Хуцаубони, 22 июни, нӕ сабурцардуарзагӕ райгурӕн бӕстӕ Советтон Цӕдесмӕ фудӕзнаг ку ӕрбалӕбурдта 84 анзей размӕ, уой зӕрдӕбӕлдарӕн бони фӕдбӕл Чиколай сӕрмӕ ци Ӕнсувӕрон ингӕн ес, уордӕмӕ сӕумӕ рагийӕй цӕун райдӕдта берӕ адӕм. Ами нӕ тугъдонтӕй фашистти къохӕй ке цард раскъудӕй сӕребарӕбӕл тохи сӕрбӕлтау, уони циртдзӕвӕнбӕл кади нисанӕн ивӕрд цудӕй дидингутӕ ӕма веноктӕ, ӕдзӕмӕй минут балӕудӕй дӕр син радон хатт кадӕ кодтонцӕ алли кари адӕмтӕ.

Кадгин мадзалмӕ ӕрцудӕнцӕ ӕма си архайӕг адтӕнцӕ Ирӕфи муниципалон райони администраций сӕргълӕууӕги хуӕдӕййевӕг Соскъити Алан, райони культури управлени ӕма культури Галауани сӕргълӕугутӕ Темурти Хетӕг ӕма Махъоти Александр сӕ кустадон коллективти хӕццӕ, ӕхсӕнадон ӕзмӕлдтитӕ «Совет ветеранов»-и хецауи хуӕдӕййевгутӕ Цъоппойти Тимофей ӕма Цомайти Борик,«Аланти Нихас» - и хецау Гуӕцӕлти Агубе,  фӕсевӕдон ӕзмӕлд «Движение первых» - и сӕргълӕууӕг Дзагурти Альбинӕ фӕсевӕдон къуар – волонтерти хӕццӕ, Чиколай 3-аг скъолай ахурдзаути хӕццӕ ӕсгаргути къуари сӕргълӕууӕг Цорити Ирмӕ ӕма ма берӕ ӕндӕртӕ. Митинг байгон кодта Махъоти Александр.

Мадзали фӕдбӕл медесгун дзубанди, Фидибӕсти тугъди дессӕгтӕ ӕма нӕ тугъдонти ӕнӕбӕсӕттон бӕгъатӕрдзийнади туххӕй, ӕрцӕуӕг адӕмӕн ракодта Темурти Хетӕг. Ӕма нин Хуцау радтӕд уӕхӕн хъаурӕ, аци кадгин гъуддаг – Фидибӕсти Устур тугъди нин, сӕ цардбӕл нӕ ауӕрдгӕй, уӕлахез ка ӕрхаста,уони ном еруни хъаурӕ берӕ ӕнзти куд цӕуа хестӕртӕй кӕстӕр фӕлтӕртӕмӕ!                                                                                                                                                                                                                                                                                                                                                                                                                                                                                

                                               Чихтисти Риммӕ.

Хузисти: Чиколай сӕрмӕ Ӕнсувӕрон ингӕни митинги рӕстӕг 22 июни 2025 анзи.