Дзубанди ӕригон сӕргълӕууӕги хӕццӕ

       

     Дон царди хуасӕ ке ӕй зӕнхӕбӕл, уой ни амонун некӕмӕн гъӕуй. Минкъий гъӕуагӕ си ку равзарӕн, уӕд истухсӕн, нецибал нин фӕхъхъӕртуй царди. Уомӕ гӕсгӕ ба ӕ фагӕ ун адӕмӕн, ӕ хуӕрзгъӕдӕдзийнадӕбӕл куст ӕма ӕнӕхъорӕй уад адӕймаги царди нимад цӕуй тӕгкӕ ахсгиагдӕр гъуддӕгтӕн сӕ фиццагбӕл.

   Ӕнӕзунд нин нӕй 90-аг ӕнзти, нӕ бӕсти хӕлхъойти рӕстӕги, уӕдта ма уой фӕсте дӕр, алли рауӕнти дони фарста куд изадӕй ресгӕй. Уони хӕццӕ мах, Ирӕфи райони дӕр. Рауаидӕ уотӕ, ӕма цалдӕргай бӕнттӕ дӕр гъӕу, кенӕ еу линибӕл къуар гъӕуи баизаиуонцӕ ӕнӕ дон. Кенӕ нӕ цӕуидӕ кӕдзосгонд дӕр берӕ объективон анхосӕгти фудӕй. Ӕма уонӕй сӕйрагдӕр анхосаг ба алкӕддӕр адтӕй ӕхцай фӕрӕзнити нӕ фагӕ кустӕн аллихузон техникон еуӕгтӕ фӕммадзал кӕнунӕн. Уӕдта ӕрмӕст уӕд нӕ, дони фарста алкӕддӕр нӕ райони изадӕй хуӕздӕр гъӕуагӕй. Фал мӕнӕ ӕрӕгити ба, 2023 анзи, нӕ республики конд ӕрцудӕй еумӕйаг устур кустуат ГУП «РПВВ», зӕгъгӕ, гъома - Республикӕ Цӕгат Иристони Паддзахадон Унитарон Доникустгӕнӕг Кустуат, кӕцимӕ хаст ӕрцудӕнцӕ нӕ республики еугур районти муниципалон «Водоканалтӕ» дӕр. Районти ба ин филиалтӕ баизайгӕй.

    

   Ирӕфи райони уӕхӕн кустуатӕн анзмӕ хӕстӕг разамунд дӕдтуй ӕригон ӕхсаргин лӕппо Цорити Таймурази фурт Руслан, кӕци ӕ фиццаг бонтӕй фӕстӕмӕ ӕвдесуй устур разӕнгарддзийнадӕ ӕма хъӕппӕрес адӕми царди аци ахсгиаг фарстабӕл зӕрдӕбунӕй косунмӕ. Хуӕздӕр ин ӕ кусти нисанти туххӕй базонунмӕ ӕ хӕццӕ фембалдӕй нӕ райони газет «Ирӕф» - и уацхӕссӕг дӕр. Ӕма ин Руслан радзурдта:

   - 2024 анзи 5 июли мах райони муниципалон дӕндти кустуат МУП «Водоканал» дӕр, куд республики еугур районти, уотӕ еугонд ӕрцудӕй республикон ГУП «РПВВ» - мӕ (Республиканское Предприятие Водоснабжения и Водоотведения), кӕци ӕхемӕ райста ихӕс, федералон программитӕй пайда кӕнгӕй, районти еци хузи кустуӕттӕн хъаурӕ раттун, нӕуӕг техникон фӕрӕзнитӕй сӕ фӕгъгъӕздугдӕр кӕнун, цӕмӕй куст, багъӕуаги, афонадӕбӕл конд цӕуа ӕнӕкъулумпитӕй. Уомӕн, ӕма раздӕр ӕнзти районтӕн сӕхе техникӕ ке наʾдтӕй, уой туххӕй донуайӕн хӕтӕлтӕ изадӕнцӕ ӕнӕгъудгонд, берӕ рауӕнти тунд хӕтӕлтӕй дон кодта дзӕгъӕл уад, адӕнмӕ ба нӕ хъӕртгӕй.

     Нур нӕ зӕрдӕ бадардтан нӕ куст федералон ӕнхусти фӕрци ке фенцондӕр ӕма хуӕздӕр уодзӕнӕй. Нуридӕгӕн ба бал нин, цубур рӕстӕгмӕ, лӕвӕрд ӕрцудӕй нӕуӕг экскаватор ӕма машийнӕ УАЗ «Фермер». Сӕ фӕрци «аваритӕмӕ» тагъддӕр рауайун ӕма сӕ тагъддӕр раеуварс кӕнун ӕй нӕ бон, ескӕмӕй техникӕ агорун ӕма коруни бӕсти цурд рацӕуй нӕ куст дӕр.

     Дони хуӕрзгъӕдӕдзийнадӕ дӕр бӕрӕг кӕнӕн рӕстӕгӕй-рӕстӕгмӕ, нӕхе кустуати лабораторийӕй нӕмӕ ӕрцӕунцӕ ӕма исесунцӕ дони пробитӕ, кӕцити уавӕр нин цубур рӕстӕгмӕ игъосун дӕр фӕккӕнунцӕ. Чиколай райсунцӕ 10-гай пробитӕ, иннӕ гъӕути 3-гай, алли рауӕнтӕй. Фӕууй, «планово» ке хонӕн, уӕхӕн куститӕ, кенӕба сӕ, дони хуӕрзгъӕдӕдзийнадӕбӕл естӕмӕй фӕссек уогӕй, цӕун дӕр ӕркӕнӕн нӕхуӕдтӕ.

