Райони «Аланти Нихас»-и

                         

   Ирон адӕм сӕ равзурдӕй абони уӕнгӕ дӕр зӕнхи уӕлцъарӕбӕл зундгонд иссӕнцӕ сӕ хуарз ӕгъдау, се ʹфсар ӕма син еунӕг Хуцау цард бацӕрунӕн ци берӕ лӕгигъӕдтӕ равардта, уони хъаурӕй. Нӕ адӕмихатт иннӕ адӕмихӕттити астӕу зиннуй ӕма ӕрттевуй «гъолахъи фӕрдуг»-ау ӕ культури фӕрци, кӕцимӕ хаст цӕунцӕ уӕлдӕр ранимад адӕймаги менеугутӕ, царди ахсгиагдӕр рахуӕцӕнтӕ – ӕгъдау ӕма ӕфсӕрмидзийнадӕ, ӕности сӕрти нӕ  рагфиддӕлтӕ ци уодварни хӕзнатӕ рахастонцӕ, етӕ. Се ʹхсӕн ба ахсгиагдӕртӕй еуетӕбӕл нимад цӕунцӕ, нӕ фиддӕлтӕ ци кувдтитӕ кодтонцӕ цийни дӕр ӕма зини фингитӕбӕл дӕр, уӕдта сӕ куд кодтонцӕ, етӕ.

 

    Уонӕбӕл ӕрдзорунмӕ ӕма сӕ царди нӕ фиддӕлтӕ куд рӕсугъд   уагбӕл хастонцӕ, уотӕ ниффедар кӕнуни туххӕй ӕрӕги Ирӕфи райони ӕхсӕнадон ӕзмӕлд «Аланти Нихас» (ӕ сӕргълӕууӕг Гуӕцӕлти Агубе) бамбурд кодта ӕ Совети иуӕнгти гъӕути «Стыр Ныхас» - ти разамонгути, гъӕути цӕргути активон хестӕртӕй минӕвӕрдтӕ. Цитгин уавӕри хунд ӕрцудӕнцӕ берӕ ӕнзти райони «Стыр Ныхас» - ӕн разамунд фӕддӕдтӕг Хуасдзаути Тазрет, Чиколай гъӕуи администраций хецау – Гасанти Мурат, ӕ хуӕдӕййевӕг Киазумти Алик, Чиколай «Стыр Ныхас» - и  сӕргълӕууӕг Таухъазахти Маирбек, Совети  иуонг Нигкоти Мурат. Бонифӕтки сӕйрагдӕр фарстайӕй ба ивӕрд ӕрцудӕй цийни ӕма зини фингитӕбӕл ӕгъдау куд хӕсгӕй, циуавӕр кувдтитӕ ӕма кӕмӕн кӕнгӕ ӕнцӕ, уони фарста ӕма сӕ царди нниффедар кӕнун.

   Ӕмбурди архайгутӕй алкедӕр радзурдта ӕма дӕнцӕнӕн ӕрхаста нуртӕгки рӕстӕги цийни дӕр ӕма зини фингитӕбӕл дӕр ци рӕдудтитӕ уагъд цӕуй ӕма сӕ фудконд ци кӕнуй, уӕдта куд растдӕр ӕй сӕ хӕссун, уони туххӕй. Ӕмбурд рацудӕй кӕрӕдзей лӕдӕргӕй, кӕций фӕрци ӕ еугур архайгутӕ дӕр ӕрцудӕнцӕ

 еу хатдзӕгмӕ. Нӕ газетти аци номери мухур кӕнӕн цийни фингӕбӕл дӕр ӕма зини фингӕбӕл дӕр  ци кувдтитӕ кӕнгӕ ӕнцӕ, уони:

               Зини (марди) фингæбæл «рохсаг» зӕгъуни туххӕй

1. Хестӕр еруй Хуцауи ном.

2.  Рамӕлӕг уодӕн зӕгъунцӕ «рохсаг».

3.  Ирд цӕуй марди фӕсте байзайӕг бийнонти ном.

4.  Ирд цӕуй зӕронд мӕрдти ном.

5.   Муггагӕй лӕг арфӕ кӕнуй ӕрцӕуӕг адӕмӕн.

6.  Лӕвӕрд цӕуй дзурди барӕ дугкаг хестӕрӕн (ковуй    синхбӕстӕн).

7. Лӕвӕрд цӕуй дзурди барӕ ӕртиггкаг хестӕрӕн

 (арфӕ кӕнуй ӕрцӕуӕг адӕмӕн).

8.  Хестӕр еруй, тугъди ка фесавдӕй, уони ном).

9.  Хестӕр арфӕ кӕнуй кӕстӕртӕн.

10. Конд цӕуй бӕркад - берекетти кувд.

    

            Цийнӕдзийнади фингӕбӕл кувдтитӕ

 

1. Хестӕр ковуй еунӕг Хуцауи туххӕй.

2. Хестӕр ковуй ӕ фарсмӕ дууӕ кӕстӕрей туххӕй.

3. Хестӕр ковуй дууӕ муггагей туххӕй.

4. Хестӕр ковуй маддӕлтӕ ӕма фиддӕлти туххӕй.

5. Хестӕр ковуй ӕндӕр гъӕутӕй ӕрцӕугути туххӕй.

6. Дугкаг хестӕр ковуй финги хестӕри туххӕй.

7. Хестӕр ковуй фингӕбӕл кадӕр бадуй, уони хуарздзийнади туххӕй.

8. Ӕртигкаг хестӕр ковуй дугкаг хестӕри туххӕй.

9. Хестӕр ковуй ӕртигкаг хестӕри туххӕй.

10. Хестӕр дӕдтуй ниуазӕнтӕ хӕдзари бийнонти номӕй.

11. Идарддӕр кувдтитӕ финги цудмӕ гӕсгӕ.

12.  Кувд мийнасӕ-берекетти туххӕй.

13.  Хестӕр ковуй Уасгергий туххӕй.

14.  Кӕронбӕттӕни къӕсӕрти туххӕй кувд.

    Ӕмбурди архайгутӕ корӕг ӕнцӕ, цӕмӕй гъӕути дӕр ӕма синхти дӕр тургъи ӕгъдау хӕсгутӕ зонгӕ кӕнонцӕ аци унаффӕрахасти хӕццӕ адӕми. Еунӕг Хуцау ба дӕдтӕд адӕмӕн уӕхӕн хуарздзийнадӕ ӕма фулдӕр куд бадонцӕ цийнити фингитӕбӕл. Ӕнӕ зин дӕр нӕййес, фал ӕнафони зинтӕй ба алке хӕдзарӕ дӕр хизт уӕд!

Чихтисти Риммӕ.

              Хузисти: Ирӕфи райони «Аланти Нихас»-и ӕмбурди.