Хуӕрзауодӕндзийнадӕ

       

     Сувӕллӕнттӕ гъӕуай кӕнуни бӕрӕгбони агъоммӕ, кӕци нӕ бӕсти медӕгӕ бӕрӕггонд цӕуй анзӕн ӕ рӕсугъддӕр мӕйӕ июни фиццаг бони, райони культури Галауани хуӕдахур артиститӕ концертон программи хӕццӕ бабӕрӕг кодтонцӕ, Дигори райони Дур-Дури гъӕуи нӕфӕразгӕ сувӕллӕнттӕн ци скъола-интернат «Надеждӕ», зӕгъгӕ ес, уой.

        Арӕх ӕнцӕ ауӕхӕн хъӕппӕрестӕ Ирӕфи райони культури Управлени (ӕ сӕргълӕууӕг Темурти Хетӕг) ӕма ӕ Галауани (ӕ сӕргълӕууӕг Махъоти Алик) косгути фӕрци. Ӕма бабӕй етӕ радон хатт сӕхемӕ райстонцӕ ихӕс уоми сабийти зӕрдитӕ барохс кӕнунмӕ.  Ӕма, ӕцӕгӕйдӕр, еци бон ардӕмӕ ӕрцӕуӕг аййевади косгутӕ ци игъӕлдзӕг ӕма цийнӕдзийнадӕ ӕрбахастонцӕ нӕфӕразгӕ уодтӕн, уомӕн зӕгъӕн дӕр нӕййес. Алли музыкалон номер дӕр сувӕллӕнтти зӕрдити игурун кодта рӕсугъд ӕнкъарӕнтӕ ӕма си алкедӕр архайдта е ʹскурдиадӕ ӕма ӕ хъаурӕ бавдесун зарди, кавди, игъӕлдзӕгдзийнади. Уӕлдайдӕр ба ма сӕ хӕццӕ цийнӕдзийнади тумбулӕгмӕ ку рахезиуонцӕ артиститӕ сӕхуӕдтӕ кафунмӕ, зарунмӕ, уӕд сӕ уодтӕ гъардтонцӕ сӕхе бавдесунмӕ. Раст цума сӕ ниййергутӕ адтӕнцӕ, уотӕ цийнӕ кодтонцӕ  иуазӕгутӕбӕл. Алке дӕр си фӕндадтӕй сӕ хӕццӕ байгъӕлдзӕг кӕнун, бамбӕлун сӕбӕл.

    Гъазтизӕр рахаста дзӕвгарӕ рӕстӕг интернатти тургъти.  Алли сувӕллон дӕр си ӕхебӕл банкъардта иуазгути зӕрдхӕлардзийнадӕ, уарзт ӕма фӕлмӕн  уозӕлд. Хуӕрзбонтӕ зӕгъуни агъоммӕ ба син иуазгутӕ ӕрбахастонцӕ, Чиколай гъӕуи пусулмон дин хӕссӕг Цӕрикъати бийнонти тукан «Фирдаус» сабийтӕн рӕдаукъох ӕма зӕрдӕй ци аллихузон адгийнӕгтӕ ӕма адгин ниуазуйнӕгтӕ ӕрбарвистонцӕ, уони. Ӕма  Хуцау исарази уӕд сӕйгӕ сувӕллӕнтти зӕрдитӕ кадӕр барохс кодта еци бон, уонӕй. Раттаги къох ба идзагӕй-идзагдӕр кӕнӕд.

     Ауӕхӕн хуӕрзауодӕн кӕнӕн фембӕлдтитӕ ба хъӕбӕр гъӕугӕ ӕнцӕ се ʹнӕнездзийнадӕ ӕгӕр раги кӕмӕн фӕккиудтӕй, еци сувӕллӕнттӕн, ӕма син сӕ фӕлмӕн уодтӕ барӕвдаугутӕй дӕр Хуцау исарази уӕд! Се ʹнӕнездзийнадӕ ба федар уӕд алкӕддӕр!

                  Чихтисти Риммӕ