Исфæлдистадæ

 

…Гъæдæ – мæ дугкаг къæс, мæ дугкаг авдæнæ. Ардигæй хуæздæр æстæфун дзиллити дæр. Æ фæрци берети зæрдитæмæ никкастæн. Берети дуйне мин райгон æй æ гъæбеси. Ами еугурдæр – æмсæр уодтæ. Тæрсæ, æхсæрæ, сибулдзæ, уæгъæли. Тæрсунцæ кæрæдзей зæрдихудтæй. Да - а - лæ фурзундгинæй ка ниффахъæратæ’й, еци гъæубæсти ба адæм кæд бафæнздзæнцæ бæлæсти?

Мæн доги – некæд. Уоми æз дæр – фудгинти хæццæ: ацауал анземæ уæддæр еу хатт

æрдзи фарнæй туни гæбазæ куд не’рхастон фæлтæртæн?

…Адгинæй æрбафунæй дæн æдосæ, раст цума, дзенети ранигъулдтæн. Райгъал дæн мæ сæри асдзæгъдунмæ. Байагурдтон хуастæ. Пеци зинг нæма баминæг æй æма ин æ сæрбæл хускъитæ цæхгæрмитæ æривардтон. Цай, зæгъун, бацуминæ. И арахъи ниууагъди фæстейбæл бустæги дæр

исæновуд дæн. Æндегæй ба – уаруни æрдзæф. Еци листæгæй ниййасугъта. Тæрсун æ дæргъвæтин

дзинæзтæй. Еу бон мæ ку бауагътайдæ. Къамадтаги рæбунтæ æрзилдайнæ. Еу хатт ма’й зæгъун, Уæллагкон мæ ниббаста. Рацудтæн, кенæ уадæ, кенæ мет, кенæ мегъæ, кенæ ба арви суг – донæхгæд мæ къахнад. Фарæ дæр, аци анз дæр. Ци мин зæгъуй уомæй нæ Фидæ?

Ома, фагæ дин æй? Ке бакайдтай, зулункъахæй, æнсургинæй, сикъагинæй, етæ – будуридзаг.

Æнæмæнгæ, уотæ’й, фал си давæггагæй ку неци ес, тухтонæ дæр Æфсатийæй ку некæд неци ракодтон. Лихсти хæццæ ‘ймæ – мæ рацуд, табугæнгæ ба раздæхинæ. Ме’ууæнкæ ин хастон е’ртæкъахуг фингæмæ, мæ дони хуппæй дæр уой ном агурдтон, е дæр мин еу хаттæй – иннемæ æ дзогти барæуадзæй – косæрттаг. Цæй, нæфæлтау, уотæ зæгъдзæн: «Ци зæрдæй уа дæ балци Сохъурмæ, ци зæрдæй зелай æ фонсбæл, еци зæрдæй дæ раздахдзæй дæ бийнонтæмæ».

Цауæни зудæн бунат некæд адтæй. Зудæ æма æдзæстуарзон топгин, исдзæбæхи мадзал

кæмæн нæййес, еци адæймæг æй. Ка’й зонуй, æ нивæ фæррæстмæ уа адæми астæу: ездон дзурд,

аразгæ æгъдауæй, кæнгæ миутæй дукъахгути рæстæгмæ басайдзæнæй. Хуцау æма æ фарсмæ бадгути – некæд. Мæ рист бæргæ фегуппæг æй, фал мæ хуссæг ба нæбал æрахæста.

 Æгъузарти Таймураз