Комкоммæ дзубанди
Нимайгæ бæнттæ ма нæ хецæн кæнуй, нæ бæсти медæгæ ци æвзурститæ цæудзæнæй 17-19 сентябри Паддзахадон Думæмæ, уонæй. Куд зонæн, уотемæй гъæуй Уæрæсей цæргути бавдесун бæрнон цæстингас, цæмæй идарддæри фондз анзей медæгæ равзурст депутаттæ се ΄ргом нигки хуæздæр раздахонцæ адæми цардиуаги домæнтæ фæххуæздæр кæнунмæ.
Гъеуæхæн гъæугæ фарстай туххæй, цæмæй æвзурститæ уагбæл æма æнæкъулумпитæй рацæуонцæ, алке гъæлæс равард дæр бунати уа, уобæл комкоммæ радзубанди кæнуни туххæй райони ветеранти Совети сæрдар Бетрозти Майрæн дæр 1-аг сентябри фæссидтæй, гъæути медæгæ Советæн ци райдайæн организацитæ ес, уони сæргълæугутæ æма активондæр иуæнгтæмæ, еуæй-еу учрежденити разамонгутæмæ, æма син фембæлд исаразта райони Территориалон æвзарæн къамиси сæргълæууæг Тускъати Эльвири хæццæ.
Æмбурдæн æ куст райдæди агъоммæ минут æдзæмæй балæудæй ирд æрцудæй, нæ райони ма кæци фæстаг тугъдон ветеран фæгъгъудæй не ΄хсæнæй, еци Толдзгуни гъæугкаг Хæмицати Хадзирæти æма Беслæни теракти 2004 анзи байсæфæг сувæллæнттæ, асæ адæми рохс нæмттæ.
Идарддæр Бетрози - фурт балæдæрун кодта абони комкоммæ дзубандий сæйраг медис æма загъта, зæгъгæ, аци бамбурд номхундæй ескæбæл исгъæлæс кæнуни туххæй, е агитацион куст бакæнуни туххæй нæй, фал æй, цæмæй нури вазугкин рæстæги махæй алкедæр æ граждайнаг ихæс исæнхæст кæна, фæрсæрдиги кæсæг ма уа, фал уа æвзурстити архайæг. «Куд хестæр æма курухондæр адæм, уотæ кæстæртæн дæр гъæуама æвдесæн дæнцæ. Ка ке нимаиуй агкаг депутатбæл, е ба алкæмæн æй æхе гъуддаг», - загъта Бетрози - фурт æма дзурди барæ равардта Эльвирæн.
Территориалон æвзарæн къамиси сæргълæууæг комкоммæ бацудæй фарстамæ æма радзурдта раздæри æвзурститæ æма нуригкæнттæ кæрæдземæ хъæбæр ке райдард æнцæ, ке си фæззиндтæй берæ æййивддзийнæдтæ. «Мæнæ нуртæгки æгас дуйнейбæл ци нез рапарахат æй, е дæр нæбæл ниууагъта æ устур фæд. Уомæ гæсгæ, цæмæй незихатт еуемæй иннебæл ма æфтуйа, уомæй гъудигонд æрцудæй æвзурститæ 3 боней медæгæ искæнун, хестæр æма сæйгæ адæмтæмæ хæдзæрдтæмæ цæун, фадуатмæ гæсгæ ба, курдиадæ бадæтгæй, раздæр, 8 сентябрæй фæстæмæ гъæлæс кæнуни барæ радтун æма æндæртæ», - дзурдта Эльвирæ хестæр адæмæн æвзурстити уавæрти туххæй, нæ бæстæмæ ке ес берæ хицæгæнгутæ, ке фæндуй адæми исхæлхъой кæнун, уæдта ке финсунцæ интернетти «социалон сеть»- тæ ке хонæн уоми ардауæн дзубандитæ, кæцитæн сæ фулдæр проценттæ раст ке нæ фæуунцæ æма сæмæ игъосгæ ке нæй. Куд бæрнон кустуати косæг, уотæ фæссидтæй, цæмæй æвзурстити рæстæги æвдист æрцæуа активондзийнадæ, кенæ имæ æ хæдзарæмæ къамиси иуæнгтæ æрцæугæй, кенæ ци участокмæ хауй, уордæмæ æрцæугæй радта æ гъæлæс, æхе ке фæндуй, æрмæст еци къæндидатбæл.
Эльвирæ ма балæдæрун кодта, нуридæгæн дæр устур куст ке цæуй ТИК – ки, уæдта участокти косгути æрдæги адæми æнæнездзийнадæ багъæуай кæнуни туххæй. Райдайæ маскъитæ æма дезинфекци кæнæн бауæргъæдтæй алцидæр лæвæрд æрцæудзæнæй къамисти бунæттæмæ. Загъта ма мах райони ма дууæ округеми – Чиколай 10-аги ке цæудзæнæй æвзурст гъæуи администраций минæвæрдти æмбурди еу депутат, уæдта Гæлиати гъæуи администраций сæргълæууæг æма æ минæвæрдти Собраний æмбурдмæ депутаттæ. Æ радзубандий кæронбæттæни ба Эльвирæ раарфæ кодта хестæр адæмæн æма ма еума хатт ракурдта бæрнондзийнадæ бавдесун æвзурстити рæстæги.
Эльвири радзубандий фæдбæл сæ гъудитæ загътонцæ Гæтцити Валерик, Хъамболти Изра, Хамихъоти Александр, Керчелати Ким, райони социалон æнхусади комплексон Центри сæргълæууæг Мудойти Эммæ, Эльвирæ ба ма æнхæст дзуæппитæ равардта æмбурди архайгути аллихузон фарстатæбæл.
Уавæрæй испайда кæнгæй ма Бетрози - фурт Совети иуæнгтæн сæ зæрди æрæфтудта раздæри æнзтæй игъаугидæр бабæй, куд нæ республики еугур скъолати, уотæ мах райони дæр ахури райдайæн ке уодзæнæй 4 сентябри, æма ракурдта, цæмæй Совети иуæнгтæ исцитгин кæнонцæ еци бон æма фæткæ куд байзадæй, уотæ искæнонцæ «Урок мужества» алли къласи дæр.
Идарддæр ма Совети сæргълæууæг радзурдта æхсæнадон æзмæлдæн ма æ нисани ке ес анзи кæронмæ берæ куст бакæнун, ке зæгъун æй гъæуй, æ еузæрдиуон иуæнгтæбæл устур зæрдæ даргæй. Зæгъæн – исбæрæг кæнун «День героя», «День неизвестного солдата», «79 лет освобождения Ирафского района от немецких захватчиков» ма уотæ идарддæр. Загъта ма, ветеранти Совет æ куст ке хæссуй æнгом бастæй райони администраций разамунди хæццæ, æ усхъæ бадард алкæддæр ке æнкъаруй æхебæл æма, уомæ гæсгæ ба, æвзурститæ цæмæй æнæкъулумпитæй рацæуонцæ, уомæй ке гъæудзæнæй ветеранти Совети иуæнгти дæр сæ фарсмæ балæуун, бакосун адæми хæццæ.
Чихтисти Р.
Хузисти: ветеранти Совети æмбурди.
