Гасанти бийнонти хецӕн кодта еу минеуӕг: фидӕй-фуртмӕ адтӕнцӕ ӕгъдау ӕма фӕткӕбӕл хуӕст. Уомӕн ӕвдесӕн еу хабар. Сӕдӕ анзи минкъий гъӕуагкин, уӕд къахун райдӕдтонцӕ Дигори къанау. Дзӕвгарӕ рӕстӕгутӕ рацудӕй уӕдӕй абони уӕнгӕ, фал ма Гасанти хӕдзари ба, зӕрдӕбӕл дарӕн хъазар дзаумауау, лӕууй, сӕ фидӕ фиццаг зӕгӕл ци дзӕбокӕй никъкъуӕрдта, еци косӕнгарз. Уӕд аразтонцӕ къанаукъахгутӕн косæн ӕма цӕрӕн бунӕттӕ, уӕдта тъуннели хурфӕ гъӕдтӕ ӕма фӕйнӕгутӕй федар кодтонцӕ.

Фидибӕстон тугъди рӕстӕги, немуц Чикола ку байахӕстонцӕ, уӕд фиццагидӕр ке ниййахæстонцӕ, уонӕй еу адтӕй Гасанти Азӕмӕт. Гурусхӕ ибӕл кодтонцӕ, куд партизанти хӕццӕ бӕстдзийнадӕ дарӕг, уотӕ. Никки ба ма, цума ӕ кизгӕн дӕр ӕнхус кодта сосӕг кусти, уотӕ дӕр. Æ кизгӕ Хулиймӕт барӕй уагъд ӕрцудӕй гъӕуи, уой агъонмӕ куста гъӕуи фӕскомцӕдесонти секретарӕй.

Румынаг салдӕттӕ сӕ штабмӕ ку фӕццӕй кодтонцӕ, уӕд Хулиймӕтӕн бӕнтӕстӕй кедӕр тургъӕмӕ баледзун æма æхе бафӕсвӕд кӕнун, Азӕмӕт ба Нальчикки лагерӕй рӕлигъдӕй. Уотемӕй ба нимад адтӕй, уордӕмӕ ка бафтуйа, уомӕн раледзуни фадуат неци хузи ес, зӕгъгӕ. Цӕйбӕрцӕдæр рӕстӕг къахтонцӕ зӕнхӕ, ку ралигъдӕнцӕ, уӕдта бонигон сӕхе римахстонцӕ гъӕдти, ӕхсӕвӕ ба фӕндаггӕрӕнтти сӕ фазӕбӕл лӕстӕнцӕ.

Сауӕнгӕ ма Азӕмӕти ӕнсувӕри биццеутӕ Ханафи ӕма Омарбий дӕр сӕхе сбастонцӕ сосӕг къуари хӕццӕ. Сӕ еуебӕл цудӕй - 13, иннебӕл ба - 12 анзи. Гъӕуи ци фудмиутӕ кодтонцӕ немуц цӕргутӕн, уони уингӕй, Ханафи ӕхецӕн иснет кодта немуцаг офицери рамарун, ӕма ин ӕнтӕсгӕ дӕр бакодта. Уой фӕсте ӕхе гъӕдӕмӕ райста партизантӕмӕ, фал ку базудта, знаг ин ӕ мадӕ ӕма е ’нсувӕри ниййахӕстонцӕ, уой хабар, уӕдта фӕстӕмӕ гъӕумӕ ӕриздахтӕй ӕма ӕхе къахӕй бацудӕй немуци комендатурӕмӕ.

Мади ӕма ин ӕ дууӕ биццеуи гестапойӕгтӕ Нальчик ӕрдӕмӕ фӕлластонцӕ. Еу рауӕн ба фудӕфхуӕрд мади машинӕй рагӕлстонцӕ, уотӕ сӕмӕ фӕккастӕй, цума рамардӕй. Дзафи ку ӕрӕскъиттӕй, уӕд изолдӕр хӕтун райдӕдта кӕсгон гъӕутӕбӕл, фарста, агурдта ӕ бӕдӕлтти. Фӕстӕдӕр ба еу фиййаубӕл исцурӕвӕрӕ ӕй ӕма ин радзурдта, дууӕ ӕригон биццеуебӕл куд сӕмбӕлдӕй. Етӕ адтӕнцӕ мард. Аууондӕр рауӕнмӕ сӕ бахаста ӕма сӕ нартихуари хъӕлнӕгътӕй бамбарзта. Уой фӕсте мадӕн еу зӕронд уӕрдунгонд равардта, дууӕ голлагеми сувӕллӕнтти мӕрдтӕ ниввӕрунмӕ ин фенхус кодта ӕма Дзафи рахуӕстӕй ӕхуӕдӕг уӕрдунбӕл. Хъӕбӕр ӕй фӕндӕ адтӕй, уӕддӕр ма син сӕ мӕрдтӕ сӕ райгурӕн гъӕубӕл исӕнбӕлун кӕнун. Æма еци нисан ӕ къохи ӕфтуйгӕ дӕр бакодта. Фал айдагъ уобӕл нӕ фӕцӕнцӕ цардӕфхуӕрд силгоймаги мӕгурбӕнттӕ. Уой фӕсте ма имӕ исигъустӕй ӕ дууӕ хестӕр фуртей марди хабар дӕр. Етӕ тугъдмӕ рандӕ æнцӕ ӕ райдайӕни. Фӕстӕдӕр Чиколай гъӕунгтӕй еуемӕн лӕвӕрд ӕрцудӕй Гасанти ӕнсувӕрти ном.

