Сурх-Дигори 90 анзей юбилеййи кадæн

Дзабайти Фузӕ

«Сурх-Дигори фӕсевӕд

сӕ минкъиййӕй се´стурмӕ

Ахурмӕ ку тундзунцӕ, гъей.

Сурх-Дигори адӕм

кӕстӕрӕй, хестӕрӕй

Кустуарзонӕй ку цӕрунцӕ, гъей».

Сурх-Дигори гъӕу ӕй тӕккӕ ӕригондӕр гъӕу Цӕгат Иристони гъӕутӕй. Аци гъӕу цудӕй берӕ хъургъахъхъ нӕдтӕбӕл, фал сӕбӕл фӕццудӕй кадӕ-радӕй.

1927 анзи райдӕдтонцӕ аразун Дигори агрокомбинат, кӕций медӕги хъӕбӕр хъазауатонӕй архайдтонцӕ Цагъати Дзабола, Арсӕгти Горга, Бузойти Тъох, Малити Деко, Тауитти Тӕкъа. Еци комбинати бундорбӕл арӕзт ӕрцудӕй Сурх-Дигори гъӕу. Е адтӕй 1929 анзи.

1930-1931 ӕнзти ардӕмӕ адӕм лигъдӕнцӕ Дигоргоми хуӕнхбӕстӕй. Фиццаг рӕстӕги цӕрунмӕ кодтонцӕ уосӕнгтӕ, уӕдта сахъаралий фӕрсти хӕццӕ хӕдзӕрттӕ. Уой фӕсте ба райдӕдтонцӕ, ке куд бон адтӕй, уотӕ хӕдзӕрттӕ аразун. Адӕм кустонцӕ хъӕбӕр зӕрдиуагонӕй, бацудӕнцӕ коллективон хӕдзарадӕмӕ. Арӕзт ӕрцудӕй дууӕ колхози: колхоз «Хонх» ӕма колхоз «Демиховский»-йи номбӕл. Уой фӕсте сӕ баеу кодтонцӕ ма си рауадӕй еу колхоз, исӕйхудтонцӕ Гетъой - фурти номбӕл, кӕци адтӕй граждайнаг тугъди номдзуд хъӕбатӕр. Гъӕуи арӕзтади архайдтонцӕ Малити Дзега, Темирати Николай, Цакъоти Слангерий, Гобети Будзу, Гобети Заурбек, Гъӕргинти Габле, Гасинти Кудзий, Хайманти Хъӕрӕсе, Хайманти Сергей, Хъодзасти Хъасболат, Дзабайти Къостан, Текъойти Гӕбучи ӕма ӕндæртæ.

Аразун райдӕдтонцӕ скъола, кӕци косун райдӕдта 1936 анзи. Аци скъола аразунбӕл дӕр Сурх-Дигори адӕм адтӕнцӕ хъиамӕтгун: Алагирӕй ластонцӕ агори, гъӕдӕй гъӕдӕрмӕг, кӕций фастонцӕ Хусфӕрӕки хирхфадӕн заводи. Скъолай фиццаг директор Цӕллати Василий, ӕ фиццаг ахургӕнгутӕ ба адтӕнцӕ: Гобети Батарбек, Малити Хуасдзау, Годзойти Саухал, Дзабайти Геуӕрги, Дзабайти Лизӕ, Гӕмаонти Хадзирӕт, Гӕмаонти Дзафи. Фиццаг рауагъд скъолайӕн адтӕй 1938-1939 ахури анзи. Колхозонтӕ дӕр хъазауатон куст кодтонцӕ колхози еу талингӕй иннӕ талингӕмӕ. Сӕ цардмӕ зӕрдӕ рохс кодта, сӕхебӕл цийнӕ кодтонцӕ.

Фал, фал… Немуцаг цъаммар фашисттӕ 1941 анзи ӕрбалӕбурдтонцӕ нӕ бӕстӕмӕ. Сурх-Дигорӕмӕ ба ӕрбахъӕрттӕнцӕ 1942 анзи октябри мӕйи. Ӕнамонд бӕнттӕ искодта адӕмбӕл. Нӕ гъӕуи ма байзадӕнцӕ зӕрӕндтӕ, маддӕлтӕ ӕма сувӕллӕнттӕ. Тугъдмӕ нӕ гъӕуӕй рандӕй 750 адӕймаги. Нӕ гъӕуккӕгтӕ тугъди сӕхе равдистонцӕ хъӕбатӕрӕй, гъулӕггагӕн, уонӕй се´мбес тугъди будури фӕммардӕнцӕ.

 Тугъди уӕзӕ ӕрӕнцадӕй адӕмбӕл. Гъӕуи гъезӕмӕрдтӕ кодтонцӕ седзӕргӕстӕ сӕ сувӕллӕнтти хӕццӕ, зӕрӕндтӕ, бавналдтонцӕ етӕ федар усхъӕ-фӕсонтӕй сӕ ихӕлд хӕдзӕрттӕ аразунбӕл, колхози будурти хъазауатонӕй кустонцӕ, сӕ авдӕнти хӕццӕ рандӕуиуонцӕ будурмӕ ӕхсӕдунмӕ. Нӕ колхози нецибал адтӕй, нӕдӕр гъӕууон-хӕдзарадон техникӕ, галтӕ дӕр нӕбал, сӕ ихӕлд хӕдзӕрттӕ, сӕ ревӕд скъӕттӕмӕ кастӕнцӕ, фонс дӕр немуц ниццагътонцӕ.

