Гъæууон хæдзарадæ

                              

      Ирæфи райони сæ тæмæни бацудæнцæ уалдзигон-будурон куститæ. Аци анз зæнхкосгути нисани ес раггæндæ культуртæй батаун 10500 гектари. Æма, кæд фæззæги еци еугур хумзæнхити дæр фæлдæхт æрцудæй анаули, уæддæр идарддæр ба рæстæг уоййасæбæл хуарз уавæртæ нæ дæдтуй зæнхкосæгæн аллихузон куститæмæ «гъæйдтæй» февналунæн. Уомæ гæсгæ ба æй гъæуй устур хъæппæрес бавдесун, арæхстгинæй испайда кæнун алли кустæн бæзгæ сахаттæй дæр, цæмæй тауни ахстиаг агротехникон рæстæгутæ ихæлд ма æрцæуонцæ.

   - Цитæ бакосун бантæстæй хæдзарæдтæн маййи мæйи фиццаг декади кæронмæ, куд æй сæ уавæр техникон евтонгдзийнадæй æма цæхæн культуртæ туд æрцæудзæнæй райони хумзæнхити? – аци æма æндæр фарстати туххæй нин дзубанди раеудагъ æй РЦИ-Аланий гъæууон – хæдзарадон министради Ирæфи райони хаййади специалист Махъоти Олеги хæццæ. Æма нин е радзурдта:

   - Райони агропромышленнон комплекси абони ес дууæ устурдæр хæдзаради – ООО «Ираф- Агро» æма ООО «Олимп», 140 хе æма фермерон хæдзаради, фондз гъæууон – хæдзарадон кооперативи - «Гетоев», «Калинина», «Ираф», «Акберди», «Дидинат». Гъулæггагæн, аци анз еугур хæдзарæдтæ дæр рахизтæнцæ æрмæст еци еу – нартихуари культурæ бакæнунмæ сæ будурти. Нуридæгæн бал си арæзт æрцудæй 6500 гектари. Еугурей разæй тауни куститæ кæронмæ рахъæртун кæнун бантæстæй ООО «Ираф – Агро» æма СПК «Акбердийæн». Иннæ хæдзарæдти дæр кæронмæ фæхъхъæртунцæ куститæ.

 

  

Аци анз дзæвгарæ фæххуæздæр æй хæдзарæдти техникон ефтонгдзийнадæ дæр. Амалгъон адæмтæй беретæ исмадзал кодтонцæ аллихузон кусти фæрæзнитæ – готæнттæ, похцигæнæнтæ, тауæнтæ, прицепон техникæ, пурфгæнæнтæ æма уотæ идарддæр. Афонадæбæл æрцæттæ кодтонцæ мугкæгутæ, гъæцæнтæ, химикон бауæргъæдтæ, æма е дæр исагъаз æй кусти раздæр ци къулумпидзийнæдтæ æвзурдæй еумæйаг хæдзарæдти, уони еуварс кæнунæн. Зæнхикустгæнгутæмæ нури аллихузон технологити, уæдта амунддзийнæдти фæрци дæр иссæй фулдæр фæлтæрддзийнадæ, уомæ гæсгæ ба архайд æнцондæрæй цæуй алкæми дæр. Зæрдæдарæн ес, æрдзон фидбилизтæй кæд хизт æрцæуонцæ нæ хумзæнхитæ, уæд нæ фæззæги тиллæгæрзæдтæ дæр зæрдæрохс уодзæнæнцæ, куд сæбæл архайд цæуй, уомæ гæсгæ.

   - Арфæ кæнæн, Олег, дæ лæмбунæг радзубандий туххæй. Зæнкосæгæн ба нæ зæрдæ зæгъуй æнтæститæ æма зæрдрохсдзийнадæ сæ уæззау хъиамæти медæгæ.

                                                       Дзубанди кодта Чихтисти Р.