Номерæн

 

Лæгæн фæууй еунæг царди барæ æма æй рæсугъдæй бацæрунбæл фæййархайуй. Алли бон дæр си йе ʹвæрæнтæмæ архайуй ести хуарздзийнадæ бахæссунбæл. Куд цæугæ фæццæунцæ æ æнзтæ, уотæ æхецæн æривæруй цидæр фæндонтæ æма нисæнттæ, цæмæдæрти фæббæллуй, исбæрæг кæнуй æ идарддæри царди фæндæгтæ. Ма сæбæл цæун райдайуй, æхсæнади медæгæ аккаг бунат нийахæссунбæл фæййархайуй. Еуемæн бантæсуй искæнун æхецæн устурдæр кадæ, адæми арфæй хайгин исуй æ рæсугъд уоди конд æма фæлмæн зæрди фæрци. Уæхæн адæм сæ фæсте дæр ниууадзунцæ рæсугъд имисуйнæгтæ. Еци адæнмæ хаст цудæй Мурити Славик дæр.

         Мурити Юркини фурт Славик райгурдæй 1975 анзи 13 августи. Æ сувæллонæй исбайлæгъ уни уæнгæ адтæй бафæнзуйнаг. Скъола каст фæууни фæсте рандæй Сурх Æфсади рæнгъитæмæ æма бафиста Райгурæн бæсти размæ æ ихæс.

    Ку исæздахтæй æ райгурæн гъæу Фæснæлмæ, уомæй фæстæмæ еунæг бон дæр æнæ косгæ нæ адтæй. Еунæг кустмæ дæр зийнадæ нæ кодта. Гъæуккагмæ фæккæсунмæ дæр ин æ раз неке иста. Славикки адæм зудтонцæ хæларзæрдæ, адæмуарзонæй æма ин кадæ кодтонцæ. Еске зинбæл зин кодта, еске ристæй - ристæй, еске цийнæбæл ба цийнæ кодта, адтæй игъæлдзæг. Йе ʹгъдау, æ уæззау зундæй хай кодта кæстæртæн.

    21 августи дууинсæй бони  рацæудзæй, кæдæй нæ астæуæй фæгъгъудæй Славик. Фал æнæисусгæ цæстисуг æма æнæкæрон зæрди рист ниууагъта æ ниййерæг мадæ Цæллати Лизæ, цардæмбал Бекмæрзти Аллæ, æ бæдæлттæ – Туйгъан æма Викæн. Нæ ерунцæ сæхецæн бунат хори бунмæ. Нæбал сæ батавта царди рохс.  Сæ зæрдхъурмæдзийнадæн кæрон нæййес йе ʹнсувæртæ Валик, Радик æма Тамиккæн. Хумæтæги нæ фæззæгъунцæ, мади бæдæлтти астæу ци уарзондзийнадæ бахсистæй, уой нæдæр дон ласуй, нæдæр ба арти содзуй, зæгъгæ. Сæ ристæн æмбал нæййес. Ресæн ибæл æгасæй дæр – хæстæгутæ, хеуæнттæ. Бийнонти  зæрди ци маст фицуй, уомæн æмбал нæййес,  еунæг бон дæр сæ зæрдæй нæ цох кæнуй. Нæй иронх кæнунцæ хеуæнттæ æма æмбæлттæ. Фæкъкъуру æнцæ гъæуи цæргутæ дæр.

          Æхе амондгун худта Славик, æ тумугъ бийнонти цæрайæй цардæй. Фал ин æ хуæрзуод неци исагъаз æй. Фæндаггон фидбилизи амæттаг бацæй. Бæргæ ма гъæбесæй фæххуæстæй адзали хæццæ, фал ци загъдæуа хъисмæтæн. Цардмондагæй рахецæн æй æ дуйней рохсæй.

    Адзалæн мадзал нæййес, фæззæгъунцæ. Мæрдтæй хуæрзауодæн кæнæд Славик æ бийнонтæбæл, æндæр нæ бон неци зæгъун бал æй. Рæсугъд зæрдæ нæ мæлуй, фæззæгъунцæ, фал дуйней фарнæбæл бафтуйуй, ма æ зæрдæ цирагъдарæй байзайæд муггагмæ. Некæд уодзæй иронх кай зудта, ке´хсæн цардæй, уонæй.

                                                   Хеуæнтти номæй Химилонти Дзерассæ