхъæй хайгин уæнтæ алкæддæр.