Фидæ æма фурти астæу рахастдзийнадæ

- Фурт гъæуама æ фидæбæл ци ина, уой кæна. Уотæ фæззæгъунцæ: «Фиди фарнæ мæрдтæмæ хæсгæ нæй».

- Гъæуама дæ фидæн лæггадæ кæнай.

- Фурт агъдау дæтта гъæуама адæми æхсæн дæр, хæдзари дæр. Фидæ ескумæ ку цæуа, кенæ ескæцæй ку ʼрцæуа, уæд ин фурт кæстæреуæг кæнуй.

- Фурт нæ фæццæуй, æ фидæ ци æмбурдмæ цæуа, уордæмæ.

• Фурт æ фиди хæццæ еу фингæбæл нæ бадуй.

- Фурт æ фидæмæ æ номæй нæ дзоруй, фал нæ адæнмæ куд æй, уотæ: папæ, баба, дада.

- Фидæмæ фæстæмæ исдзорун æй æнæгъдау миуæ. Уæхæн адæймаг æгадæ кæнуй æхе дæр, æ бийнонти дæр. Уæхæн адæймаги хæццæ еу фингæбæл бадун дæр не ʼмбæлуй.

- Фурт æхе алкæми дæр гъæуама уотæ дара, уæхæн æгъдау имæ уа, æма си æ фидæ æ сæр бæрзæндти куд хæсса.

• Фидæ æма фурт гъæуама кæрæдзей лæдæронцæ, кæрæдземæн аргъ кæнонцæ.

        Аргъæуттæ

Арс æма муд

    Арс мудмæ ластонцæ æ гъостæй æма син нæ кумдта. Уотемæй ин ласгæ-ласун æ гъостæ ратудтонцæ. Удта мудæй ку райахуста, удта син фæстæмæ нæбал кумдта, æма æй думæгæй фæстæмæ ластонцæ, уотемæй ин æ думæг дæр ратудтонцæ. Уой тухæй, дан, арс æй æнæ думæг æма цубур гъос.

                   Берæгъ æма дзæгъарæг

    Берæгъ дзæгъарæги æрахæста æма æй хуæрунвæндæ искодта. Уæд имæ дзæгъарæг дзоруй:

- Берæгъ, æгъдау бакæнæ, æгъдау!

- Циуавæр æгъдау?  - бафарста æй берæгъ.

- Уæ фиддæлтæ махæй еске ку хуæриуонцæ, - загъта дзæгъарæг, - уæд си раздæр хуарз фæгъазиуонцæ. Æртæ хатти æй уæлвæндагмæ исгæлдзиуонцæ, æртæ хатти ба – дæлвæндагмæ.

    Берæгъ дзæгъарæги зуввуттитæ кæнун райдæдта. Дзæгъарæг уотемæй еу хаттæн æ цъасæмæ хæстæг æрхаудтæй, æма си исмедæг æй.

       Берæгъ хæлеугъæлæсæй байзадæй.

Тагъддзоруйнаг

       Гакк – гакк, куййи гакк!

Куййæн дæр æй нæ дæттæн,

Берæгъæн дæр æй нæ дæттæн.

Гакк – гакк, куййи гакк!

Куййи къахæй ма хонетæ! –

Хуæнхти сæрти - æ сæррæт.

Итигъд будурти - æ тъæбæртт,

Форди билти - æ уайæн,

Арвгæрæнтти – æ рæйæн,

Гакк – гакк, куййи гакк!

                              Римæхсæнгæтти гъазт

 Агла – догла, чара – чах,

Гъазæн не ʼстур тургъи мах.

Хленци – менцъи, дондра – рæс,

Раздæр бацъундæ кодтон æз.

Агла – догла, чара – цай,

Æз ку ʼрнимайон фæндзай

Хленцъи – менцъи, донра – дзæхст,

Уæдмæ гъæуама уайтæ римæхст.

Агла – догла, чара – саг,

Æз ке иссерон фиццаг,

Хленцъи – менцъи, донра – цæхх,

Е фæххуæрд уодзæй, фæббæх.

Агла, гъазтæн е æхуæдæг,

Хленцъи, ислæудзæй цъундгæнæг,

Агла – догла, чара – чъист,

Хленцъи – менцъи гъазт фæцæй.

                                                                    Телефонæй дзоруни æгъдау

- Телефонæй кæнæ цубур æма медесгун дзубанди. Гъæрæй ма дзорæ, дæхемæ дæ алфамбулай адæм ма æркæсун кæнæ.

- Нæй рæсугъд саумæ 8 сахаттемæй раздæр æма изæри 10 сахаттей фæсте дзорун, кæд æхсицгæ гъуддаг нæ уа, уæд.

- Ескæмæ бадзоргæй, фиццаг салам ратта æма бафæрсæ, евдæлуй æй дзорунмæ æви нæ, уомæй.

- Ескæмæ телефонæй бадзоргæй æма æнæзонгæ гъæлæс фегъосгæй, ма фæрсæ: «Ка дæ?». Фиццаг бал салам раттæ, дæхе байамонæ, уой фæсте ба, кæмæ æма ци гъуддаги тухæй дзорис, уой кой искæнæ.

- Кæд телефони номери фæррæдудтæ, уæд ке хæццæ дзорай, уомæн дæ рæдуд балæдæрун кæнæ, хатир си ракорæ, ке ʼй батухсун кодтай, уой фæдбæл.

• Аргъ кæнæ адæми æма дæхе рæстæгæн. Æнæгъæуаги дзубандитæбæл дæ рæстæг ма исафæ. Æгъдаугин адæймаг телефонæй дзоруй æрмæстдæр гъуддаги фæдбæл.