Сурх-Дигори 90 анзей юбилеййи кадæн

Дзабайти Фузӕ

 

(Идарддæр. Райдайæн №44, № 47, №81)

Хъанамати фӕсте колхози сӕрдарӕй куста Хайманти Гермӕн. Аци лӕг гъӕуи адӕми цӕргути ӕнцондзийнадӕбӕл хъӕбӕр хъиамӕтгун ӕй. Гермӕн Сурх-Дигори гъӕуи дууӕ гъӕунги исрӕвдзӕ кодта. Ленини гъæунги сосе над, ци берæ дор, зменсæ фæлластонцæ уордæмæ! Мадта Комсомольскийи гъæунги дæр никкалдта зменсæ,

хурæ. Гъæунгти сагъд æрцудæй Ленини цирӕгътӕ. Нӕ фӕсевӕдæн конд ӕрцудӕй стадион, арӕзт нӕмӕ ӕрцудӕй агоригӕнӕн завод. Колхозонтӕ Гермæни рӕуаги аразун райдӕдтонцӕ агорин хӕдзӕрттӕ. Колхозонтӕ сӕ фӕллойнӕбӕл истонцӕ тиллӕг, ӕхца. Нӕ фермитӕ идзаг адтӕнцӕ фонсӕй, адӕмӕн куст адтӕй. Мадта, тугъди ци адӕм фесавдӕнцӕ, уонӕн дӕр гъӕуи астӕу циртдзӕвӕн искодта. Цардуодӕн дин кӕнӕнтӕ, Гермӕн. Нӕ колхоз раззагдӕр колхозти ӕмрӕнгъӕ цудӕй Гермæни рӕуаги. Уой фӕсте Германи раййивтонцӕ Чиколамӕ, косун райдӕдта Ирӕфи райкоми фиццаг секретарӕй, фӕккуста си фондз анзи. Еци рӕстӕги Ирӕфи район цудӕй раззӕгти хӕццӕ нӕ республики. Гермӕнӕн ӕ хуарз кусти туххӕй лӕвӕрд ӕрцудӕй ордентӕ ӕртӕ: «Орден трудового Красного знамени» ӕма авд медали. Абони дӕр гъӕуи цӕргутӕ Гермæни имисунцӕ, ӕ хуарздзийнӕдти кой ин кӕнунцӕ.

Хъазауатонӕй кустонцӕ хестӕр кари тракториститӕ, ӕхсӕвӕ дӕр ма хумӕ кодтонцӕ. Етӕ адтӕнцӕ: Дзӕгойти Генардухъ, Дзӕгойти Бола, Дзӕгойти Тазе, Бичегкути Сенсур, Скъодтати Геуӕрги, Бясти Гӕлӕу, Хӕйманти Гаге, Гегути Батӕрбек, Малити Гамуссӕ, Гацолати Сӕла, Перисати Сергей. Гобети Сӕрмӕт ба, трактористӕй косгӕй, иссӕй Советон Цӕдеси Сӕйраг Совети депутат. Ани фӕсте дæр фӕккуста берӕ тракториститӕ, сӕхебӕл нӕ ауӕрдгӕй. Етӕ хумӕ, похци, культиваци, таугӕ кодтонцӕ, сӕ хед калгӕй. Етӕ адтӕнцӕ: Аркъаути Хамбий, Ӕфсӕнти Батӕрбек, Ӕфсӕнти Василий, Багъӕрати Къостан, Байцати Коля, Бӕлоти Хадзисмел, Балоти Викӕ, Бичегкути Дзала, Бичегкути Хъазбег, Гобети Савелий, Гобети Владкӕ, Гобети Толик, Годзойти Алик, Гӕдзаути Жорик, Гегути Къостик, Дзабайти Маркс, Дадтети Сабата, Дадтети Коля, Диготи Сафкӕ, Диготи Андрей, Диготи Аркадий, Зӕгӕлти Герцен, Золойти Сергей, Золойти Толик, Малити Дзала, Малити Аркадий, Миндзайти Валерий, Найфонти Лазӕр, Найфонти Лев, Миндзайти Владкӕ, Ортабайти Геуӕрги, Ортабайти Толик, Рӕмонти Алан, Темурти Биса, Хъибизти Нухтар, Цакъоти Ӕхсарӕ, Цакъоти Кудзиго, Елойти Демур, Бозурти Мухарбек, Кацанти Ламбек, Перисати Аркадий, Будайти Максим, Гъӕргинти Мухарбек. Сакъити Вадим дӕр адтӕй хуарз тракторист, гъӕууон-хӕдзарадон институт каст ку фӕцӕй, уӕдта куста колхози инженер-механиккӕй.

