Махæй еу

Радзорун мӕ фӕндуй еуей туххӕй. Бузойти Мухарбеги фурт Валоди райгурдӕй Фидибӕсти Устур тугъди агъоммӕ Ӕхсӕуи гъӕуи, стур бийнонти. Ке зӕгъун ӕй гъӕуй, ӕ  сувӕллони бӕнттӕ адтӕнцӕ зин ӕма тухст, куд иннетӕн, уотӕ.

Валоди ӕфсади адтӕй Архангельски области, баслужбӕ кодта ӕртӕ анзи. Уой фӕсте косун райдӕдта «Ирӕф» колхози. Абони Валодибӕл цӕуй 84 анзи, ӕй гъӕуи курухон хестӕртӕй еу. Ӕ цардӕмбал Темурони хӕццӕ исхастонцӕ ӕртӕ сувӕллони. Берӕ зинтӕ ин ӕвзаргӕ рауадӕй, ӕ еунӕг фурти дӕр  банигӕдта уӕззау незӕй. Фал имӕ разиндтӕй хъаурӕ ма ӕ хурфӕмӕ игъосунбӕл нӕ фӕцӕй.

Абони, ӕ хӕццӕ дзоргӕй, Валоди радзоруй берӕ рагон хабӕрттӕ, таурӕгътӕ цауӕйнони цаутӕй, фиййауи цардӕй. Еци ӕрмӕгутӕ фӕуунцӕ цӕмӕдес ӕма дессаг. Хъӕбӕр хуарз зонуй нӕ фиддӕлти ӕгъдӕуттӕ, рагон бацеу-бацеутӕ ӕма зундгин дзубандитӕ. Сӕ рази лӕууй сӕ муггаги мӕсуг, берӕ си ес рагон дзаумӕуттӕ. Ӕма си Валоди алли дзаумауи истори дӕр зонуй. Уӕрӕсей алли къумтӕй ку иссӕунцӕ адӕм хонхмӕ, уӕд син байархайуй уруссагау бӕлӕдӕрун  кӕнунбӕл мӕсуги равзурд, муггӕгти истори. Нигки ба Билӕги коми уӕхӕн дор ма бӕласӕ нӕййес, Валоди кӕций нӕ зонуй.

Хъӕбӕр ӕхцӕуӕн мин ӕй уӕхӕн курухон хестӕртӕ ке ес нӕ Дигоргоми. Валоди ба ма нин берӕ ӕнзти цӕрӕд, ӕгъдӕуттӕ амонгӕй.

Хайманти Антонинӕ