Нуртӕккӕ мӕн радзорун фӕндуй замманай силгоймаги туххӕй. Бузойти Феня æй Ӕхсӕуи цӕрӕг, Бузойти Гриши бийнойнаг. Рацудæй син æма исгъомбӕл кодтонцӕ авд сувӕллони, надбӕл сӕ ӕривардтонцӕ, алке дӕр си цӕруй бийнонтӕй, ӕнцӕ сӕ хестӕрти хузӕн фӕнзуйнаг. Гъуллӕггагӕн, сæ зæнæгæй Ермак хуӕрз ӕригонӕй рамардӕй, ма уомӕ гӕсгӕ зин исхонӕн ес нивгун мадӕ ма фидӕ Гриша ма Феняй, фал уӕддӕр сӕ кадӕ ӕма хуарз ном нӕ фӕнниллӕг кодтонцӕ нӕ Дигори. Гриша æхуæдæг дæр рохсаг уӕд, нӕбал ӕй еу анзмӕ хӕстӕг, фал ниууагъта берӕ фарнӕ.

Кӕдӕриддӕр Бузойти Гриши хӕдзарӕ нимад адтӕй иуазӕггунбӕл, Феня адтӕй берекеткъох силгоймаг, абони дӕр нӕ уарзуй нӕййес загъд, удта зийнадӕ кӕнун. Феня ӕхуӕдӕг ӕй Хъазахти кизгӕ, бакасти адӕймаг. Æ цардæмбали хæццæ фӕццардӕнцӕ ӕнзти медӕгӕ, кӕрӕдзей нимайгӕй удта ӕгъдӕуттӕ дӕтгӕй адӕмӕн. Æ ӕрцӕунӕй хуæрз ӕрӕгий уӕнгӕ Феня кӕми ӕгъдау нӕ равардта - е зиани, е цийни, уӕхӕн хӕдзарӕ нӕййес Ӕхсӕуи зилди. Мадта надбӕл хӕдзарӕ æнцæ мӕ сæмæ ахид ес иуазæг.

Берӕ кизгутти исахур кодта Феня фанс исит кӕнун, ӕлвесун, ӕздохун, алдӕнбид кӕнунбæл. Ӕхе кизгуттæн дӕр баамудта берæ гъуддæгтæ, алцӕмӕ дӕр ӕмарахст, дӕсни æнцæ - абони цӕрунгъон ӕнцӕ ма идарддӕр хӕссунцӕ ниййергути фарнӕ.  

Феня ӕ дуйнебӕл дӕр нимад адтӕй ездон, сабурзунд силгоймагбӕл. Синхӕнтти хӕццӕ кӕддӕриддӕр цардӕй лимӕн - хецӕн арт ма еу ӕхсӕвӕрӕй. Мадта, фӕззӕгъунцӕ, Феняй къохтӕй исконд къӕбӕр æндæрхузи уидӕ - хуӕрзадӕ ма тӕнцъарӕ. Абони, кӕдӕй е 'мкъай Гришӕ нӕбал æй, уӕдӕй ӕ цӕсгонбӕл фӕббӕрӕг ӕй ӕнкъард ӕма арф гъуди, фал ибӕл ӕ устур бийнонтӕ, зӕнӕги зӕнӕг ку ӕрбамбурд унцӕ, уӕд е 'нкъард изолмӕ фӕлледзуй, бийнонтӕн ӕй федар сӕрбонс.

Хъӕбӕр ӕхцӕуӕн мин фӕууй, нӕ минкъий гъӕуи ма ке ес ауӕхӕн дессаг, курухон, дӕнцӕни уоститӕ. Гъулӕггагӕн, берӕ нӕбал ӕнцӕ, фал си ка ес, етӕ ба ӕнцӕ Ӕхсӕуи хуарз фарнӕхӕссӕг.

Хестӕртӕ фарнӕхӕссӕг ӕнцӕ, зӕгъгӕ, фӕззӕгъунцӕ, ӕууӕндун ӕз еци загъдбӕл, ма Феня, алӕмӕти замманай хестӕр уосӕ, берӕ цӕрӕд. Æ фарсмӕ бадгӕй мин фӕууй цидӕр ӕнахур ӕхсицгон – мӕхецӕн нанатӕ нӕбал ес, ма мӕ фӕлмӕн нанати тафст, æвæдзи, уомæй райсун, æма е минкъий гъуддаг нӕй.

Сакъити Миленӕ, ЦИПУ-й журналистики факультети студенткӕ.