Цæстингас

      Кæдæй мæхе гъуди кæнун, уæдæй райони газет мах бийнонтæн алкæддæр адтæй хъæбæр уарзон æма ахсгиаг еугур мухури хузти астæу дæр. «Ленинон» ку хундтæй, уæддæр, æма «Ирæф» ку иссæй, уæддæр газет æ цитгиндзийнадæ нæ раййивта нæ цæсти. Мæнæ тамаку думæг адæймаг куд исахур уй æма ин æ бон ниууадзун куд нæ фæууй, уотæ, хæдзарæмæ бацæугæй, æз дæр фиццагидæр ку рафæрсун, «…пост нæмæ адтæй», зæгъгæ, уæд еугурей астæу фелвасун мæ уарзон «Ирæф». Мæ фæллад дæр æрбайсæфуй, еу æрмæг инней фæсте кæсгæй (фæстæдæр æй ракæсдзæнæн, зæгъгæ, дæр ми нæбал фæййададзуй). «На одном дыхании», зæгъгæ, куд фæззæгъунцæ уруссæгтæ, гъеууотæй бакæсун сауæнгæ æ фæстаг дзурдти уæнгæ.

    Кæд газетæн æ фæзуат минкъийгомау æй, уæддæр си ци нæ хузи æрмæг бакæсдзæнæй адæймаг? Райдайæ нæ райони цардæй, ци æййивддзийнæдтæ си цæуй бонæй-бонмæ адæми хуæздæр цард æма пайдайæн, уой туххæй æма фæууо аллихузон игъосункæнуйнæгтæй. Фæууй си нæ фæсевæди æнтæстити туххæй ахури, спорти, культурон царди. Нæ курухон хестæртæ кæстæрти ци хузи мадзæлдти фæрци æвæрунцæ раст нæдтæбæл, æгъдау, æфсар æма лæгдзийнадæ, фидибæстæмæ уарзт син сæ тоги куд федар кæнунцæ, уой туххæй дæр берæ цæмæдессаг æрмæгутæ.

Уæлдай æхцæуæн ба ма е æй, æма нæ райони хецауади куст,  сæ сæргъи Гъуцъунай - фурт æма Лагкуй - фурт, уотемæй, мæнæ рæсог сауæдони дони хурфи алцидæр куд фæззиннуй, уотемæй ке æвдесунцæ райони еугур хабæрттæ дæр. Е уой дзорæг æй, æма сæмæ ци адæми цардбæл дзуапп дæдтунцæ, етæ уæлиау æвæрд ке æнцæ, римæхст сæмæ ке неци ес, ку багъæуй, уæдта син сæ цигъæуæгтæмæ дæр ке бадарунцæ се ´усхъæ. Е æхуæдæг цæй аргъ æй æма цæйбæрцæ æууæнкæ дæдтуй адæмæн….

       Фæууй си хъæбæр берæ аллихузон арфитæ хецæн адæмтæн се ´нтæстити туххæй,  бæрæгбæнттæмæ, нæ хестæр адæмтæй фæнзуйнаг ка адтæй раздæр æнзти æ хъазауатон кусти, æгъдауи, æхсæнадон царди, уони туххæй, цæмæй си кæстæртæ дæнцæ есонцæ. Етæ устур тæразæ ласунцæ цард хуæздæр æма рæсугъддæр хæссунмæ.

     Уæлдай хъæппæрес берæ æнзти февдистонцæ æ коллективи иуæнгтæ дæр, сæ кусти уавæртæ фæккæсуйнаг æма хуæздæргъæуагæ кæд адтæнцæ, уæддæр. Сæ конд æрмæгутæ алкæддæр фæууиуонцæ æма æнцæ цæмæдессаг, æнцон кæсæн æма лæдæрæн. Еу загъдæй - «Ирæф» æй нæ царди айдæнæ алли хузи дæр. Хъæбæр гъæугæ, цæмæй царди хæццæ æмдзо кæнун уа нæ бон. Уомæ гæсгæ ба седун нæ райони еугур цæргутæмæ дæр. Нæ бон æй махæн дæр «Ирæф» - мæ усхъæ бадарун. Гъома, мухури рæстæги алли хæдзарæ, алли бийнонтæ дæр «Ирæф» рафинстæй. Уæ хуарзæнхæй, ма бавгъау кæнтæ анзи æмбесæн 616 соми. Уодзинайтæ уæд нæ райони царди тумугъи, цæрдзинайтæ цæмæдессагдæр цардæй.

                                             Малити Беллæ,

      Чиколай сувæллæнтти рæвдауæндонæ «Сказки» бæрнон косæг.