Седзӕргӕстӕ будури куститӕ кодтонцӕ къохӕй, галтӕбӕл хумӕ кодтонцӕ, мӕнӕуӕ дӕр, нартихуар дӕр къохӕй байтауиуонцӕ, картоф дӕр  аразтонцӕ къохӕй. Ӕхсӕдгӕ дӕр кодтонцӕ къӕпетӕй, нартихуар тудтонцӕ-ӕфснайдтонцӕ къохӕй, картоф дӕр уотӕ. Мӕнӕуӕ колхозонтӕ карстонцӕ ӕхсирфӕй, тӕвди зин куст адтӕй, мӕнӕуӕ зӕнхӕмӕ ӕгъзӕлгӕ кодта. Нӕ маддӕлтӕ сӕумӕ раги рандӕуиуонцӕ ӕма ӕмбес бонмӕ ракӕрдиуонцӕ еугай бӕкъуӕлтӕ (бӕкъуӕли адтӕй инсӕй игуӕси). Уой фӕсте ба карст игуӕстӕй-еу исаразиуонцӕ цъинатӕ ӕма сӕ инайӕн машинӕй ӕхсӕвӕ инайӕ кодтонцӕ. Уотемӕй мӕнӕуӕ ластонцӕ галтӕбӕл колхози амбармӕ.

Галтӕбӕл кустонцӕ 13-15 анздзуд биццеутӕ. Етӕ адтӕнцӕ Гобети Савелий, Дзабайти Маркс, Гобети Радек, Бозурти Лазӕр, Бузойти Эдуард, Будайти Василий, Зӕгӕлти Герцен, Золойти Сергей, Кацанти Фидар, Хайманти Петкӕ, Секъинати Алешӕ, Бичегкути Геуӕрги. Силгоймаг седзӕргӕс уоститӕ дӕр галтӕбӕл хумӕ кодтонцӕ. Дзабайти Мерет радзоридӕ: «Ӕз ӕма Гасинти Сафеткайӕн адтӕй дууӕ гали, сӕ фӕсте ба готон федаргондӕй, фӕстегӕй готонбӕл хуӕстӕн ӕз, Сафетка ба разӕй галти сӕрбонсбӕл, уотемӕй цудӕй размӕ, мӕ фурт Маркс ба дзурдта галтӕмӕ, ес ӕ къохи уотемӕй. Еуӕй-еу хатт уотӕ бафӕллайанӕ, ӕма Сафетка размӕ бахауидӕ. Го

тон бӕласи бундзӕфхадбӕл ку исбуцӕу уидӕ, уӕд галтӕ ӕрлӕууиуонцӕ, тӕрсун байдаинӕ, Сафеткай галтӕ нимпурстайуонцӕ, уомӕй. Мӕ еунӕг фуртӕн дӕр тарстӕн, уотемӕй готонбӕл туххӕй хуӕстӕн, ме´мкосгутӕмӕ дӕр кастӕн».

Колхози сӕрдартӕй тугъдӕй фӕстӕмӕ кустонцӕ Гадати Гӕлӕу, Текъити Хадзимӕт, Мӕрзойти Сергей, Малити Заурбек, Гобети Салат, Сарахъати Владимир, Цакъоти Хъанамат, Хайманти Гермӕн, Гӕлити Геуӕрги, Бекъурти Коля, Сарахъати Максим, Бӕлоти Мурат, Габети Василий, Золойти Эльбрус, Золойти Артур. Аци сӕрдартӕ, сӕхебӕл нӕ ауӕрдгӕй, зӕрдиуагӕй фӕккустонцӕ. Гетъой - фурти номбӕл колхоз алкӕддӕр цудӕй раззаг колхозти нимӕдзи.

Адӕм нӕ иронх кӕнунцӕ 1946 анз, еци анз адтӕй сухӕ анз, тиллӕг не´рзадӕй, ӕма нӕбӕл искодта ӕстонг анз. Мӕгур маддӕлтӕ куд раервӕзун кодтонцӕ сӕ сувӕллӕнтти! Мах хуардтан пуруса, цъӕхула, дзиликъу, монт, зӕнкӕ, хӕпси къах, цъеудзӕхӕра ӕма ӕндӕртӕ. Еци кӕрдӕгутӕй фунхтан «дзӕхӕрай фунх». Адӕмӕн сӕ уӕгӕ нӕ бамардӕй, гъӕйтт гӕнгӕ кустонцӕ, хъиамӕт кодтонцӕ. Гъӕуи лӕгтӕ берӕ нӕбал адтӕй, косгӕ ка кодтайдӕ, уӕхӕнттӕй нӕ хъӕрдтан. Лӕгти раййивтонцӕ силгоймӕгтӕ – гъӕуккаг кизгуттӕ: Гобети-Хъамболти Гуӕса, Хӕмицати-Къесати Навескӕ, Перисати Мӕдийнӕ, Тъурити Гӕмиса, Секъинати Уарзетӕ, Секъинати Насира, Чихтисти Зӕлда. Аци кизгуттӕ исбадтӕнцӕ тракторбӕл ӕма хумӕ кодтонцӕ колхози будуртӕ.

(Уодзæнæй ма)