Арфӕ

 

     Адӕймагӕн е ʹнӕнездзийнадӕй хъазардӕр неци ес. Ӕ рист ӕма имӕ ӕ батухсти ӕнхуси къох бадаргъ кӕнӕг ба ин исуй ӕ Хуцауи, ӕ изӕди хаййи хузӕн цитгин ӕма хъазар.

   Берӕ рӕстӕги мӕн дӕр тухсун кодтонцӕ, дохтири хуасӕ дӕр ке нӕбал иста, сауӕнгӕ горӕти сӕйгӕдӕндти дӕр мадзал кӕмӕн нӕ ирдтонцӕ хуӕздӕр специалисттӕ, уӕхӕн карз риститӕ. Æ нифс дӕр мӕмӕ, куд лӕдӕрдтӕн, уотемӕй некебал хаста операци искӕнунмӕ дӕр. Мӕ уоди хуасӕ еци рӕстӕги адтӕнцӕ нӕхе Чиколай сӕйгӕдони поликлиники сӕргълӕууӕг Хъожити - Цӕрикъати Тиминӕ, терапевт Дзоблати Аленӕ, «Тагъд ӕнхус» - и хаййади дохтиртӕ ӕма кӕстӕр медицинон персонал. Се ʹрбахъӕрдти мӕ зӕрдӕ ӕнӕмӕнгӕ фӕффедар уидӕ, ке бабӕй мин фенцон кӕндзӕнӕнцӕ, сӕ фӕлмӕн дзурд, сӕ уоди гъар ӕма сӕ дӕсни къохӕмбӕлди фӕрци.

     Нуртӕгки, Хуцауӕй арази, горӕти сӕйгӕдони мин конд ӕрцудӕй вазугкин операци ӕма мӕ, мӕ уавӕр фӕххуӕздӕр уогӕй, фӕндуй зӕрдӕбунӕй раарфӕ кӕнун, уӕлдӕр ке ранимадтон, нӕ сӕйгӕдони еци косгутӕн сӕ профессионалон - медицини косӕги бӕрӕгбони фӕдбӕл. Хуцау уи исарази уӕд уӕ еугуремӕй дӕр! Сумах изӕдтау ӕрвист айтӕ Хуцауӕй зӕнхӕмӕ адӕмти уодӕнцойнӕн ӕма уин уӕхецӕн дӕр мӕ зӕрдӕ зӕгъуй федар ӕнӕнездзийнадӕ уӕ бийнонтӕ, уӕ хеуӕнтти хӕццӕ. Зӕрдӕрохсӕй ма берӕ ӕнзти фӕккосетӕ уӕ хъӕбӕр ӕма ахсгиаг гъӕугӕ дӕсниӕдтӕбӕл. Ниллӕг уин ковун мӕ сӕрӕй! Уӕ профессионалон бӕрӕгбӕндтӕ ба уӕбӕл алли анз дӕр рӕсугъдӕй цӕуӕнтӕ!

                                          Чиколай цӕрӕг

                               Гамазти Зоя.