Номерæн

     Алли адæймаг дæр æ райгурунæй æ рамæлунмæ фæййархайуй йе ΄мхузон адæми астæу рæсугъдæй, кадгинæй, уарзонæй бацæрунбæл. Райдайуй цæун æ царди фæндагбæл, раст цума æнæкæрон денгизи фæннакæ кæнуй, уоййау. Нæ зонуй, исон æй зæрин хор тавдзæй æ тунтæй, фæлмæн рæвдаугæй, æви ибæл уазал ех ниууардзæй æма ин раскъундзæй æ цард, æ бийнонтæ æма уарзон адæми æхсæнæй æй фæххецæн кæнуй.

    Анз рацудæй, кæдæй не ΄хсæнæй рацох æй рæсугъд зæрди хецау, хуарз æмгарæ, уарзон æмбал Бесолти – Будайти Ритæ Сабази кизгæ.  Ритæ, Толдзгуни асткъласон скъола каст фæууогæй, æ идарддæри ахури фæдбæл бацудæй Хæзнидони астæуккаг скъоламæ. Ци бон æрбацудæй нæ астæумæ, еци бонæй фæстæмæ нин иссæй æ уоди менеугутæмæ гæсгæ хуæри хузæн. Адтæй хуæрзтог, лæгигъæдгун, адæмуарзон адæймаг. Бесолти хæдзарæмæ Мæгæмæти цардæмбалæн ку æркувта, еци бонæй фæстæмæ æхе бауарзун кодта æрмæст бийнонтæн нæ, фал хæстæгутæн дæр. Куд хæдзари æфсийнæ, уотæ ин æ раз неке райстайдæ. Разуайæн кодта цæргæбонти.

Игъæлдзæг, цæстуарзон, Сатанай хузæн бæркадкъох æма федар зунди хецауæй æй зудтонцæ синхбæстæ, зонгитæ. Хæстæгутæ кæрæдзебæл бæттæг, хестæрæн æгъдаудæттæг, кæстæрæн зундамонæг адтæй аци силгоймаг. Исæнтæстæй Бесолти бундорбæл дууæ сувæллони: Фатимæ ма Ренат. Уонæбæл дæр къуæрттон карки хузæн лæмбунæг адтæй Ритæ. Адæймаги хуæздæр менеугутæй син хай бакодта. Царди тонхи рацудæнцæ, сæ нивæ иссердтонцæ. Арфиаг адтæй Ритæ æ хæстæгутæй. Æ киндзæ Дианæ ин лæггадæ кодта, мадæ ма кизги хузæн кæрæдземæн адгин иссæнцæ. Фал карз нез æма æгъатир мæлæти тухтæ ратудтонцæ Рити æ уарзон бийнонтæй, йе ΄мбæлдтæй, æмирæй сæ фæууадзгæй. Зæрдхъурмæй æй имисунцæ абони, сæ зæрди ристæн кæрон нæййес.

       Куд зин æй ниййерæг мадæн, уарзон цардæмбалæн æностæмæ хуæрзбон зæгъун, фал æ индæй хай нæбал ес. Æнæкæрон зин ибæл кæнæн мах дæр, йе ΄мкъласонтæ. Нæ зæрдæй æгириддæр нæ цох кæнуй. Ци устур зæрдирист ниууагъта æ фæсте. Фал нæ бон ций абони Ритæн рохсаг зæгъунæй уæлдай. Мæрдти бæсти дзенет дæ хай. Ци рæсугъд бийнонтæ ниууагътай дæ фæсте, Ритæ, уонæбæл цардауодæн кæнæ. Дæ рохс цæсгом, дæ рæсугъд зæрдæ некæд уодзæнцæ иронх, ка дæ зудта, ке´хсæн цардтæ, уонæй.

                                                           Æмкъласонтæ.