Газети архивæй

 

Цæветтонгæ, еу гъæуи цардæй гъæздуг лæг, æ мулкæн бæрцæ нæ зудта. Æ царди æмбали

хæццæ сæ мæлæти уæнгæ сæ цард рахастонцæ рæсугъдæй, æрзæронд æнцæ. Гъæздугæй бæргæ тъæпп хаудтæнцæ, фал сæ зæрдитæмæ ба сæ зæруи уæнгæ рохси цъита нæ цудæй, уомæн æма син не’Сфæлдесæг бæдолæ нæ равардта. Уомæ гæсгæ син еугур гъæуи цæргутæ дæр тæрегъæдæй мардæнцæ, уомæн æма гъæуи цæргути хæццæ дæр уарзонæй цардæнцæ, берæ анхос син лæвардтонцæ, сæхе си уæлдæр нецæмæй дардтонцæ.

Ахид сæмæ рауаидæ дзубанди, уома, ку рамæлæн, уæд нæ мулк кæмæн байзайдзæй, зæгъгæ. Еу бон хæдзари хецау æ уосæмæ дзоруй: «Цидæрæй  куддæрæй, хуæздæр мадзалæн ес еунæг гъуддаг æма нæ мулк бафæдзæхсæн гъæуи кæстæртæй еуебæл, кæци сæ мах фæсте дони бакалæгау, арти басодзæгау нæ фесафдзæй, æхецæн си еститæ дæр исараздзæнæй, æхе си кади хæццæ фæддардзæнæй, мах ном дæр нæ феронх уодзæнæй, кадæ дæр нин мæрдтæмæ искæндзæнæй». Уобæл дууæ нæбал загътонцæ.

Еу бон гъæздуг лæг фæдздзурдта йе’нсувæри байлæгъ биццеумæ æма ин загъта: «Мæнæ дин еу

миллион æхцатæ, цо æма сæ бахуæрæ – батар кæнæ, иуаргæ сæ кæнис, еститæ си æлхæнис, дæ барæ, фал дин ку фæууонцæ, уæдта мæмæ æрбацо».

Лæхъуæн æхцатæ райста æма æ цийнæн кæрон нæбал адтæй, фæййаууонæй лæги разæй, уайтагъд йе’мбæлтти хæццæ фæййеу æй, ресторан загътонцæ, кено загътонцæ, къарти гъазун загътонцæ, уотемæй къуæрей æндæргъци миллионæй къапекк дæр нæбал райзадæй. Лæхъуæн гъæздуг лæгмæ æрбаздагъдæй, еугур хабæрттæ дæр ин разагъта æма ин загъта, дæ дзурд дин исæнхæст кодтон, зæгъгæ.

Гъæздуг лæг ин берæ «арфитæ» фæккодта æма æй уотемæй рарвиста. Къуæрей фæсте гъæздуг лæг æрбахонун кодта æ уоси æвзонг æнсувæри. Уомæн дæр миллион соми равардта æма ин загъта: «Ци хузи дæ фæндуй, уотемæй сæ бахуæрæ, æлхæнгæ дæр ци дæ фæндуй, уой æлхæнæ, дæ лимæнтæн дæр си фæххæйттæ кæнæ. Лæппо цийнæ гæнгæ фæййауонæй. Фиццаги хузæн е дæр цалдæр боней фæсте гъæздуг лæгмæ ревæд дзиппæй фелвæстæй. Гъæздуг лæг æ уоси æнсувæрæн фæййарфитæ кодта æма æй уотемæй сæхемæ рарвиста.

Уони фæсте гъæздуг лæги фæндонмæ гæсгæ æрбахудтонцæ гъæуи еу мæгур хæдзари лæхъуæни, уæди рæстæги æ бон бийнойнаг æрхонун ке бон нæ адтæй, уæхæни. Уомæн дæр еу миллион æ къохи бакодта, иннетæн куд, уотæ, уомæн дæр æрдзурдта æма’й уотемæй рарвиста. Мæгур хæдзари лæхъуæн цийнæгæнгæ сæхемæ рандæй. Баздахтæй æма си æхе исаразта, мæгур лæги фурт æй нæбал исхудтайсæ, бийнойнаг дæр æрхудта, æ лимæнти дæр банимадта, æ зæрди фæндон исхарз кодта æхца, нæ сæбæл аурста, фал имæ æхцайæй изайгæ дæр бакодта, уæдта æ зонгитæй кæмæн балæвар кодта, уонæбæл ба фæсмон дæр кодта, æма уотемæй гъæздуг лæгмæ æрбацудæй, æ дзиппæй æхца исиста æма сæ гъæздуг лæгмæ балæвардта. Æз дин уотæ ку загътон, куд дæ фæндуй, уотемæй сæ бахуæрæ – батар кæнæ, ду ба ма си фæстæмæ ку æрбахастай.

Ду мин ке загътай, уой балæдæрдтæн, фал дзæгъæлти ке байурстон æма бахуардтон, йетæ ба мин гъулæггаг æнцæ, маст дæр сæбæл мæ зæрдæмæ бацудæй æма сæбæл гъенцъун кæнун нур дæр ма, загъта мæгур лæги фурт. Уобæл дзубанди фæцæй. Гъæздуг лæг зæнхæмæ берæ фæккастæй, уæдта загъта: «Аци бонæй фæстæмæ мæ гъæздугдзийнæдтæ, мæ мулк уодзæнæнцæ дæу. Мæ еугур циййес дæр æнцæ дæу агкаг, дзæгъæли сæ не фесафдзæнæ».

Дæгуйти Еристау