Адæмон зеутæ

               

     Рацудæй æртæ мæемæ хæстæгутæ, кæдæй Чиколай администраций сæргълæууæг Саккати Артури фæндонбахастмæ гæсгæ гъæуæмбурди унаффæ хаст æрцудæй Чиколай астæу «зæронд уæлмæрдæ» ке хонæн, уой бафснайун, нæ фиддæлти рæсугъд æгъдау æма фæткæмæ гæсгæ аци цитгин бунат, зæгъун æнгъезуй, алли бийнонтæн дæр си кæмæн ес хеуæнттæ æма хæстæгути циртитæ, уой фæлгонцадæ уагбæл æривæрун.

   Ци куст си бакæнун гъæуй, уой ба, æвæдзи, амонун некæмæн гъæуй – дæсгай æма дæсгай æнзти медæгæ ами ци бæлæстæ, къотæртæ æма хъамил фæййирæзтæй сæхе фæндон, кæсæг æма цæуæг ци рагон циртитæмæ нæбал адтæй, уони фалдзостæ, еци фæзуæттæ æрцудæнцæ зæйуатмæ, бацæуæн нæбал адтæй хурфи арфи райзайæг хеуæнттти æригондæр циртитæмæ дæр. Уомæ гæсгæ ба, уæлдæр куд загътон, уотæ хестæр адæмти активондзийнадæ, уæдта нæ дзæбæх фæсевæди хъæппæрес æма хъауритæй нуридæгæн арæзт æрцудæй къуар устур зеуи, къуæрей алли уолæфгæ бæндти, рæстæг косунмæ кæддæр фæббæззуй, уæд.

   Фадуат æма рæстæгмæ гæсгæ си æнæхийнæй сæ хъиамæти хай бахæссунцæ райони æма гъæуи администрацити сæргълæугутæ Лагкути Омар æма Саккати Артур, кæцитæ арфæ кæнунцæ гъæуи еуæй-еу муггæгти хестæртæн, кæцитæ исаразунцæ фæдздзурдтитæ сæ фæсевæди кустгъонтæмæ, раст разамунд син дæтгæй. «Сæ цæрæнбон берæ еци хестæртæн æма зæрдæрохс уæнтæ сæ кæстæртæй», - арфæ син кæнунцæ зæрдибунæй Омар æма Артур гъæуи цæргути номæй дæр.

   Фал, алли гъуддаги дæр æнæ ести гъæуагæдзийнадæ некæд фæууй. Уотæ бабæй уайуй ами дæр – алли хатт дæр зеутæмæ цæунцæ еци еу адæмтæ, бакосунцæ æнæхийнæй, кæд уоййасæ бæлæстæ, ка исбæрзонд æй, еци къотæртæ æма арф хъамили тергадийæй, циртитæ нæ багъигæдаргæй ракалун уæззаугомау куст фæууй, уæддæр. Уæдта ма зæгъдзинан уой дæр æма ке не ΄нгъезуй уæхæн рæуагæ искæнун дæр, гъома – «нæй базудтон», уой туххæн, æма алли къуæрей райдайæни дæр е райони газет «Ирæф»-и, кенæ «социалон сеть» - ти фæууй игъосункæнуйнæгтæ, фæстаг рæстæги ба ма идардмæ игъусæг рупорæй, машийнæй еугур гъæунгтæбæл зелгæй, сидт цæуй еугур гъæуи цæргутæмæ дæр зеумæ рацæуни курдиадæ.

   Уомæ гæсгæ ба ма, еума хатт, финсæн нæ хецауди, хестæрти номæй фæссидт кустгъон адæнмæ: «Ес ма хъæбæр берæ бакосуйнаг аци уæлмæрдти, ка΄й зонуй æма ма си иннæ анзи фагæ куст дæр ес. Уомæ гæсгæ ба ес устур курдиадæ - не ΄гъдау, не ΄хсæн ка нæбал æй, еци бийнойнæгти ка цитгин кæнуй, æхемæ ихæсæн ка есуй нæ рагдæр фиддæлтæн цитæ кæнун æма æ бон кæмæн æй бакосун, ма фæззийнадæ кæнтæ, уæ хъиамæти хай бахæссетæ аци æносон бунат исцитгин кæнуни кустмæ».

   Саккай - фурт куд зæгъуй, уотемæй се ΄нхуси хай алкæддæр бахæссунцæ техники æгъдауæй беретæ, машийнæ уа, е трактори хæццæ рацæугæй, ци бугъæ æмбурд кæнуй амити, уони раласунмæ, калд æрцæуæг бæлæстæ, къотæрти къалеутæбæл бандзарунмæ. Кæд абони алке ном сæрмагондæй нæ финсдзинан, уæддæр, кадæр е ΄нхуси хай хæссуй аци кустити медæгæ, уонæн хъæбæр арфæ кæнунцæ нæ райони æма гъæуи хецауадæ. Сæ цæрæнбон берæ уæд! Хуцау си исарази уæд! Æма ма еума хатт дæр корæг æнцæ зæгъгæй: «Хъæбæр берæ куст ма ес аци рауæн, «халæ халæн æнхус æй»,- зæгъуй нæхемæ дигорон æмбесонд, корæн – фæккæсетæ ке бон æй, цæмæй ескæд мах кæстæртæ дæр зононцæ адæймаги æносон бунат цитгин æма рæсугъд дарун».

 Чихтисти Р.

Хузистти: Чиколай уæлмæрдти зеуи рæстæги.