Дагестани сӕйраг горӕт Махачкалай 16 июни 2025 анзи ӕ куст рахаста Цӕгат - Кавкази федералон зилди адӕмон скурдиӕдти фестиваль. Горӕти устур фӕзуатмӕ еци къуар бонеми алли регионтӕй ӕрцудӕй берӕ иуазгутӕ культури алли къабӕзти - кавди, зарди, адӕмон музыкалон инструменттӕбӕл цӕгъдуни ӕма уотӕ ӕндӕр лӕгигъӕдти сӕ ацъагъуитӕ бавдесунмӕ. Устур цӕмӕдеси хӕццӕ имӕ ӕрӕмбурд ӕй горӕти цӕргутӕй дӕр берӕ адӕм.

   «Е адтӕй хъӕбӕр устур рӕсугъд ӕма цийнаг, хӕлардзийнадӕ федар кӕнуни, Кавкази ци берӕ адӕмихӕттитӕ цӕруй, уони искурдиадгун коллективтӕн сӕ кӕрӕдземӕ урух ӕма райдзаст сценӕбӕл сабур ӕма лимӕн царди къохтӕ раттуни мадзали ӕргъуди», - радзурдта нин фестивалӕй зӕрдрохсӕй исцӕуӕг Ирӕфи районӕй минӕвӕрдти къуари хестӕр, райони культури управлений сӕргълӕууӕг Темурти Хетӕг.

   Хетӕг ма нин цубурӕй куд балӕдӕрун кодта, уотемӕй фестиваль байгон кодта Махачкалай горӕти сӕргълӕууӕг Юсуп Умавов, ӕма еугур иуазгутӕн дӕр зӕрдибунӕй «Ӕгас ӕрцотӕ» зӕгъуни фӕсте ба сӕрустурӕй радзурдта фестиваль ке хӕссуй Уӕрӕсей Хецауади Премий лауреати ном, ӕртӕ боней медӕгӕ, ӕнӕмӕнгӕ, ке балӕвар кӕндзӕнӕй ӕ еугур архайгутӕн дӕр зӕрдӕбӕлдарӕн рӕсугъд бӕнттӕ.

   Ӕма ӕцӕгӕйдӕр «Кавказ – еу бийнонтӕ» адтӕй ирд, зӕрддагон, хъаурӕгин, культурон царди гъӕздуг бӕрӕгбон, кӕцими ӕрцӕуӕг адӕмти зӕрдити уӕлдай устур фӕд ниууагъта Цӕгат Кавкази Федералон Округи ӕма Уӕрӕсей иннӕ регионти коллективти ӕхсӕн Цӕгат Иристони Ирӕфи райони культури Галауани фӕндурцӕгъдгути къуар «Мелодия гор» ӕ дессаги зӕрдӕбӕлӕмбӕлӕг, иуӕнгти гъарӕг цӕгъдтитӕ ӕма искурдиадгун цӕгъдгути сугъзӕрийнӕ къохти фӕрци.

          Фестивали кӕронбӕттӕни ба ӕ архайгутӕ цитгин уавӕри хунд ӕрцудӕнцӕ Махачкалай администраций хецауади хӕццӕ

фембӕлдмӕ, кӕцими нӕ хуӕдахур искурдиадгун фӕндурцӕгъдгутӕн конд ӕрцудӕй уӕлдай ӕрфитӕ. Ирӕфи райони культури управлений сӕргълӕууӕг Темурти Хетӕг ба, нӕхе рагон дигорон ӕгъдаумӕ гӕсгӕ, иуазӕг фусунтӕн раарфӕ кӕнуни фӕдбӕл куд, уотӕ, еци дессаг бӕрӕгбон искӕнунмӕ хъӕппӕрес бавдесгути номбӕл Раджабти Эмилийӕн балӕвар кодта Ирӕфи райони культури Галауани къохӕйдӕснити къуари конд ирон националон хъӕппӕлти хӕццӕ къохӕй конд рӕсугъд «киндзитӕ», кӕцитӕ нисан кодтонцӕ нӕ адӕмихатти зӕрдити гъар, адӕмон сфӕлдистадӕмӕ уарзт, ӕма нӕ адӕмихӕттити ӕнгом бастдзийнадӕ сабур царди сӕрбӕлтау.                                                                            

Чихтисти Риммæ

              Хузисти: Ирӕфи райони культури Галауани фӕндурцӕгъдгути къуар «Мелодия гор» Махачкалай горӕти фестиваль «Кавказ – еу бийнонти».