Номерæн

Зин ӕй, тухуаст зин, лимӕнӕй ке хӕццӕ цӕрай (кӕд мӕнӕй дзӕвгарӕ хестӕр адтӕй ӕ карӕмӕ гӕсгӕ, уӕддӕр), уой туххӕй евгъуд афони финсун. Тог хӕстӕг мин н´адтӕй, фал мӕ зӕрдӕмӕ ба хеуонау фур хӕстӕг… Ке зӕгъун ӕй гъӕуй, йе хумӕтӕги нӕй.

Мадӕ ӕрдзӕ зӕнхон мӕлуйнаг адӕймаги хуӕздӕр менеугутӕй ӕргом - ӕргомӕй ке фӕххайгин кодта, уонӕй еу адтӕй не ʹмгъӕугкаг Хоцаонти Хъасум ӕма ӕ цардӕмбал Цӕмӕхъауон Цуцуй фурт Таймораз дӕр. Хъасум ӕма Цуцуй сувæллæнттæ, сӕ бон куд адтӕй, уотӕ се´нхуси хай лӕвардтонцӕ хӕдзари ӕма бунӕттон совхози аллихузон кустити рӕстӕги. Тайморазбæл ба адӕми астӕу барагкенӕй ниффедар ӕй дуккаг ном – Алхас.

Куд  гъӕуккаг лӕппо - цӕхӕрцӕстӕ  лӕхъуӕн, уотӕ ӕмхиц адтӕй кафунмӕ, зарунмӕ, ескети байгъӕлдзӕг кӕнунмӕ, спортмӕ, уӕлдай фулдӕр ба уарзта футбол. Нӕ республикон футболон  къамандӕ «Спартак-Алани»-й еузӕрдиуон болельщик адтӕй фӕндзай  афӕййемӕй фулдӕр. Тайморазмӕ адтӕй берӕ бафӕнзуйнаг менеугутӕ. Гъома? Адтӕй зӕрдӕхӕлар, цӕстуарзон, ӕргом загъд, ӕ кусти фӕлтӕрддзийнадӕ некӕд некӕмӕн бавгъау кодта. Хъӕппӕресгинæй ӕхе  ӕвдиста бийнонти, синхбӕсти ӕма нӕ устур гъӕубӕсти царди.  Цийнӕдзийнади фӕтки ӕгъдау радтунмӕ, уӕдта зиндзийнади рамӕлӕг адӕймаги туххӕй радзорунмӕ ин некӕд гъудӕй лихзтӕ  кӕнун.

Таймораз райгурдӕй 1939 анзи Лескени гъӕуи. Ами каст фӕцӕй бунӕттон скъола ӕма райста шофери дӕсниадӕ. Ӕноси ӕмбес - 50 анзей бӕрцӕ ӕвӕлмӕцгӕй фӕккуста уоци гъӕугӕ дӕсниадӕбӕл. Нур дӕр ма´й беретӕ зӕрдӕхцӕуӕнӕй арӕх ӕримисунцӕ. Ӕ «ӕфсӕн бӕх» автомашинӕ «ГАЗ-53»-бӕл Лескени агъазиау гъӕуи кӕмӕн нӕ фӕанхос кодта: хуасӕ, согтӕ, арӕзтадон ӕрмӕгутӕ ӕма ӕндӕр уӕхӕн цигъӕуагӕ хӕдзарадон гъуддӕгутӕ ӕрбаласунмӕ, уӕхӕн хӕдзарӕ ӕма бийнонтӕ нӕбал байзадӕй. Тухст адӕймаг ба, дан, ӕ хуӕрзгӕнӕги некӕд иронх кӕнуй. Айдагъдӕр си арфӕ фӕккӕнуй.