     Аци кустуати райдайуни агъоммӕ, куд берӕ адӕмтӕ, уотӕ ӕз дӕр некӕд расагъӕс кодтон ӕ сосӕгдзийнӕдтӕбӕл, фал мин нур хъӕбӕр цӕмӕдессаг иссӕй е. Фӕндуй мӕ зонун кӕд ӕма кӕмити ӕййивд ӕрцудӕнцӕ донуайӕн хӕтӕлтӕ, куд хуӕздӕр райаразун гъӕуй куст. Уомӕ гӕсгӕ ба сӕбӕл зелун еудадзуг нӕ кустуати косгути хӕццӕ. Хатгай, устур тунд ескӕми ку ракӕнуй хӕтӕл, уӕдта ӕхсӕви цийфӕндий афони дӕр раистӕн нӕ хуссӕнтӕй ӕма ӕвӕстеуатӕй нӕ техники хӕццӕ балӕууӕн ӕ сӕргъи.

     Арӕх рауайуй уотӕ дӕр ӕма гъӕунгӕй хӕдзарӕмӕ ци хӕтӕл цӕуй, е ку ратонуй, уӕддӕр беретӕ ӕрбадзорунцӕ мах кустуатмӕ. Ӕма, кӕд е мах ихӕс нӕй, уӕддӕр фӕккӕсӕн уонӕмӕ дӕр, банхус син кӕнӕн, нӕ къохи ци ӕрмӕг уа, уомӕй. Ка нӕ уа, уомӕн ба косгӕ бакӕндзинан, куд нӕхемӕ дигорон ӕгъдау, уотӕ, фал нӕхъӕртгӕ ӕрмӕг ба ӕлхӕнун багъӕуй хӕдзари хецауӕн ӕхецӕн. Кӕд уагӕвӕрд уотӕ нӕй, уӕддӕр мӕнмӕ ба уотӕ кӕсуй, ӕма, абонент афонадӕбӕл, ихӕстӕ нӕ кӕнгӕй, ку феда дони ӕхца, уӕд мах дӕр нӕ къох бадардзинан ӕнхусмӕ. Куст ба, куд зонетӕ, уотемӕй лӕугӕ некӕд кӕнуй, ес нӕмӕ берӕ рауӕнти дони хӕтӕлтӕй ӕййевуйнӕгтӕ. Ӕма сӕбӕл архайдзинан, цӕмӕй нӕ гъӕути цӕргути ӕфсадӕн хуӕрзгъӕдӕ, ӕнӕнез донӕй.

     Ӕма, ӕвӕдзи, раст дӕр нӕ уодзӕнӕн, нӕ кустадон, хуарз ӕма еузӕрдиуон исхонун ке ӕнгъезуй, еци коллективи куст размӕ ке фӕрци ӕнӕкъулумпитӕй цӕуй, адӕмӕн «уоди хуасӕ» ке хонӕн, уой хуӕрзгъӕдӕдзийнадӕ, ӕнӕнез, кӕдзос ӕма фагӕбӕл ӕд ӕхсӕвӕ, ӕдӕ бонӕ ка косуй, уони туххӕй ку нӕ зӕгъон. Фӕууй уӕхӕн ӕхсӕвтӕ дӕр, алке ӕ гъар хуссӕни ку фӕххуссуй, уӕд мах ба уаруни, уазали, гъӕдти, хуӕнхти ку баизайӕн ӕрмӕстдӕр адӕм цӕмӕй донгъӕуагӕ ма исонцӕ, уой туххӕй. Цидӕр нин ӕнтӕсуй хуарз кустӕй, етӕ фӕуунцӕ ӕнгом баст, кӕрӕдзей лӕдӕргӕ коллективи фӕрци. Ес нӕмӕ дууӕ мастери, дууӕ экскаваторщикки, дууӕ шофири, цуппар слесӕри, еу электрик, еу сварщик, еума - хецауи шофир. Етӕ ба ӕнцӕ номхундӕй – мастертӕ Цӕрикъати Ермак ӕма Тамати Алик, слесӕртӕ Пъинти Максим, Кертанти Зураб, Алтути Юрик, Хъарати Алибег, шофертӕ – слесӕртӕ Гуӕцӕлти Рамазан, Чегати Тамерлан, сварщик Медойти Алан, электрик Тауасити Алик, эксковаторщиктӕ Бетрозти Эльбрус ӕма Баликъоти Таймураз, гъардӕндти хӕтӕлти слесӕртӕ Цорити Рафик ӕма Цӕрикъати Славик – еу бийнонтау ӕнгом коллективи иуӕнгтӕ. Сӕ цӕрӕнбонтӕ берӕ уӕнтӕ! Хуарзӕй ба хуарз зӕгъун гъӕуй, ӕнӕмӕнгӕ. Сӕ кӕдзос уоди хъаурӕй косунцӕ еци ном. Сӕ хъиамӕт ба мӕ фӕндуй бавдесун адӕмӕн кусти рӕстӕги хузиститӕй.

         -   Арфӕ дин кӕнун, Руслан, дӕ лӕмбунӕг радзубандий туххӕй, нӕ зӕрдӕ дин зӕгъуй ӕнтӕститӕ нӕ еумӕйаг гъӕугӕ гъуддагбӕл кусти.

                                             Чихтисти Риммӕ

   Хузистити: Ирӕфи райони дӕндти кустуат ГУП «РПВВ» ӕригон

                         сӕргълӕууӕг Цорити Руслан;

                         кустуати коллективи иуӕнгтӕ сӕ архайди рӕстӕги