Номерæн

 

Цард... Догъон бæхау уайуй. Райгурæн бонæй мæлæти бонмæ раст еу фæккастæй иннемæ. Адæймаг цæрунæй нæма бафсæдуй йе мгъæуккæгтæ, хеуæнтти хæццæ, æ зæрди ма фæууй цидæр бæллецтæ, цидæр хуарздзийнæдтæ, фал сау мæлæт ба æ базуртæ рауадзуй æма æй æ дзæмбутæй ратонуй се ´хсæнæй.

   Мæлæт ке нæ хезуй, уæхæн еу дæр нæййес. Алкедæр ни хезуй йе носон бунатмæ фæндагбæл ранæхстæруни бон. Ма цæмæй рæсугъд имисуйнæгтæ ниууадзай дæ фæсте, уобæл архайун гъæуй алли уодгоймаги дæр. Уобæл йе гас цард сагъæс кодта Гуæцæлти – Лагкути Тазей кизгæ Светæ.

Райгурдæй Светæ 15 январи 1945 анзи. 1967 анзи бацудæй Назрани гъæууон-хæдзарадон техникуммæ ма райста ветеринарон фельдшери дæсниадæ. 1970 анзи райдæдта косун Ирæфи райони ветеринарон станций ветеринарон санитарæй, 1988 анзи ба айивд æрцудæй æхе дæсниадæбæл ветеринарон фельдшерæй. Еци еу рауæн фæккуста 2021 анзи уæнгæ.

Гуæцæлти хæдзарæмæ Славикки цардæмбалæн ку æркувта, еци бонæй фæстæмæ æхе бауарзун кодта æрмæст бийнонтæн нæ, фал хæстæгутæн дæр. Куд хæдзари æфсийнæ, уотæ ин æ раз неке райстайдæ. Разуайæн кодта цæргæбонти. Сатанай хузæн бæркадкъох æма федар зунди хецауæй æй зудтонцæ синхбæстæ, йе ´мкосгутæ, зонгитæ. Хестæрæн æгъдаудæттæг, кæстæрæн зундамонæг адтæй аци силгоймаг, рæсугъд уоди хецау. Ци адæми æхсæн цардæй æма куста, етæ æй зудтонцæ куд фæлмæн, адæмуарзон, лæмбунæг æма хуарз косæг.

Ездон, æнæ еу хæрандзийнадæ, цæстуарзон, хуæрзтог, лæгигъæдгун, ескæмæн хуарзи бацæунбæл архайдта Светæ. Цал æма цал хæдзаремæй ракастæй æгомуг фонси æнæнездзийнади фæдбæл. Еске зинбæл ка зин кодта алкæддæр, еске ристæй ка ристæй, еске цийнæ ба хæстæг ка иста æ зæрдæмæ, уæхæн адæймагæй æй зудтонцæ гъæубæстæ.

Æ цардæмбал ку рахецæн æй цардæй, уæд байзадæй хуæрз еунæгæй. Не Скæнæг Хуцау ин уæхæн хуарздзийнадæ нæ исаккаг кодта, куд бæдоли адæ балæдæрун. Свети аккаг дзурдтæ иссерун зин æй, цифæнди ку фæдздзорæн, уæддæр. Кай зудта, уонæй ибæл ке зæрдæ нæ нирристæй, уæхæн нæййес æвæдзи.

     Мæрдти бæсти дзенет дæ хай, Светæ. Дæ рохс цæсгом, дæ рæсугъд зæрдæ некæд уодзæнцæ иронх, ка дæ зудта, ке´хсæн цардтæ, уонæй.

Ирæфи райони ветстанций коллектив.