Сурх Æфсад немуци ку фӕссурдтонцӕ Чиколайӕй, гъӕу ку суӕгъдӕ ’й знагӕй, уӕд Азӕмӕт ӕ кизги хӕццӕ гъӕуи саразтонцӕ санитарон-фӕскомцӕдесон-фӕсевӕдон бригадӕ. Етӕ зилдӕнцӕ гъӕурӕбунти гъӕдти, агурдтонцӕ нӕхе салдӕтти мӕрдтӕ ӕма сӕ ӕнсувӕрон циртмӕ ластонцӕ. Уоми ба сӕ сӕ зӕнхи хайбӕл бафтуйун кӕниуонцӕ. Уонӕй сӕ алкӕцидӕр Азӕмӕтӕн хъӕбӕр зинаргъ адтӕй, уомӕн ӕма уӕдмӕ е ’ртӕ фурти дӕр тугъди адтӕнцӕ.

Æ хестӕр фурт Анзор, райгурдӕй 1914 анзи, Чиколай ӕстӕуккаг скъола каст фӕууни фӕсте, ахур кӕнун райдӕдта Ленингради, политрохсади институти, уой фӕсте ба нисангонд ӕрцудӕй нӕ республики адӕмон ахуради комиссари хуӕдӕййевӕгӕй.

 

Тугъд ку райдӕдта, уӕд Анзормӕ адтӕй «бронь», ӕ бон адтӕй нӕхемӕ байзайун, фал туххӕйти дӕр ӕхе тугъдмӕ рарветун кодта. Рарвистонцӕ ’й 1941 анзи 8 ӕгусти 212-аг ӕхсӕг дивизий ӕфсӕдтон хӕйттӕй еуемӕ политразамонӕгӕй. 10 августи немуц лӕгарстонцӕ Киевмӕ нигулӕнӕрдигити. Æхсӕвӕ-бон нӕ зонгӕй, политразамонӕг Гасани-фурт алкӕддӕр уидӕ раззагдӕр рӕнгъити ӕхсӕн, архайдта дзурдӕй, гъуддагæй сӕ ӕхсӕг полки тугъдонти размӕ разӕнгард кӕнунбӕл.

Сӕ полки командир уӕззау цӕф ку фӕцӕй, уӕдта Гасани- фурт ӕхемӕ райста ихӕстӕ ӕма ӕгасей разӕй ралӕгарста атаки. Æгасей разӕй ниггӕпп кодта немуцӕгти акъоппмӕ ӕма ин гъӕбесӕйхуӕст раеудагъ ӕй знæгти хӕццӕ. Уотӕ еунӕг бонмӕ цалдӕр хатти ӕма ку фӕццӕф ӕй, уӕддӕр тугъди будур нӕ ниууагъта, разамунд лӕвардта е фсӕдтонти размӕцудӕн.

Анзори бийнонтӕ ма сӕ бӕгъатӕр тугъдонӕй фӕстаг финстӕгутӕ райстонцӕ Сталингради бунмӕ тугъдтитӕй. Уордигӕй сӕбӕл сӕмбалдӕй сау гаагъӕди ӕ фӕммарди туххӕн дӕр. Гъе, уотемӕйти фӕцӕй ӕ цард хестæр лейтенант Гасанти Анзорӕн.

Ниййергутӕй не руагӕс кодта сӕ фурти фӕммарди хабар. Уомæ гӕсгӕ ба дзӕвгарӕ рæстӕг нӕ игъосун кодтонцæ сæ дуккаг фурт Ужерӕн.

