Комкоммӕ дзубанди  

             

   Кӕд сӕрди фиццаг мӕйӕ ӕ ради бацудӕй, уӕддӕр ма Ирӕфи райони зӕнхкосӕг еуӕй-еу хӕдзарӕдти ба, арӕх уарунти фудӕй, кӕронмӕ нӕма рахъӕрдтӕнцӕ уалдзигон-будурон куститӕ. Зӕнхкосӕг бӕргӕ пайда кӕнуй алли кустӕн бӕзгӕ сахаттӕй дӕр, фал ӕрдзи нихмӕ адӕймаг ӕнӕ хъаурӕ ӕй ӕма ин балӕборӕ-балӕборӕй ба не ʹнтӕсуй фӕндон рахуӕцун ӕ кусти.

     Цӕйбӕрцӕ гектартӕ ма изайуй абони ӕнӕ арӕзт хӕдзарӕдти ӕма цӕмӕй тӕссаг ӕй зӕнхкосӕгӕн идарддӕр ма рӕстӕг уарунгун ку рахӕсса, уӕд? Аци фарстай фӕдбӕл нин нӕ райони гъӕууонхӕдзарадон управлений сӕйраг агроном Махъоти Олег радзурдта:

     - Нӕ хумзӕнхити фӕзуӕдти нимӕдзӕ аци анз дӕр раздӕрау изайуй ӕнӕййивд - 10 мини 500 гектари. Уонӕй, еугур хузи хӕдзарӕдти, еумӕ сӕ райсгӕй, уӕдта сӕ нисантӕ куд адтӕнцӕ, уомӕ гӕсгӕ 10 мин гектари гъӕуама байахӕсса нартихуар нӕмугӕн. Алли анз дӕр фулдӕр пайда кӕмӕй райсунцӕ зӕнхкосгутӕ, еци культурӕ.                      

     Хуӕздӕр рӕстӕг ӕма хуӕздӕр техникӕй пайда кӕнгӕй, еугуремӕй раздӕр нартихуар нӕмугӕн 7000 гектареми батудтонцӕ устурдӕр хӕдзарӕдтӕ СПК «Акберди», ИП «Скодтаев», СПК «Дидинат», ИП «Соскиев», ООО «Авелана», ООО «Век» ӕма еу къуар минкъийдӕр фермерон хӕдзаради. ООО «ФАТ-АГРО» ба, кӕци кӕнуй селекцион куст картофи хуӕздӕр сортитӕ искӕнунбӕл, ниййаразта еци культурӕй 52 гектари Лескени хумзӕнхити. Ӕ нисан 100 гектари уогӕй идарддӕр дӕр рахъӕртун кӕндзӕнӕй кӕронмӕ ӕ куст.

Сӕ хуарз багъуди фӕрци зумӕгеуатӕй хуарз уавӕри рацудӕнцӕ ИП «Соскиев»-и фӕззегӕндӕ мӕнӕутӕ дӕр. Зӕрдӕдарӕн ес, ӕма кустӕн куддӕр рабӕзза рӕстӕг, уотӕ зӕнхкосгути хъазауат архайд фадуат ке ратдзӕнӕй къуӕрей ӕмгъудмӕ, райони хумзӕнхитӕй еунӕг гектар дӕр ӕнӕ арӕзт нӕ баизайунӕн.

       - Олег, арфӕ дин кӕнӕн нӕ радзубандийӕн нин рӕстӕг ке исагкаг кодтай, уой фӕдбӕл. Хуцау ба ӕнхусгӕнӕг уӕд зӕнхкосӕгӕн ӕ зин, фал нӕ еугурей дӕр ӕхсицгӕ гъӕугӕ кустӕн!

                                          Чихтисти Р.