Ку исбайлӕгъ ӕй, уӕд цардӕмбалӕн байагурдта Дзарасти Нини, кӕци нивгун къах ӕрбайвардта Хоцаонти Хъасуми фӕрнуг къӕсӕрбӕл. Тайморази хӕццӕ кӕрӕдзей уарзгӕй, сӕ дзурд кӕрӕдзебӕл бадгӕй, цардæнцæ, сӕ фӕсте фӕззиндтӕй рӕсугъд кӕстӕртӕ. Дууӕ фурти ӕма дууӕ кизги - Муса, Альберт, Эмма ӕма Томӕ. Раст зӕгъгӕй, алкӕд зӕрди фӕндон нӕ рауайунцӕ адӕймаги гъуддӕгутӕ. Уотӕ цардбӕллон ниййергути уарзон ӕма адгин бӕдолӕ Эммӕ уӕззау незӕй, рохс цардӕй неци фӕууингӕй, ӕгӕр раги ӕ зӕнхон цардӕй рахецӕн ӕй. Имисуйнаг иссӕй… Сӕ устур амондӕн, иннӕ ӕртӕ кӕстӕри ба цӕрунцӕ хецӕн бийнонтӕй. Етӕ дӕр кадӕ ӕма радӕй цӕунцӕ ӕгъдӕутти. Се´нхуси хай некӕмӕн ӕвгъау кӕнунцӕ. Ӕгайтима!..

Уомӕ гӕсгӕ ба мӕ зӕрдӕбӕл ӕрлӕуунцӕ Тайморази - Алхаси курухон зундамундтитӕ, кӕцитӕн, ӕнзтӕ мӕбӕл куд фулдӕр цӕуй, уотӕ сӕ нисанеуӕг арфдӕр лӕдӕрун райдӕдтон. Е фӕззӕгъидӕ: "Уӕ ниййергутӕ ӕнцӕ - уедӕгтӕ, сумах (бийнонтӕ лӕг ӕма уосӕ) - бӕласи зӕнгӕ, уӕ сувӕллӕнттӕ - бӕласи къалеутӕ, уӕ цӕуӕти цӕуӕт - бӕласи къадотӕ, уӕ адгин бӕдӕлтти бӕдӕлтти бӕдӕлттӕ ба - сифтӕ. Уотемӕй исирӕзуй муггаги къох, тагӕ дӕр».

Бӕргӕ берӕ хуарз фӕндитӕ ӕма бӕллецтӕ ма адтӕй ӕ зӕрди Таймораз - Алхасæн. Анзӕй еу гӕзӕмӕ фулдӕр рацудӕй, йе ʹцӕг дуйнемӕ ку рандӕй, уӕдӕй нурмӕ. Фал зæгъун ӕй нӕ бон ӕнӕтӕрегъӕдӕй, Таймораз, кӕдзос уодӕй ке фӕццардтӕ, уой. Ӕцӕгӕй дӕр ирд, арф фӕд ӕма рӕсугъд фарнӕ ниууагътай сабур ӕма кадгин муггаги, хӕстӕгути, синхбӕсти ӕма гъӕубӕсти ӕхсӕн.

Рохсаг уо, Таймураз. Дӕ фӕсте дӕ уарзон адӕнтӕбӕл цардауодӕн фӕккӕнӕ. Мах ба дин дӕ рохс цӕсгом, дӕ кӕдзос ном некӕд феронх кӕндзинан. Мӕрдти бӕстӕй сугъзӕрийнӕ талатӕ исуадзӕ. Дӕ фарнӕ уӕлӕбал байзайӕд.

Ӕмбӕлтти номӕй, Хидирти Валерий Лескени гъӕуӕй.

Хоцаонти бийнонтӕ ба арфӕ кӕнунцӕ еци еугур адӕмӕн, сӕ устур зини сӕ фарсмӕ кадӕр ӕрбалӕудтӕй, ӕма игъосун кӕнунцӕ, Тайморази афӕйгӕндӕ ке уодзӕнӕй 1 июли, цуппӕрӕни, Лескени гъӕуи.