Ужер хъӕбӕр сӕрустур уидæ, Октябри цитгин революций хӕццӕ ӕманзон ке адтӕй, уомӕй. Сувӕллонæй фӕстæмæ дӕр ӕй хъӕбӕр фӕндӕ уидӕ Райгурӕн бӕстӕ гъӕуайгӕнӕг исун. 1941 анзи ӕнтӕстгинӕй каст фӕцӕй Смоленски пулеметӕйӕхсӕг училище ӕма ӕрвист ӕрцудӕй Рыбинскмӕ, фӕстӕдӕр ба ӕййивд ӕрцудӕй Ярославльмӕ Красноперекопски ӕфсӕдтон комиссариатмӕ. Уӕдмӕ Ужер райста лейтенанти цин ӕма ин бабарӕ кодтонцӕ фронтмӕ батальон бахъӕртун кӕнуни ихӕс. Ужер ӕ еци ихӕс сӕнхӕст кодта ӕнтӕстгинӕй, кӕд сӕбӕл надбæл, ӕнӕ ӕруолӕфгӕй, немуцаг хуæдтӕхгутӕ бомбитӕ калдтонцӕ, уӕддӕр. Еунӕг салдат дӕр си нӕ фӕгъгъудӕй. Батальони салдӕттӕ иурст ӕрцудӕнцӕ ӕфсӕдтон хӕйттӕбӕл, ӕхе ба ин снисан кодтонцӕ 128-аг ӕхсӕг дивизий бастдзийнадӕ дарӕг хайади афицерӕй. Архайдта Украини галеуфарс знагӕй исуæгъдӕ кӕнунбӕл тохти. Уӕззау тугъдтити хуӕцгӕй, ӕрхайдта Хонcap Польши, бӕхизтӕй цӕугӕдӕнттӕ Сан, Вислӕ, Одер, Нейси, Шпреей сӕрти, тох кодта Берлин ӕма Прагӕ байсуни тохти.

Æ тугъдон скъуӕлхтдзийнӕдти туххӕн Гасанти Ужер хуарзӕнхӕгонд ӕрцудӕй «Фидибӕсти тугъди» 1-aг къӕпхӕни, «Сурх Стъалуй» ордентӕ ӕма фараст майданемӕй. Цалдӕр хатти ба райста арфи гӕгъӕдитӕ И. В. Сталинӕй.

1945 анзи октябри ба сӕрӕгасӕй ӕрӕздахтӕй ӕ pайгyрӕн гъӕумӕ.

Советон Цӕдеси цардӕййевӕн хӕлхъой рӕстӕгутӕ ку ниллӕудтӕнцӕ, уӕдта, Фидибӕстон Устур тугъди уодӕгасӕй ка байзадӕй, знаги фӕттӕ ке фӕййевгъаудтонцӕ, еци тугъдон ветеран бацӕй ӕнаккаг цъаммар фудгӕнгути амӕттӕг. Дууӕ фудгæнӕг къуарей ӕхсӕн хъаугъати фудӕй лӕгмар ӕййевдзийӕй Ужери фатермӕ къӕразӕй гранат багæлста ӕма ин ӕ цард раскъудта.

Азӕмӕти ӕртиккаг фурт Мӕхӕмӕт ӕ хестӕр ӕнсувӕр Анзори зиани хабар ку фегъуста, уӕд ӕхецӕн бунат нӕбал ирдта, сфӕндӕ кодта ци ’й фӕндуййӕй дӕр ӕфсадмӕ бахаун. Куд зонӕн, уотемӕй 17 анздзудӕй тугъдмӕ нӕ истонцæ ӕма ӕригон лӕхъуӕн финстӕг ниффинста К. Е. Ворошиловмӕ. Цубур рӕстӕгмӕ дзуапп райста маршӕлӕй ӕма си загъд адтӕй, цӕмӕй иннӕ финстӕгмӕ баӕнгъӕлмӕ кӕса, гъуддаг бӕлвурдӕй равзаруни туххӕн. Хуӕрзрæхги райста нӕуӕг финстӕг К. Е. Ворошиловӕй, ӕ къопи ба ӕрвист адтӕй райони ӕфсӕдтон комиссариатмӕ. Уой фӕсте ӕцӕгӕйдӕр ӕрвист ӕрцудӕй Сталингради фронтмӕ.

Сӕхемӕ куд финста, уотемӕй ами сæмбалдӕй тохӕг салдӕттӕбӕл Иристонӕй, финста, еумӕ знаги куд дӕрӕн кӕнунцӕ, уой туххӕн. Еци финстӕгутӕ кӕсгӕй, адӕймаг нур дӕр ма, уал ӕнзей фӕсте, деси бацӕуй, цӕйбӕрцӕбӕл нифсӕйдзаг адтӕнцӕ еци фӕлтӕр, цӕйбӕрцӕбӕл хъаурӕ ӕма сӕмӕ цардбӕллондзийнадӕ адтӕй. Мӕхӕмӕт Сталингради бунмӕ тугъдтити сӕрӕгасӕй раервазтӕй. Уой фӕсте ба сӕ Курскмæ рагӕлстонцӕ ӕма ӕ хӕццӕ бастдзийнадӕ фесавдӕй бийнонтӕн.

