Номерæн

 

Лæгæн фæууй еунæг цардибарæ æма æй рæсугъдæй бацæрунбæл фæййархайуй. Алли бон дæр си йеʹвæрæнтæмæ архайуй ести хуарздзийнадæ бахæссунбæл. Куд цæугæ фæццæунцæ æ æнзтæ, уотæ æхецæн æривæруй цидæр фæндонтæ æма нисæнттæ, цæмæдæрти фæббæллуй, исбæрæг кæнуй æ идарддæри царди фæндæгтæ. Уæхæн адæм сæ фæсте дæр ниууадзунцæ рæсугъд имисуйнæгтæ. Уонæмæ хаст цæуй Батоти Бекери фурт Сосланбег дæр.

Райгурдæй 1930 анзи Хæзнидони гъæуи. Скъола каст фæууни фæсте исахур кодта механизаторбæл. Берæ æнзти дæргъи совхози фæккуста трактортæбæл, бадтæй комбайнбæл дæр. Фæстæдæр ба куста стройки. Уогæ, фæллойнæ кæнун райдæдта сувæллонæй. Тугъди рæстæги къахта окъоппитæ, колхози будурти куста, еу загъдæй, тугъди будури ка адтæй, уонæн фæсфронт архайгути хæццæ æ анхуси хай хаста.   

   Æхецæн цардæмбалæн равзурста Сосранти Оляй, кæций хæццæ кæрæдзей лæдæргæй, кæрæдземæн аргъ кæнгæй, фæццардæй 63 анзи. Исхастонцæ 5 зæнæги. Æривардтонцæ сæ раст надбæл.  Æхе амондгун худта Сослæнбег, æ тумугъ бийнонти цæрайæй цардæй. Фал ин цардмондагæй адзал æ хъурæй фелваста æ дууæ фурти. Славик æрвист æрцудæй Афганистани тугъдмæ. Уордигæй ма тухмадзæлттæй æ хæдзарæ иссердта, фал цубур рæстæгмæ йе носон дуйнемæ бацудæй. Иннæ фурт Изаркæ æверхъауæй фæммардæй. Йе ʹгас цард Сослæнбег æ хурфи фæффунхтæй йе ʹдзард фуртти мæстæй, æ цæстисуг нæбал иссорæй. Бæдоли зин къæхтæ къуæруй, зæгъгæ, хумæтæги нæ фæззæгъунцæ. Фал уæддæр адæми æхсæн ба æхе æвдиста игъæлдзæгæй.

    Йе ʹгъдау, æ уæззау зундæй хай кодта кæстæртæн. Алке зинбæл дæр ристæй Сослæнбег зæрдæбунæй, ескæмæн хуарзи бацæунбæл архайдта. Ци адæми æхсæн куста, уоми дæр ин йе´нæхийнæ уод, æ хæларзæрдæ, адæмуарзондзийнадæ æма арæхстгин кусти фæрци алкæддæр адтæй кадæ. Йе усхъæ бадарунмæ алкæддæр адтæй цæттæ.

   Дууинсæй бони рацудæй, кæдæй йе ʹносон бунатмæ бацудæй хъиамæтгун, æгъдаугин фидæ. Фал æнæисусгæ цæстисуг æма æнæкæрон зæрдирист ниууагъта æ цардæмбал Оляйæн, æ зæнæг Альберт, Олег æма Альбинæн, æ кизги хузæн ке уарзта, адгинæй ке хæццæ фæццардæй, еци киндзæ Людæн, æ зæнæги зæнæгæн, кæцитæн адтæй фæлмæн баба. Нæ ерунцæ сæхецæн бунат хори бунмæ.  Сæ зæрдхъурмæдзийнадæн кæрон нæййес. Еунæг бон дæр сæ зæрдæй нæ цох кæнуй уарзон цардæмбал, фæлмæн фидæ. Нæй иронх кæнунцæ хеуæнттæ æма æмбæлттæ. Фæкъкъуру æнцæ синхи цæргутæ дæр.

Адзалæн мадзал нæййес, фæззæгъунцæ. Мæрдтæй хуæрзауодæн кæнæд Сослæнбег æ бийнонтæбæл, æндæр нæ бон неци зæгъун бал æй.  Рæсугъд зæрдæ нæ мæлуй, фæззæгъунцæ, фал дуйней фарнæбæл бафтуйуй, ма æ зæрдæ цирагъдарæй байзайæд муггагмæ. Некæд уодзæй иронх, каʹй зудта, ке´хсæн цардæй, уонæй.

Батоти бийнонтæ ба хъæбæр арфæ кæнунцæ æрцæуæг адæмæн, синхбæстæн, гъæубæстæн, хеуæнттæн, сæ зинæй син хай кадæр райста, уонæн. Сæ хæдзæртти хуарздзийнæдтæ инæнтæ, æнафони зинæй сæ Хуцау хезæд. Æма игъосун кæнунцæ, Баботи Сослæнбеги 40 бони ке уодзæй сабати, 25 сентябри, Хæзнидони гъæуи Партизани гъæунги 30 хæдзари.

Бабочити Этери