Сурх-Дигори 90 анзей юбилеййи кадæн

Дзабайти Фузӕ

 

(Кæрон. Райдайæн №44, № 47, №81, №82, №83, №84, №85)

Тугъди разӕй уӕдта ӕ фӕсте куста колхози куройнӕ, кӕцими кустонцӕ Перисати Дабан ӕма Хъалати Шамиль, колхози адтӕй дзолфицӕн пецтӕ, кодтонцӕ дзол колхози косгутӕн. Мадта колхози тугъди размӕ дӕр, ӕ фӕсте дӕр куста куртбадзӕ, дорӕвзалу нӕ адтӕй. Гъӕди ӕхсӕвеуатӕй сугътонцӕ сог ӕма ластонцӕ гъӕумӕ ӕвзалу. Ами гъӕди ӕвзалуй куст кодтонцӕ Золойти Къӕбус, Хуадонти Саламон, Хуадонти Гена, Габети Афай. Афай ма берӕ фӕккуста гъӕди ӕхсӕвеуатӕй, ӕрвиста ӕвзалу куртбадзӕн. Уой фӕсте ба фӕззиндтӕй дорӕвзалу ӕма фенцондӕр ӕй куртбадзи куст. Ами кустонцӕ Гобети Заур, Гӕбути Гобе, Гетъоти Смали, Хъойбайти Зикира, Дзагкойти Дӕде, Цакъоти Слангерий. Аци куртбадзи кодтонцӕ цӕлхитӕ уӕрдунтӕн, къӕпетӕ, фӕрӕттӕ, уӕрдунтӕ, готонтӕ, похцитӕ, трактори хӕйттӕ ремонт кодтонцӕ. Ӕнцон нӕ адтӕй кунци хӕццӕ косун, фал архайдтонцӕ ӕма ӕнӕсайдӕй кустонцӕ.

Мадта Малити Тотурухъ-тугъди инвалид, ӕ хӕдзари кодта колхозӕн уӕрдунтӕ. Е´нсувӕр Созурхъ ба адтӕй галти стани хецау, еци галтӕбӕл бонӕ кодтонцӕ косгӕ. Уӕхӕн хабар дӕр ма уидӕ, ӕма еци галтӕбӕл ӕхсӕвӕ сосӕггай ӕрласиуонцӕ седзӕргӕс уоститӕн хуасӕ - къумбули зӕнхи ӕй исамал кӕниуонцӕ.

Нӕ колхоз ма кодта сӕкӕри къумбули куст ӕма ӕй ӕрвистонцӕ Дигорай сӕкӕргӕнӕн заводмӕ. Къумбул къахта трактор, адӕм ба ӕй ӕмбурд кодтонцӕ. Габети Афай ӕма Черкес дӕр (зӕронд уогӕй) берӕ къумбул ӕрӕмбурд кодтонцӕ, фал ӕй Дигорамӕ  фӕлласун ба сӕ бон нӕ адтӕй, Афай ӕ кæрӕ цалдӕр сутки гъӕуай фӕккодта, куд тухстӕнцӕ, уотемӕй сӕ сӕргъи балӕудтӕй обкоми косӕг Гапбати Иван. Иван сӕмӕ ку ӕркастӕй, уӕд син еци фӕдбӕл сӕ къумбул ферветун кодта сӕкӕри заводмӕ. Къумбули куст дӕр берӕ адӕм кодтонцӕ, уомӕн ӕма Дигорай сӕкӕри заводи гъӕугӕ кодта, колхозонтӕн пайда адтӕй.

Уӕллаг синхи ба зӕрӕндтӕ сӕхецӕн искодтонцӕ звено, кӕцимӕн ӕ сӕргъи лӕудтӕй Бузойти Тъох, алкедӕр е´нхуси хай кодта.

Колхози ма хъиамӕтгун  адтӕнцӕ инженертӕ, агрономтӕ, зоотехникӕ, бухгалтертӕ, Бӕлоти Таймураз - экономист, Гацолати Таисӕ - бухгалтер, Гобети Марта - бухгалтер, Хайманти Азӕ - бухгалтер, Дзусти Азӕ - бухгалтер, Дзабайти Михаил - бухгалтер. Скъодтати Гӕлӕу - агроном, Тамати Сулейман -агроном, Хохти Зелимхан - агроном, Будайти Бапбай -зоотехник, Мамукъати  Георгий - зоотехник, Гӕлити Георги - зоотехник, Хамихъоти Зурапп - зоотехник, Хохойти Тимофей - электрик, Бекъурти Коля - инженер-механик, Бясти Зинӕ - звеновод, Гобети Варкӕ - звеновод.