Сурх-Дигори адӕм хъӕбӕр хъиамӕт кодтонцӕ, зӕнхи куст кодтонцӕ, бӕрзонд тиллӕги ӕрзадбӕл тох кодтонцӕ, фермити дардтонцӕ берӕ фонс. Мадта ӕхсӕвеуатӕй дӕр кустонцӕ Хӕреси, Сурхи, Хъӕзлари. Сурхи бӕрзонди фӕскомцӕдесонтӕ ӕхсӕвеуатӕй хуасӕ карстонцӕ, берӕ хуасӕ ӕрцӕттӕ кӕниуонцӕ. Етӕ адтӕнцӕ ӕрмӕст лӕхъуӕнтӕ нӕ, фал ма кизгуттӕ дӕр. Хуарз архайдтонцӕ мӕнӕ атӕ: Дзабайти Маркс, Бозурти Хурбек, Секъинати Гӕлӕу, Гобати Геуӕрги, Хутъяти Петур, Бясти – Гобети Зинӕ, Секъинати Оличкӕ, Диготи Розӕ, Хайманти Любӕ, Диготи Оличкӕ, Хайманти Сафетка, Малити Катя, Малити Милиуан, Бузойти Мӕзда, Дзабайти Веркӕ. Сурхӕй хуасӕ ӕрласиуонцӕ гъӕумӕ колхози фермитӕ, уотемӕй сӕ фонс хастонцӕ. Хъӕзлари Сурх-Дигори гъӕуӕн адтӕй 9 мин фуси, кӕцитӕ лӕвардтонцӕ колхозӕн фид, фанс. Аци фустæ сӕрди истӕрионцӕ Хъӕзларӕй Хӕресмӕ, ма сӕ уоми хизтонцӕ, ӕрӕгвӕззӕги бабӕй сӕ фӕттӕрионцӕ Хъӕзлармӕ. Нӕ колхозонтӕ сӕрди Хъӕзлари фустӕн ӕркӕрдионцӕ хуасӕ. Аци фусти фермити сӕргълӕууӕгӕй кустонцӕ Гӕдзаути Михӕл, Габети Кудзий, Габети Бета, Миндзайти Тӕкъа, Хохойти Коля.

Гъонгӕстӕ ӕма фиййӕуттӕй кустонцӕ Миндзайти Лазӕр, Охъазти Вильгем, Хъамболти Дабан, Перисати Сергей, Миндзайти Саухал, Хутъяти Дзадо, Габути Гобе ӕ фурт Казбеги хӕццӕ, Хохойти Сӕлафир, Гуссаути Михал, Золойти Геуӕрги, Скъодтати Хъаурбек, Малити Темболат, Бичегкути Созур, Текъити Сергей, Хамихъоти Дзастемур. Къасартӕбӕл ма дзуапп лӕвардтонцӕ Темирати Борнӕф, Хохойти Коля. Гъӕуи гъоцити ферми сӕрдарӕй куста Хамихъоти Мурзӕ. Колхоз бонӕй-бонмӕ кодта гъӕздугдӕр, берӕ адӕм си куста, неци тухст ӕвзурстонцӕ, цард сӕмӕ худтӕй ӕ медбилти.

(Уодзæнæй ма)