Номерæн

Цӕстисуг калгӕ дӕу имисдзинан,

Дӕ сау ингӕнмӕ тундзгӕ цӕудзинан….

    Рацудæй дууæ анзи, кæдæй Стур - Дигори гъæубæл 16 июли  райгъустæй æверхъау хабар – фидбилиз æрцуди æ дуйнеййи рохс батар æй гуппурсар лæхъуæн, фæсевæди  астæу разагъди æмбал, адæмæн уарзон, курухон лæгау æгъдаубæл хуæст,  цардбæллон Гæтцити Ахурбеги фурт Арсенæн. Æваст хабари зин æма адæми æрдеуагæ куд дудзигъæр еци бон Арсен ниййерæг мадау ци æрдзæ уарзта, уоми. Хуæнхтæ æма къæдзæхтæ, цъæх фæлунст гъæдтæ æма æрдозтæ фæдес – гъæргæнгутæ æрвистонцæ кæрæдземæ. Гъе, фал…. Нæбал бантæстæй уони фегъосун цардмондаг Арсенæн, уæззау æхгæд æркодта æностæмæ, æ райгурæн уæзæги рæсугъддзийнади уиндæй ци дууæ цæсти нæ бафсастæнцæ, уони, банцадæй æ кустæй уарзæгой урух зæрдæ.

     Райгурдæй, байрæзтæй æма скъола каст фæцæй Арсен Стур-Дигори минкъий гъæуи, райста гъомбæладæ, курухон хестæрти фарнæ, æгъдау лæдæргæй, дигорон адæмихатти фæткитæ зæрди арф баивæргæй. Царди тонхи бацæугæй ба куста «Националон парк «Аланий» бæрнон бунати. Æригон ма уогæй дæр ин  адæми астæу ке адтæй кадæ æма нимаддзийнадæ, е ба бæрæг адтæй æрмæст ци кинтæ – минтæ дзиллæ низмалдæй Арсени содзагкаг зиани фæдбæл Дигори коми, уомæй дæр. Æд хонх, æд будур, кæцæйти ба не ΄рцудæй адæмтæ фæстаг «фæндараст»   зæгъунмæ Арсенæн – размæлæнтæ нæбал адтæй Стур-Дигори гъæунгтæ æма æ фалдзос бунæтти.

   Хуцауæн унафæгæнæн нæййес, уæдта нæййес æнæнмæлгæ дуйней дæр, фæззæгъунцæ. Гъе фал, ци хузи зæрдæ байвардæуа ниййерæг мадæ Габеон Зойæн, уарзæгой фидæ Ахурбегæн, æнсувæртæ, хеуæнттæн, кæцити цæстибунтæ абони уæнгæ дæр нæ сор кæнунцæ цард уотæ берæ уарзагæ Арсени имисгæй, нурма æ лæги карæмæ дæр ка нæма исхъæрдтæй, еске кизгæ æнгъæлдзауæй ка ниууагъта æма «гъар астъонæ» исбйун кæмæн нæ бантæстæй æ хæццæ, æ берæ фæндитæ æма рæсугъд нисантæ æрдæгбæл кæмæн раскъудæнцæ.

    Фал уæддæр, Арсен зæнхæбæл ци рæсугъд фæд æма имисуйнæгтæ  ниууагъта, ци тæфагæ бахаста е ΄носон дуйнемæ, уони номæн дæр сæрбæрзонд ун æнгъезуй адæмти астæу.

     Не ´рхаста еци бон дæр æ сæрмæ  Гæтцити хуæрззæрдæ лæппо Хæреси рæсугъддзийнæдтæ фæууинунмæ Ногирæй ци æнæзонгæ иуазгутæ раласта æ хæццæ горæтæй, уони не ´сциткин кæнун. Кæд Стур - Дигори еци бон Циргъесæни кувд адтæй, уæддæр нæ баздагъдæй нæдæр уордæмæ, нæдæр ниййергутæн фæстаг «…хуæрзæбон» зæгъунмæ дæр. Æма, æ адзал иссирдта цард-цæрæнбонти кæбæлти фæххадтæй фестæгæй, бæхбæл, машийнæй, еци Байради урдуги – æ хуæдтолгæ ибæл гадзирахаттæй рацæугæй,  æфсæддон иуазгутæй еуей хæццæ иссирдта æ адзал еунæг Хуцауи дзурдæй.

    «Дууæ анзи æнæ Арсен» - цъухæй зæгъунмæ дæр ци зин æнцæ. Фал, хъисмæт æгъатæр æй, не ´взаруй зæронд, æригон, сабий, цардмондаг – есуй аллихузити дæр цард. Æма уæд Арсен дæр е ΄носон дуйнебæл дзенети ахил. Е ΄мгæрдтæ, хеонтæ, зонгитæн ба æ уоди берæ рæсугъд менеугути фæрци алкæддæр уодзæнæй се ΄носи имисуйнаг. Рохсаг уо, хормондаг æма цардгъæуагæ Арсен!

                                                                 Гъигæзæрдæ хеуæнтти номæй

                                                                                           Чихтисти Риммæ