40 анзей бӕрцӕ нимад цудӕй ӕнӕбӕрӕгӕй фесӕфӕгбӕл. Бийнонтӕ аллирдӕмити финстонцӕ финстӕгутӕ, фал дзуаппбӕл ба нӕ хуӕст кодтонцӕ.

Еууӕхӕни ба финстӕг райстонцӕ Белгороди ӕфсӕдтон комиссариатӕй. Куд рабӕрӕгӕй, уотемӕй скъолай ахурдзаутӕ райстонцӕ бӕгъатӕр тугъдони хъисмӕт исбӕлвурд кӕнуни ихӕс сӕхемӕ. Уоми финст адтӕй: «Уӕ фурт бӕгъатӕрӕй фӕммард ӕй гъӕу Негаевӕй дууӕ километри уоддӕр». Æригон фӕдагоргутӕ ссирдтонцӕ ӕнсувӕрон цирт. Æвæрд си адтӕй ӕртӕ советон салдати. Уонзей еу разиндтæй Гасанти Мӕхӕмӕт. Хеуонтӕ сфӕндӕ кодтонцӕ уордӕмӕ фӕццӕун. Ӕ мадӕбӕл кӕд 86 анзи цудӕй, уӕддӕр нӕхстæрбӕл ниллӕудтӕй. Дзурдтонцӕ ин, - «нӕ бафӕраздзӕнӕ», - зӕгъгӕ, фал сӕмӕ ниййерӕг игъосгӕ дӕр не 'ркодта. Сӕ цорти ци къанау уадӕй, уордиги дон къустели никкодта, сӕ тургъи сикъитӕй ба армидзаг батухта ӕма сӕ ӕ хӕццӕ фӕлласта ӕ фурти циртбӕл никкӕнунмӕ.

Белгородаг зӕнхӕбӕл ба сӕмӕ ӕнгъӕлмӕ кастӕнцӕ бунӕттон цӕргутӕ, ветерантӕ, администраций косгутӕ, скъоладзаутӕ, ӕфсӕдтонтӕ. Ӕма кӕд хеуонтӕ сӕ ахсгиаги циртбӕл къох байвӕрунмӕ ӕма хъонц кӕнунмӕ ӕрцудӕнцӕ, уӕддӕр сӕ зӕрдитӕ ба барохс ӕнцӕ.  Ӕнсувӕрон циртдзæвӕн адтӕй хуӕрззилд, хуӕрзӕфснайд, алливӕрсти деденгути къотӕртӕ,

донӕхсинцъити бӕлӕсти къалеутӕ сӕ цӕнгтӕ ӕркъолӕ

кодтонцӕ циртмӕ. Курсанттӕ ӕма скъоладзаутӕ кӕрӕдзей ӕййивтонцӕ цирти цуппар фарсемӕ кади ради лӕуунӕй.

Мӕхӕмӕти хестӕр хуӕрӕ Хулиймӕт сӕ ниййерӕг мади

номӕй, муггаги номӕй арфӕ ракодта бунӕттон цӕргутӕн,

скъоладзаутӕн, сӕ ӕнсувӕри циртбӕл син уотӕ ке ауодунцӕ, уой туххӕн. Загъта: «Абонӕй фӕстӕмӕ нӕ мади зӕрдæ нӕбал ӕхсайдзӕнӕй ӕ фуртмӕ. Мах уи хъӕбӕр боз ан, нӕхемӕ ӕздӕхӕн Белгородщинӕй ӕнӕзӕрдӕдзоргӕй, уомӕн ӕма не ’нсувӕр Мӕхӕмӕт, ӕ райгурӕн бӕстӕ уотӕ ӕгӕрон уарзтӕй ка уарзта, ӕвӕллайгӕй ка фӕллойнӕ кодта, ӕ исонибони райдзаст цардбӕл ӕ уод ка нӕ бавгъау кодта, е æхе

ӕмхузон фӕллойнӕгӕнӕг адӕни зӕнхӕбӕл е’носон бунат ке иссирдта. Нур ни байрагӕс ӕй, ӕ цард дзӕгъӕли ке нæ равардта, е».

Ӕцӕгӕйдӕр, мах сӕрбӕл ӕ цард ка равардта, уони имисун - царди устурдӕр ахурадӕ ӕй...

ДЗАТЦЕТИ Тамарӕ

Журнал «Ирæфи» 2025 анзи 2-аг номерæй ист.