Фæстаг дзæнгæрæг

         

      Рæсугъд æма аййев фæлгоцгонд тургъти бабæй радон хатт бæрæг кодтонцæ Чиколай 2-аг астæугкаг скъолай ахурдзаутæ, педагогон коллектив, ниййергутæ æма иуазгутæ тæгкæ рæсугъддæр, алли сабий дæр æгас анз кæмæ фæббæлуй, еци фæстаг дзæнгæрæги бæрæгбон. Кæд сæ раздæри изæри ци карз думгæ рагъазта гъæуи сæрмæ, е хъæбæр бахъор кодта æма æгас бон ке фæррæсугъд кодтонцæ  8-11 къласонтæ, еци тургъæ минутти нимадæй бугъгалæн фестадæй, цирæгътæ сæбæл ниххустæнцæ, уæддæр сæ нифс нæ расастæй сувæллæнттæн, æма, сæ разамонгутæ Махъоти Валя æма Баликъоти Алети  хæццæ, нæуæгæй, устур хъæппæрес æма хъаурæ бавдесгæй, сæуми цъæхти рамбурд уогæй, адæми æрбацудмæ ниггки аййевдæр исаразтонцæ скъолай тургътæ.

 

      Æма мæнæ райгъустæй бæрæгбон хæссæг 10-аг æма 8-аг кълæсти ахурдзаутæ Баликъоти Сослан æма Тауасити Аминæти зæлланггæнгæ гъæлæс, цийни уац игъосун кæнгæй, ке райдæдта бæрæгбон урух æмвæзади.

   Фиццаг дзурди барæ, фæткæмæ гæсгæ, лæвæрд æрцудæй скъолай директор Дедегкати Зинæн, кæций радзубанди, еугур педагогон коллективи номæй, зæрддагон арфити хæццæ алли хатт агаиуй æрмæст æ гъомбæлгæнгути зæрдитæ нæ, фал ма æмбурди еугур архайгути зæрдитæ  дæр.

    Бустæги рæсугъд арфитæ æма федæнмæ фæдзæхстити хæццæ адтæй æ радзубанди райони администраций сæргълæууæг Лагкути Омарæн, æхецæн ихæсбæл банимайæг ауæхæн рæсугъд бæрæгбон рарветун сувæллæнтти тумугъи.

   Бæрæгбони сценари сувæллæнттæ, рауагъдонти къласи разамонæг Баликъоти Алетæ æма гъомбæладон фарстати директори хуæдæййевæг Махъоти Валя уотæ зæрдæмæдзæугæ исаразтонцæ æма си алли адæймаг дæр æхе æнгъæл адтæй архайæг. Зартæ, кæвдтитæ, цубур сценкитæ, фиццаг къласонтæ æма федæни 10 къласонти рæсугъд арфитæ рауагъдонтæн, рауагъдонти арфитæ сæ фиццаг ахургæнæг Цæголти – Тетцойти Розæн, 11 анзи ке къохтæбæл рацудæнцæ, сæ зонундзийнæдтæ син рæдауæй сæ зæрди гъари хæццæ ка лæваврдта, еци уарзон ахургæнгутæн æййивтонцæ кæрæдзей.

Нимад æрцудæнцæ цитгин уавæри ахури раззагдæрти, хуæздæрæй хуæздæрти - сугъзæрийнæ  майдантæмæ къæндидæттæ Кайтова Миланæ æма Суанти Алини, спорти баскъухгутæ – Икъати Заур æма Баликъоти Давиди, культурон царди активондæр архайгути, æгъдауи медæгæ хуæздæрти æма аллихузон лæгигъæдтæй æнхæст  ахурдзаути нæмттæ.  Райони уæлæмхасæн ахуради Центри педагог Хъулчити Алетæ ба Центри директор Дзансолти Виталий номæй кади æвдесæндартæ – Дипломтæй исхуæрзеуæг кодта – Тауасити Геуæргий, Кайтова Милани, Гæтцити Мæрини  æма 8-аг къласи ахурдзау Баликъоти Руслани.

 

    Дзæвгарæ рæстæг ма рахаста скъолай тургъи устур æма рæсугъд цийнæдзийнадæ, ниййергути комитетти сæргълæууæг Гæтцити Виталий цитгин уавæри, 3 къере æма бæгæний къосæй ракувта рауагъдонтæн, еугур ахурдзаутæн дæр, æма син ракурдта Хуцауæй  рæсугъд æма лигъз царди нæдтæ, арвмæ уагъд æрцудæнцæ уæлдæфон шартæ, сæ хæццæ рауагъдонти федæнмæ бæллецтæ, берæ рæсугъд кувдтитæ уæларвон тухтæмæ фæххæсгæй, федæни 11 къласонтæ ба, сæ хестæр æмбæлтти эстафетæ идарддæр цитгинæй хæссуни басомий фæдбæл, æрбахастонцæ рауагъдонтæн цæхæркалгæ адгийнаг – торт.

    Æппунфæстаг Аминæт æма Сослан фегъосун кодтонцæ, фæстаг дзæнгæрæг раттуни афонæ ке æрхъæрдтæй æма еци цитгин барæ лæвæрд æрцудæй рауагъдон Тауасити Арсен æма 1 къласи ахурдзау Петрова Аминæн. Фæстаг хатт ниццагъта рауагъдонти фæстаг урокмæ скъолай идармæ игъусæг фæстаг дзæнгæрæг дæр, «Фæндараст» сæ кæнгæй хестæрти рæсугъд æма кадгин царди  рæнгъитæмæ. 

                Чихтисти Риммæ

                Хузистити: Чиколай 2-аг астæугкаг скъолай фæстаг                                                         

                                 дзæнгæрæги бæрæгбони