Номерæн

 

    Лæгæн фæууй еунæг царди барæ æма æй рæсугъдæй бацæрунбæл фæййархайуй. Алли бон дæр си йе ʹвæрæнтæмæ архайуй ести хуарздзийнадæ бахæссунбæл. Куд цæугæ фæццæунцæ æ æнзтæ, уотæ æхецæн æривæруй цидæр фæндонтæ æма нисæнттæ, цæмæдæрти фæббæллуй, исбæрæг кæнуй æ идарддæри царди фæндæгтæ. Ма сæбæл цæун райдайуй, æхсæнади медæгæ аккаг бунат нийахæссунбæл фæйархайуй. Еуемæн бантæсуй искæнун æхецæн устурдæр кадæ, адæми арфæй хайгин исуй æ рæсугъд уоди конд æма фæлмæн зæрди фæрци. Уæхæн адæм сæ фæсте дæр ниууадзунцæ рæсугъд имисуйнæгтæ.

   Уотæ фæззæгъунцæ: «Хуарз лæг æрмæст æ бийнонтæн нæ рамæлуй, фал æгас гъæубæстæн дæр». Æнæмæнгæ, аци загъд комкоммæ хауй Хуасдзаути Барис Хадзисмели фуртмæ. Адæмæн хуæрзгæнæг, муггагæн номгæнæг, зæрдæ æма зунди бæркадæй æнхæст. А дуйнебæл бацæрунæн ин берæ лæвæрд не ΄рцудæй. Æ лæги кари бацудæй Барис, уотемæй фæххецæн æй дзилли æхсæнæй. Æфсади рæнгъити райгурæн бæсти размæ йе ʹхæс рахецæн кæнуни фæсте исахур кодта Душанбей Политехникон институтти автотранспортти фæндæгтæ æма хедтæ аразæги дæсниадæбæл. Фондз анзи бакуста Куляби. Ниууагъта си æ фæсте рæсугъд фæд.

Фал æ зæрдæ дзурдта æ райгурæн гъæумæ æма иссудæй æ фиди бундормæ. 1968 анзæй райдæдта фæллойнæ кæнун Ирæфи райони фæндæгтæ цалцæггæнæн – аразæн управлений фæндæгтæбæл автотранспортти æдасдзийнади инженерæй. Хаста æ зингæ байвæрд кусти медæги. Ци адæми хæццæ куста æма цардæй, уони зæрдити ниууагъта рохс фæд, йе´нæхийнæ уод æма арæхстгин кусти фæрци ин алкæддæр адтæй кадæ. Йе усхъæ бадарунмæ алкæддæр адтæй цæттæ. 

 Алке зинбæл дæр ристæй Барис зæрдæбунæй, ескæмæн хуарзи бацæунбæл архайдта. Æ хуæрзтогдзийнадæ, æ уæлдай уоди фæрци алкæмæн дæр адтæй æнсувæри хузæн. Æнгом баста æхе адæмбæл. Сувæллонæй æ зæрдæ рист ке адтæй, авæдзи, уой тухæй дæр. 1947 анзи æ дууæ æнсувæри синхон биццеути хæццæ гъазгæй иссердтонцæ минæ æма бастъалдæнцæ. Байзадæй ма ин еунæг хуæрæ, кæци цардæй идард, Таджикистани. Уоми бийнонтæ иссæй æма, æ цардæй ку рахецæн æй, уæд ивæрд дæр æрцудæй уоми. Уæхæн гъуддæгтæ Бариси зæрди масти къубулæнттæй лæудтæнцæ, кæд сæ æвдесгæ нæ кодта, уæддæр.

   Барис устур нифс адтæй æ бийнонтæн: æ цардæмбал Махъоти Сулеймани кизгæ Фатимæн, еунæг кизгæ Мæдинæ æма уой зæнæг Заурбег æма Заремæн. Етæ адтæнцæ æ зæрдфæллæууæн.   

Берæ рæсугъд фæндтæ адтæй æ зæрди, фал æнæхатир разиндтæй мæлæт аци хатт дæр. Цæйбæрцæ дæр ку дзорæн Бариси тухæй, уæддæр нæ зæгъуйнæгтæн кæрон нæ уодзæй, æвæдзи. Æ бийнонтæ, æ хеуæнттæ дзиназгæ ниууагъта. Алли дуари гуппмæ, сæ зин феронх уогæй, ракæсæ - ракæсæ кæнунцæ, фал адзалæн мадзал нæййес.

     Зæрдхъурмæй æй имисунцæ кай зудта, етæ. Æма куд нæ. Кадæй уæлдай, æ фæсте лæгъуз гъуддагæй неци ниууагъта. Фал нæ бон «рохсаг» зæгъунæй уæлдай нецибал æй. Æносмæ нæ зæрдити байзайдзæнæ, Барис, уарзонæй, дæ ном имисуйнагæй. Дуйне ʹСкæнæгæй ба корæг ан, цæмæй дæ фарнæ мæрдтæмæ дæ хæццæ ма фæххæссай, фал æй дæ бийнонтæн, муггагæн ниууадзай.

     Хуасдзаути бийнонтæ арфæ кæнунцæ, сæ фарсмæ ка балæудтæй, ма син сæ зинæй хай ка райста, уонæн. Сæ хæдзæртти æнафони зиндзийнадæ макæд фæййинæнтæ. Игъосун кæнунцæ, Бариси 40 бони ке уодзæй 11 ноябри Сталини номбæл гъæунги, №73. 

Бабочити Э.