Номерæн

 

     Дессаг куд нæй цард, еу бон адæймаг игургæ ракæнуй, иннæ бон ба – мæлгæ. Фал цæйдæрбæрцæ рæстæг ку рацæуа, уæддæр ци зин æй, куд нæ фæразуй уорамун æ зин адæймаг, царди æгасемæй ахсгиагдæр æма хъазардæр ка фæууй, еци адæймаги мæлæт. Ци содзгæ, æнæ ´рсабур ристæй нирресуй зæрдæ, ку фæццох уй не ´хсæнæй æма куд нæ сабур кæнуй и рист, цæйбæрцæ цæрай, уæдмæ дæр.

 

   Мадæ – уомæй дессагдæр царди медæгæ ести ма еске ес? Æвæдзи нæ. Цубур, фал сомий, ардхуæрæни дзурд, æ медæгæ цæйбæрцæ æнкъарæнтæ æвæрд ес – æнæгъæнæ цард, æнæгъæнæ рæстæг, æнæгъæнæ дуйне. Мах фæндуй нæ мади рохс ном æримисун. Еунæг бон дæр æ уоди æнцондзийнадæбæл ка нæ басагъæс кодта, фал царди разуайæн ка фæккодта цæргæбонти.          

   Рацудæй анз, кæдæй йе носон бæстæбæл бамбалдæй нæ фæлмæн, ездон мадæ, силгоймаги æгас хуарздзийнæдтæй хайгин адæймаг. Чихауити Аслæнбеги кизгæ Липæ райгурдæй 5 январи 1955 анзи æма исгъомбæл æй Советтони гъæуи. Æхсæрисæрккаг Мæрзойти хæдзарæмæ Славикки номбæл цардæмбалæн ку æркувта, еци бонæй фæстæмæ æхе бауарзун кодта æрмæст бийнонтæ æма хæстæгутæн нæ, фал æгас гъæубæстæн дæр. Куд хæдзари æфсийнæ, уотæ ин æ раз неке райстайдæ. Исхаста æртæ кизги æма нæ ахур кодта адæймагæн хуарзи цæунбæл. Фæлмæн æма уарзон нана адтæй æ бæдæлтти бæдæлттæн, æ минкъий хори тунтæн.

   Липа куста Лесхози бухгалтерæй, фæстæдæр ба Националон парк «Аланий». Уоми дæр фæккодта бухгалтери куст. Игъæлдзæг, цæстуарзон, Сатанай хузæн бæркадкъох æма федар зунди хецауæй æй зудтонцæ синхбæстæ, йе ´мкосгутæ, зонгитæ. Некæд неке зæрдихудти бацудæй. Лæкъун цæстæй некæд некæмæ ракастæй, фæлмæн дзурд ирдта алкæмæн дæр.

     Хæстæгутæ кæрæдзебæл бæттæг, хестæрæн æгъдаудæттæг, кæстæрæн зундамонæг адтæй нæ уарзон мадæ. Куд хæдзари æфсийнæ, уотæ адтæй царди тухæ æма амонди æстъалу. Еске зинбæл ка зин кодта алкæддæр, еске ристæй ка ристæй, еске цийнæ ба хæстæг ка иста æ зæрдæмæ, уæхæн адæймагæй æй зудтонцæ гъæубæстæ.  

Нифсхаст, лæгигъæдгун силгоймаг йе ´нæхъаурæ усхъитæбæл хаста царди уæзæ æ цардæмбали рамæлæти фæсте. Мади хузæн адтæй æ хуæртæн, хъæбæрдæр ба Луизæн. Йе усхъæ имæ дардта алли гъуддаги дæр. Царди алли бони ивæрæнмæ дæр архайдта æ уоди хъиамæти хай бахæссунмæ.

   Куд зин æй ниййерæг мадæн æностæмæ хуæрзбон зæгъун, фал æ индæй хай нæбал ес. Нæ бон ций. Кæци дуйнебæл æй нæ мадæ, уоми хуæрзти хæццæ уæд æ бунат, дзенет æ хай. Æ рохс цæсгом, æ рæсугъд зæрдæ некæд уодзæнцæ иронх махæй, æ зæнæгæй, ка æй зудта, ке´хсæн цардæй, уонæй.

                                                       Зæрдрист кизгуттæ.