Национ проект

      Аци анз Ирӕфи райони цуппар гъӕуи – Ӕхсӕрисӕр, Советтон, Дӕргъӕвс ӕма Чиколай еу, æртигкаг, астӕугкаг скъолатæ, Федералон программи национ проект «Образование»-й бундорбӕл хаст ӕрцудӕнцӕ ӕнӕмгъудӕй цалцӕгкӕнуйнаг ахурдӕндти хигъдмӕ. 7 маййи, сӕрди уолӕвди мӕйти тӕгкӕ агъоммӕ ба, ами, нӕ республики кустадон фирмӕ ООО «Авангард Строй» -йи косгутӕ ӕвӕстеуатӕй бавналдтонцӕ цалцӕгкӕнӕн куститӕмӕ.

   Адтӕй фараст сахаттемӕй минкъий фулдӕр, райони газет «Ирӕф» - и уацхӕсгутӕ ку бабӕрӕг кодтонцӕ Советтони гъӕуи скъола. Фал бӕрӕг адтӕй, ами куститӕ дзӕвгарӕ раздӕр ке райдӕдтонцӕ, уӕдта се ’внӕлд дӕр зӕрдиуагонӕй ке ӕй – скъолай сӕр, фиццаг ӕма дугкаг уӕладзгутӕй, аллирдӕгити дӕр, цудӕй аллихузон косӕн дзаумӕутти унӕр. Раст си, цума, ерисӕй куста берӕ адӕм.

   Косӕг бригади иуӕнгти тумугъи иссирдтан разамунд син                                                                                                                                                                     дӕдтӕг, «Авангард Строй» - йи прораб Дедегкати Тимури, кӕци нин, кӕд хъӕбӕр ’нӕевдӕлон адтӕй, уӕддӕр ӕ цубур дзубандий рахабар кодта, куст куд цӕуй, уой туххӕй:

    - Рӕстӕг хезгӕ нӕ кӕнуй, уомӕ гӕсгӕ ба, куддӕр скъола рауӕгъдӕй ахурдзаутӕй, уотӕ ӕвӕстеуатӕй февналдтан косунмӕ. Ӕма, куд уинетӕ, уотӕ нин нуридӕгӕн ӕнтӕсгӕ дӕр дзӕвгарӕ бакодта – азгъунсти сӕр ист ӕрцудӕй, уоми ни косуй еу къуар – гъӕуама тагъд, нимайгӕ бӕнттӕмӕ, ӕхгӕд дӕр ӕрцӕуа нӕуӕг хуӕрзгъӕдӕ ӕрмӕгӕй. Баййивтан къӕрӕзгитӕ, искалдтан фулдӕр фӕзуӕтти пъолтӕ ӕма си тагъд кӕндзинан нӕуӕг, «стяжкӕ» ке хонӕн, уӕхӕн. Кӕмидӕрти ивӕрдзинан плиткӕ, кълӕсти хурфи ба - линолеум. Фӕрстӕ искӕндзинан алли рауӕнти дӕр, «насечкӕ» ке хонӕн, уотӕ, ӕма сӕ нӕуӕгӕй байсӕрддзинан.

Ӕдеугурӕй ба цалцӕг кӕнуйнаг фӕзуат ахӕссуй 2000 квадратон метри. Е дзӕвгарӕ ӕй, фал ами ци фӕсевӕд косуй гъӕуӕн ӕхецӕй, 20 адӕймаги, етӕ зӕрдӕдаргӕ ӕнцӕ, сӕхе хъӕбӕр кустуарзон ӕма къохгинӕй, алли кустмӕ дӕр ка арӕхсуй, уӕхӕнттӕй бавдистонцӕ, ӕма, мӕ зӕрдӕ дарун, нӕ нисани рӕстӕг – ноябри мӕйӕй раздӕр дӕр, Хуцауи фӕндонӕй, ке ратдзинан рӕвдзӕй сувӕллӕнтти ахурдонӕ – ӕд спортивон бунӕттӕ, хуӕрӕндонӕ, актовон зал, аллихузон уӕлӕмхасӕн ахурадон къӕбинеттӕ.

    Мӕнӕн мӕ фидӕ Барис берӕ фӕккуста райони ахурадон-рохсадон кустуӕтти – кӕми ахургӕнӕг, кӕми ба директортӕй дӕр, ӕма мин аци бунӕттӕ хъазар ӕнцӕ. Архайдзинан. Косӕн ӕрмӕги туххӕй нӕ куст ӕгириддӕр нӕ лӕууй. Некӕми нӕбӕл бӕрӕг кӕнунцӕ фӕсарӕйнаг бӕстити «санкцитӕ» ӕма аллихузон сайӕггадӕ гъуддӕгутӕ. Уой нӕ, фал ма Уӕрӕсе кӕнуй нигки тухгиндӕр неʹнæуарзгути фуддӕрагӕн.

Арӕх нӕ бӕрӕг кӕнунцӕ ӕма нин нӕ кустити хуӕрзгъӕдӕдзийнадӕмӕ кӕсунцӕ райони администраций хецауадӕ, бустӕги Лагкути Омар. Фӕрсунцӕ нӕ, ести гъӕуагӕ ан ӕви нӕ, уобӕл. Сӕ цӕрӕнбон берӕ уӕд.

      - Арфӕ уин кӕнӕн, Тимур, ӕма хатир дӕр корӕн уӕ рӕстӕгӕй уин ке райстан, уомӕй. Ӕнтӕсӕд уин, уӕ нисантӕ уӕ къохи бафтуйӕнтӕ тагъд рӕстӕги ӕма ӕнцонтӕй.

                                                             Чихтисти Р.

 Хузистити: Советтони гъӕуи скъолай цалцӕггӕнӕн кустити рӕстӕги.

            Бетрозти Майрӕни ист хузтӕ.