Фæлгонцадæ

 Царди фæззелæнтæ авд авди æнцæ. Сæ еугурей фур уагбæл рахæссун зæнхон адæймагæн æвæдзи зин æй. Фал цæстæй ке уинæн æма иуæнгти хъаурæй еуварс кæнунгъон ке ан, еци æведауцæ гъуддæгтæ ба гъæуама нæ сæрмæ ма хæссæн.

Бустæги нæ еумæйаг цæрæнуати кæдзосдзийнадæмæ хаст ку цæуонцæ, уæд. Фæндуй мæ, газеткæсæг, цæмæй, гъæунгæмæ рацæугæй, рафæлгæсай æма дæхецæн фæббæрæг кæнай, фалæмбулайтæ ци уавæри æнцæ, уой. Зонун æй, берæ хæдзæртти фæлдзостæ уодзæнæнцæ пуруса, е æндæр хæмпæлгæрдæгæй идзаг.

Надгæрæнттæ дæр уотæ. Уотемæй ба, Хуцауи фæрци, еци хæдзæрттæн сæ фулдæр æдзæрæг нæ’нцæ, ес си нæлгоймаг адæм дæр, кæцити бон æй цæвæг райсун æма горенрæбунтæ, надгæрæнттæ хъамилæй æркæдзос кæнун.

Гъæуæн æ федауцæ æ гъæунгтæ æнцæ, æма ни гъæуама алке дæр сагъæс кæна, æндæр синхæй, æндæр рауæнæй еске ку æрцæуа, уæд ци фæууиндзæй рæсугъдæн мах зилди, зæгъгæ. Фал а-фæстæг рæстæги беретæ уæхæнттæбæл мæтæ кæнунæй сæхецæн зин нæбал кæнунцæ. Уомæн æма сæ фиййæй, уома – сæ колдуарæй, идарддæр нæ инунцæ. Уотæ сæмæ кæсуй, сæ хæдзæртти рæбунти кæдзосдзийнадæ уони цæсгонæй нæ цæуй, зæгъгæ, фал рæдуйунцæ. Уæхæнттæ мæмæ гъонцъири хузæн фæккæсунцæ: æхе куд нилхъевуй æ цæрæнуати, æма æй тæркъæвда е карз хор куд нæ хъор кæнунцæ. Нæ сæ уинуй, нæ сæ игъосуй, уотемæй дæр ин хуарз æй. Дуйне ку æрсабур уй, уæдтæ рабуруй рохсмæ, æ «уосонгæ» æ рагъи бакæнуй, æма æнæмæтæй цæуй, æхуæдæг дæр нæ зонгæй, кумæ, уой.

Зæгъай мин, газеткæсæг, кумæ æрцæудзинан мах ба, зийнади фæрци нæ фалдзостæ пуруса, синдзæ, амбрози, иннæ уæхæн хæмпæлгæрдæги буни ку фæууонцæ, уæд? Нæлгоймаг хунгæй, æнгъезуй уæхæн уавæрмæ кудфæндий цæстингас дарун? Кадгиндæр æма пайдадæр нæ уодзæнæй иуæнгтæ райвазун æма хъамил æркæрдун, цæмæй ди синхæнттæ дæр арфиагæй байзайонцæ, гъæунгæ дæр ди «фæббоз» уа? Абони биццеу æ фиди косгæ ку нæ уинæ, фæлгонцæдæбæл архайгæ, уæд исон е дæр уой ку фæнздзæнæй, æма уæд цума кæмæ кæсдзæнæй нæ цæрæнуæтти фалдзости бакаст гъæугæ уавæри даруни гъуддаг? Еске ихуæрсдзинан нæ рæзтæ æфснайунмæ? Уогæ, райдæдтан ихуæрсун дæр, сæуæнгæ ма уæлмæрдти дæр нин нæ хеуæнтти циртитæ гъуд кæнунцæ ихуæрст адæн æхцабæл. Нæ царди «нæуæгдзийнæдтæн» е сæ еу. Уой ба нæ лæдæрæн, æма уотæгай, нæ национ менталитет ке хонæн, нæ реугудур карз хуайгæй, е исæфгæ ке кæнуй, исони бони ба нин устур мæстаг ке уодзæнæй.

Е – гъо, фал гъæйдæ бахатæн нæ дустæ, æма æркæдзос кæнæн нæ гъæунгтæ, уой фæсте ба мабал бауадзæн уæхæн уавæр исæвзурун. Уотæ нин федауцæ æма æнцондæр уодзæнæй, æрцæуæг адæми рази дæр æнæфсæрмæ уодзинан.

Айтекти А.