Махӕй еу

               

Бетрозти Батраз Сӕрафели фурти ӕрмӕст Ирӕфи райони цӕргутӕ нӕ, фал ма идарддӕрти дӕр базудтонцӕ куд ӕцӕг хуӕрзтог,  хуӕрзӕгъдау ӕма ӕнӕхийнӕ лӕг, ӕхсӕнади медӕгӕ ба адӕми царди уавӕртӕ хуӕздӕр кӕнунбӕл архайгутӕй куд сӕ активондӕртӕй еу, уотӕ. Еунӕг хатт ӕй фӕууингӕй дӕр ин, уотид ӕ бакасти дӕр, алкедӕр банкъардзӕнӕй ӕ уоди рӕсугъд менеугутӕ, ӕцӕг дигорон ездон тог.

       Скъола ӕрмӕст хуарз бӕрӕггӕнӕнтӕбӕл фӕууогӕй Батраз бацудӕй идарддӕри уӕлдӕр  ахурмӕ ӕма ӕнтӕстгинӕй каст фӕцӕй Цӕгат Иристони Аграрон институти зооинженерон факультет ӕма, уой фӕсте, ӕ дӕсниадӕбӕл дзӕвгарӕ рӕстӕгути фӕккуста Хӕзнидони гъӕуи совхоз «Победи». 90-аг ӕнзти, Советтон паддзахади медӕгӕ еумӕйаг хӕдзарӕдтӕ ку фехалдӕнцӕ, гъӕууон-хӕдзарадон специалисттӕ ку некӕмибал гъудӕнцӕ, уӕд Батраз нисангонд ӕрцудӕй Ирӕфи райони администраций «Граждайнаг оборонӕ ӕма Ӕнӕнгъӕлтӕбӕл цаути» хаййади хецауӕй, кӕцими, цалинмӕ пенсимӕ нӕ рацудӕй, уӕдмӕ,  26 анзей дӕргъи, фӕккуста куд арӕхстгин сӕргълӕууӕг ӕма еузӕрдиуон специалист, уотӕ. Ӕ хуарз кусти туххӕй ин еу ӕма дууӕ хатти не ʹрцӕуидӕ лӕвӕрд кади нисантӕ – Грамотитӕ, Арфи пъисмотӕ, ӕхцай премитӕ, зӕрдӕбӕлдарӕн  лӕвӕрдтӕ, куд райони,  уотӕ республики хецауади ӕрдӕги дӕр.  Берӕ ӕнзти медӕгӕ ба Батраз еудадзуг  ӕй Хӕзнидони гъӕуи Ветеранти Совети сӕргълӕууӕг, ӕхсӕнади медӕгӕ нимади адӕймаг, багъӕуаги ӕнхусгъӕуагӕмӕ къох бадарӕг .  Еу рӕстӕгӕй ардӕмӕ ба косуй Ирӕфи райони ЕДДС  ке хонунцӕ - «Единая дежурно- диспетчерская служба», уоми.

    Батраз нӕй уӕхӕн адӕймаг ӕ «ӕз» "ӕ разӕй ка хӕссуй", ӕ минкъий баконд гъуддаг дӕр дзӕвгарӕ фулдӕртӕй ке бон исуй бавдесун. Фал…. «Адӕми цӕстӕ уинагӕй» - зӕгъуй нӕхемӕ дигорон ӕмбесонд. Батрази еудадзуг ӕвӕлмӕцгӕ фӕллойнӕн аргъ искӕнгӕй райони Ветеранти Совети президиуми иуӕнгтӕ бахастонцӕ фӕндон ӕма рарвистонцӕ курдиадӕ (ходотайство)Цӕгат Иристони ӕхсӕнадон ӕзмӕлд Ветеранти Советмӕ, цӕмӕй Бетрози - фурт хуӕрзеуӕггонд ӕрцӕуа Цӕгат Иристони «Кадгин ветерани» номӕй. Ӕма, ӕрӕги ба райони Ветеранти Совети сӕргълӕууӕги хуӕдӕййевгутӕ Цъоппойти Тимофей ӕма Цомайти Барис цитгин уавӕри Кади нисан «Почетный ветеран РСО - Алания» исӕмбӕлун кодтонцӕ ӕ хецаубӕл, ӕ берӕ хуӕрзеугутӕмӕ ма ин еу бафтаугӕй. Хуцау ин ӕй зӕрдӕрохси лӕвар фӕккӕнӕд! Ӕ дзӕбӕх дууӕ фӕлтӕрей фӕдонтӕ, уӕдта уони фӕдонтӕ дӕр ма                                        алкӕддӕр сӕрбӕрзонд уӕнтӕ сӕ кадгин хестӕрӕй!

                                                          Чихтисти Риммӕ

     Хузисти: Хӕзнидони гъӕуи Ветеранти Совети сӕргълӕууӕг  Бетрозти Батразӕн РЦИ - Аланий кадгин ветерани хуӕрзеуӕг дӕтгӕй.