Æрæги, амистоли 11 бони, раст Уæрæсей бæрæгбони агъоммæ, Архангельски сахари М.В.Ломоносови номбæл драмон театри сценæбæл æнккæтуæрæсейаг "Гармоничная Россия", зæгъгæ, фестивали  архайгæй сæ æвау-æведис ацъагъуæ равдистонцæ куд бунæттон артисттæ æма коллективтæ, уотæ иуазгутæ дæр - нæ бæсти берæ рауæнтæй ардæмæ æрбацæуæг аййевон адæмон коллективтæ. Иуазгутæ - Башкортостани зартæ ма кæфтити фольклорон ансамбль "Мирас", республикæ Марий Эли этнофольклорон ансамбль "Мурсескем", Коми республики адæмон вокалон ансамбль "Исерга" æма сæ фæндурдзæгъдгути ансамбль "Мичагудок", республикæ Карелийи падздзахадон филармонийи адæмон инструментти оркестр "Онего" æма иннæ регионти къуæрттæ æвæсмойнаг адтæнцæ, ке нæ базийнадæ кодтонцæ изол рауæнмæ фæццæун, æма сæ устур зæрдæмæдзæугæ  дæсниадæ син арæхсгæ равдесун ке бантæстæй театри азгъунстмæ æрбацæуæг адæмæн, кæцитæ син устур аргъ искодтонцæ æнцхъухæй!

Æз берæ æнзти æд бийнонтæ цæрун Архангельски сахари, ма нин уæлдай æхцæуæн адтæй нæхе Ирæфи райони минæвæртти алдзæн архайд сценæбæл! Дзæгъæли син, æвæдзи, æнæбанцайгæ æрдзæфæй  зæрдиаг арфæ нæ кодтайуонцæ и боз адæн дæр!  Сæрустур гъæуама уа алли дигорон адæймаг дæр уæхæн æрдзуасæ хебæстаг адæнæй!

  Нур мæ фæндуй нæ райони газети фарсбæл зæрдиаг арфæ ракæнун нæ хъиамæтгун архайгутæн, кæцити бæрзонд ацъагъуи фæрци  ансамбльтæ "Ритмы гор" æма "Ирæфи зæлтæ" зонунцæ нур ба идард Уорс денгизи билæбæл дæр.

Хебарæй устур салам æрветун "Ирæфи зæлти" разамонæгæн, ма рагон зонгæ Дзоблати Анатолийæн (кæддæр еу рæстæг еумæ ахур кодтан Краснодари сахари). Устур кадæ кæнуй нæ Дигори адæнæн æми ин Хуцау идарддæр агъазгæнæг уæд, æ размæ ци нæуæг ихæстæ ивæруй, уоми исарæхсун.

Фæббæрæг кæнун ма мæ фæндуй куд Ирæфи райони хецауади сæргълæугути - Гъуцъунати Къазбеги æма Лагкути Омари, уотæ нæ райони культури æмарæзти сæргълæууæг Зехъети Хетаги дæр (хæдæгай, Хетæги хæццæ дæр еу рæстæг еумæ ахур кодтан Краснодари сахари). Мæнмæ гæсгæ, æнæ уони анхосæй нури рæстæг культурæ рапарахат кæнун зин  гæнæн æй!

Архангельски сахари цæрæг Хидирти Миширби.