Ахурадæ

 Амондгун æнцæ еци адæм, сæ маддæлон æвзаг цæсти рохс кæмæн æй. Фал, гъулæггагæн, не ΄взаг уотæ кадгин нæбал æй берети цæсти. Царди сагъæссаг æй æ федæн, фал ибæл цалдæнгæмæ дзорæн, гъуди кæнун фæразæн, цалдингæмæ æй уарзæн, саби кæдмæ дзора маддæлон æвзагбæл, уæдмæ ин фесæфæн нæййес. Саби ба гъæуама фиццагидæр ирон – дигорон дзурдтæ бийнонти медæгæ фегъоса. Уæд æй бауарззæй зæрдæй, уæд ин уодзæй маддæлон. Куд æй инæн, уотемæй ба бонæй - бонмæ нæ астæу уæхæн адæм фулдæрæй - фулдæр кæнунцæ, кæцитæ се ΄взагмæ æцæгæлон цæстæй кæсун райдæдтонцæ. Уой ба нæ лæдæрунцæ, æма маддæлон æвзагбæл нæ дзорунæй ниййерæг мадæ ниууадзунæй уæлдай нæййес. 20 феврали ба бæрæггонд æрцудæй маддæлон æвзаги дуйнеон бæрæгбон. Арæзт æрцудæй Чиколай фиццаг астæуккаг скъолай дæр.

Маддæлон æвзаги бæрæгбон æй еумæйаг хъазар алли адæймагæн дæр, уæлдайдæр ибæл финсгæ ци поэттæ æма прозаиктæ мухур кæнунцæ сæ гъудитæ, уонæн. Еци курдиадгун адæмæй æй Цæгат Иристони финсгути Цæдеси иуонг, «Нарти фæткъу»-й премий лауреат Бабочити Омарбиййи фурт Руслан, кæций исфæлдистади бундорбæл арæзт æрцудæй бæрæгбон. Архайдтонцæ си 1-аг скъолай ахурдзаутæ æма райони культури Галауани косгутæ Пъинти Фатимæ æма Плити Эдуард. Фатимæ культури медæгæ ци æнзтæ косуй, уоми зæрдиуагæй архайуй дигорон æвзаги ирæзтбæл. Уомæй рахезгæй, æхуæдæг дæр финсуй æмдзæвгитæ, кæцитæй еу дууæ бакастæй аци бон дæр. Дедегкати Алинæ дæр дессаги аййев бакастæй дигорон æвзаги туххæй Кертанти Тъæхири финст æмдзæвгæ.

     Маддæлон æвзагæй ку рахизтæнцæ архайгутæ Руслани исфæлдистадæмæ, уæд ин бæстонæй æрдзурдтонцæ æрмæст йе мдзæвгити сæйраг темæ æма фарстатæбæл нæ, фал ма æ царди хабæрттæбæл дæр. Æвдист æрцудæй видеоæрмæг поэтти тухæй. Цæмæдесæй бакастæнцæ бæрæгбони архайгутæ æма иуазгутæ, Бабочити Руслан æ райгурæн гъæу Чиколабæл ци зæрдæмæдзæугæ арфгъудигун æмдзæвгитæ ниффинста, ма сæ бундорбæл дессаги зартæ конд кæмæн æрцудæй, уонæбæл арæзт презентацитæмæ. Видеоæрмæги хузи маддæлон æвзагбæл ци æмдзæвгитæ ниффинста Руслан, уонæй æхе декламацимæ дæр бакастæнцæ. Амонгутæ, Дашити Дианæ æма Батæрти Илонæ, берæ рæсугъд гъудитæ æма сагъæстæ загътонцæ финсæги тухæй. Архайгутæ: Тетцойти Элинæ, Тауасити Замирæ, Медойти Аминæ, Малити Давид, Золойти Динарæ, Тетцойти Аида, Кудзойти Алинæ, Дзансохти Томæ, Дзирати Тамарæ, Икъати Дианæ, Казумти Аннæ, Байти Татьянæ, Кобегкати Миленæ, Гуæцæлти Дзерассæ, Таухъазахти Аминæ бакастæнцæ, ци алливæрсуг тематикæбæл финсуй, уоци æмдзæвгитæй цалдæр. Гæдзаонти Карим, Тамати Ангелинæ, Кудзойти Чермен, Тамати Дианæ, Тауасити Азамат æма Казумти Аннæ ракодтонцæ æцæг дигорон ездон «Хонгæ кафт». Скъолай заргути къуар балæвар кодтонцæ иуазгутæн Руслани æмдзæвгитæбæл финст зартæ - «Чиколай зар» æма «Мади зар». Адæми зæрдæ байгъæлдзæг кодтонцæ сæ доульбæл цагъдæй Гуæцæлти Зæринæ, Тотоонти Ибрагим, Плити Аслан, Кудзойти Арсен æма Лагкути Сæрмæт. Дзирати Тамарæ ба рацагъта фæндурæй. Еу загъдæй, бæрæгбон рауадæй зæрдæмæдзæугæ. Ка си адтæй, етæ æрцудæнцæ уæхæн хатдзæгмæ, æма мингай æнзти сæрти нæмæ нæ хестæр фæлтæрти фæрци ци рæсугъд æма фæрæзнæгун æвзаги тухæ æма аййевдзийнадæ æрхъæрдтæй, уой мах дæр ихæсгин ан нæ федæни фæлтæртæн балæвар кæнунæй. Ма ибæл гъæуама архайæн.

     Бæрæгбони иуазгути хæццæ адтæнцæ Бабочий-фуртæн æ хеуæнттæ дæр, кæцитæ раарфæ кодтонцæ архайгутæн.

Бабочити Этери