Колхозонтӕ алли хузи  куститӕ кодтонцӕ ӕма хъиамӕтгун адӕмбӕл нимад ӕнцӕ: Малити Лало, Сакъити Гугъо, Хайманти Гетӕ, Хайманти Виктор, Гобети Хъӕрӕсе, Гобети Гугъо, Годзойти  Бало, Мамукъати Роман, Мамукъати Къӕстӕн, Мамукъати  Николай, Мамукъати Беслан, Кацанти Ламбек, Сабети Александр, Диготи Дуге, Диготи Пионер, Хамикъоти Борис, Хортити Бидзий, Гобети Дрис, Ӕфсӕнти Хӕймӕн, Гобети Юркин, Гобети Гугъо, Атайти Агубе, Гъӕргинти Лазӕр, Аркъаути Мухарбек, Аркъаути Гогъа, Хъойбайти  Гӕдун, Секъинати Сӕла. Нӕ колхози ма куста халсарти дзӕхӕрадонӕ, кӕций медӕгӕ задӕй аллихузи халсартӕ, е адтӕй цъизи дони галеу фарси Чиколай арӕнмӕ хӕстӕг. Аци огород-дзӕхӕрай сӕргъи лӕудтӕй Бузойти Урусбий. Цӕйбӕрцӕ халсартӕ си адтӕй! Раласиуонцӕ галтӕбӕл хуӕргӕнӕстӕ, пъӕмидортӕ, къабуска, ӕпхӕ, къумбул. Ами кустонцӕ: Гасинти Дзамболат, Секъинати Разий, Малити Уархан, Гегути Маря, Секъинати Аниса, Сабети Муса, Чихтисти Елмусхан. Колхоз ӕ косгутӕн ниццӕхгун кӕнидӕ къабусга, хуӕргӕнасӕ. Паддзахадӕмӕ сӕ нӕ лӕвардта ӕ халсартӕ, фал колхозонтӕ рӕфтад ку кӕниуонцӕ, уӕд сӕ уоми харз кодта. Урусбий хъӕбӕр хуарз куста ӕма ин ӕ кустӕй боз адтӕнцӕ. Дӕллаг фермити дӕллӕй дӕр уой фӕсте адтӕй огородон бригадӕ, ӕ бригадир адтӕй Малити Дрис. Дрисмӕ дӕр хуарз ӕрзаидӕ халсартæ.

Гъе, уотӕ архайдтонцӕ адӕм, сӕ цардбӕл тох кодтонцӕ, сӕ кустӕй сӕхе дардтонцӕ. Адӕм зӕрдиуагӕй тох кодтонцӕ. Еци адӕмтӕ адтӕнцӕ: Хадати Гогоцци, Хадати Сергей, Къибирти Зинӕ, Гӕуисти Тотурбек, Гӕуисти Бирихин, Бекъурти Тотурбек, Секъинати Маха, Секъинати Михал, Секъинати Алийхан, Секъинати Стъафя, Олисати Бекмӕрза, Бузойти Сандир, Бузойти Мухадзир, Будайти Бекир, Будайти Тӕрхъӕн, Скъодтати Нинӕ, Бичегкути Берди, Сакъити Сергей, Будайти Гӕсе, Къесати Данел, Къелойти Кудзиго, Дадтети Гозо, Дадтети Иван, Дадтети Дрис, Тургити Тъох, Хуадонти Бадтал, Колити Сафонка, Сабети Солтан, Сабети Муса, Гобети Биса, Дзилихти Александр, Тъурити Валоди, Хуадонти Ленин, Назарти Сергей, Сабети Юрий, Хӕмицати Ахурбек, Тургити Ханбата.

Аци колхози ма адтӕй арӕзтадон бригадӕ, кӕцими кустонцӕ Гасинти Габе, Гасинти Василий, Скъодтати Зурмӕ, Кацанти Фидар, Гӕуисти Виктор, Гӕуисти Далин, Секъинати Сардо. Мадта сӕрди еу ку кустонцӕ, уӕд бригӕдти адӕмӕн адтӕй донласгутӕ, уомӕн ӕма дон хъӕбӕр гъæуӕй будури косгути. Донласгутӕ дон ластонцӕ гъӕуӕй будурмӕ. Аци куст кодтонцӕ ӕригон биццеутӕ. Етӕ адтӕнцӕ: Габети Авдий, Секъинати Гӕлӕу, Сакъити Юрий, Хайманти Коля, Перисати Тамо. Уотемӕй адӕм кустонцӕ микъиййӕй, устурӕй, зӕрондӕй, сӕхебӕл нӕ аурстонцӕ, алкедӕр архайдта. Хъӕбӕр хуарз кустонцӕ тракторон бригадиртӕ Хуадонти Ленин, Тургити Тъох, Ӕфсæнти Батӕрбек. Аци бригадиртӕ хуарз лӕдӕрдтӕнцӕ сӕ трактористити. Фиццагидӕр ӕгъдау сӕмӕ адтӕй, алли тракторист дӕр ӕ куст зудта ӕма афойнадӕбӕл цудӕй ӕ кустмӕ, ӕ трактормӕ зилдӕй, цалцӕг кӕнун ку багъӕуидӕ трактори, уӕд ин адтӕй гъӕугӕ хай, хуӕруйнаг  син адтӕй афойнадӕбӕл. Пъовӕртӕй кустонцӕ Малити Тамарӕ, Бузойти Маня, Тъурити Риммӕ, Хамихъоти Нинӕ, Хамихъоти Таисӕ, Хуадонти Раисӕ.

Уой фӕсте колхози сӕрдартӕй кустонцӕ Золойти Эльбрус, Золойти Артур. Эльбрусӕн адтӕй хъӕбӕр зин косӕн, уомӕн ӕма падздзахади колхозтӕ нӕбал гъудӕнцӕ, колхозтӕмӕ цӕстӕдард нӕбал адтӕй. Советон хецауадӕ куд ихӕлгӕ цудӕй, уотӕ колхоз дӕр нийхалдӕй, ӕма Эльбрус ӕ куст ниууагъта. Золойти Артур дӕр ӕнцонтӕй нӕ фӕккуста.

Кӕд нӕ гъӕуи берӕ адӕмӕн адтӕй куст, уӕд нур нӕбал. Нӕ фӕсевӕд сӕумӕраги фӕццӕуй горӕтмӕ кустмӕ, изӕрӕй ба рацӕунцӕ ӕма ӕнафони  ӕрхъӕртунцӕ сӕ хӕдзӕрттӕмӕ, гъезӕмарӕ кӕнунцӕ. Мӕ зӕрдӕ зӕгъуй фӕсевӕдӕн: куст син куд уа, хуӕздӕр рӕстӕг сӕбӕл куд искӕна, ӕнӕнезӕй, зӕрдӕрохсӕй куд цӕронцӕ!

(Уодзæнæй ма)