Силгоймаг – мадæ, цардæмбал, хуæрæ, хуарз æма зæрддагон æмбал, багъæуаги фарсмæ æнгом балæууæг. Еу цубур дзубандийæй – зæнхон изæд, еунæг Хуцау цитгиндæр æма рæсугъддæр, хуæздæр, арфиагдæр ци равардта зæнхæбæл цард цæрунæн, еци фæлдесонд. Æма кæми нæй æ архайд – æхсæнади, науки, спорти, ахуради, адæмон хæдзаради æма уотæ нимайун æнгъезуй берæ бунæдтæ. Дзæгъæлти нæмæ нæ рагфиддæлтæй нæ баизадæнцæ дессаги таурæхътæ æма уадзимистæ, нæ ирон адæмихатти уедæгтæ кæми райдæдтонцæ, еци доги силгоймаги фæлгонц бавдистæн – нарти нæртон Сатана, æ дæлахъуртæй хортæ æма мæйтæ кæмæн кастæй, еци хуæрзконд æма хуæрзтог Дзерассæ, алæмæти рæсугъд æма зундгин  Хъизмудæ æма уотæ идарддæр.

Минкъий лæгигъæдгун, æгъдау æма фиддæлти фарнæй хайгин ка æй, уæхæн силгоймæгтæ цæруй абони дæр нæ фæрстæмæ. Мæн дæр фæндуй еу уæхæн силгоймаги кой ракæнун бæрæгбони кадæн.

Инсæй анземæ хæстæг цæуй, кæдæй нæ минкъий синхбæсти æрцардæнцæ Осмæнти Коляй бийнонтæ. Сæ фиццаг бонтæй фæстæмæ дæр æрмæст синхбæстæн нæ, фал идарддæрти дæр адæми зæрдитæмæ иссирдтонцæ над. Раздæр дæр кæд дууæ цардæмбали – Коля æма Батъаон Беллæ чиколайæгтæ адтæнцæ, уæддæр, куд фæззæгъунцæ, уотæ гъæуæй-гъæумæ, синхæй-синхмæ дæр хецæн æгъдæудтæ æма фæткитæ фæууй. Æма бийнонтæ сæ дууæ бæдолей хæццæ уайтагъд синхи медæгæ алке хæццæ дæр иссирдтонцæ еу æвзаг. Фал уæддæр мæ абони уацхъуди хъайтар ба силгоймæгти цитгин бæрæгбони фæдбæл æй Батъати Цæрай æма æ цардæмбал, Гуæцæлон Хæдизæти(Пæнчиййи) кизгæ Беллæ.

Синхбæсти медæгæ уæхæн гъуддаг нæ фæууй, Беллæ, е уоди хъиамæтæй, е материалон æгъдауæй, е хуарззундрахасти фæрци æ байвæрд кумæ  нæ бахæссуй. Силгоймаги хуарз менеугутæй æй еунæг Хуцау уæлдай хайгин ке фæккодта, уой фæрци – æгъдаугин, хуæдæфсæрмæ, лæгигъæдгун, рæдаукъох, иуазæг уарзагæ. Куд фæззæгъунцæ,  «…. ци гъуддагмæ æхе бахата, уоми уод уадзуй», зæгъгæ, уæхæн адæймаг. Мадта ци устур бийнонтæмæ æркувта берæ æнзти разæй, етæ ба ин абони дæр, сауæнгæ сæ цалдæрæймаг фæлтæрти уæнгæ  дæр, иссæнцæ мади бæдæлдтау хæстæг æма уарзон. Цæунцæ имæ, сæ уарзт ин дæдтунцæ æнæбæрцæ парахаттæй.

Беллæ, уæлдæр ахургонддзийнадæ райсгæй, фæккуста берæ рауæнти – Ирæфи райони Советтони поселокки ци нæргæ «Гъæди хæдзарадæ» адтæй Советтон рæстæги, уæдта ма уой фæсте дæр дзæвгарæ рæстæгути, уоми  бухгалтерæй, куста фæлхасади фæндагбæл,  еу финддæс анзей бæрцæ ба косуй хестæр тукангæсæй Чиколай гъæуи аразæн æрмæгути тукан «Лотос»-и. Æма кæддæр кæмидæр бакуста Беллæ, æ армдзæф алкæми дæр фæддаруй бæрæг, фæуунцæ си арфиаг æрмæст кусти разамунд нæ, фал ке хæццæ фæккосуй, уæдта ци адæмти хæццæ фæууй æ архайд, етæ дæр. Æ еци уодфæллойнæн ба ин æвдесæн æй фиццагидæр адæми уарзт æма нимаддзийнадæ, уой фæсте ба берæ хуæрзеугути нимæдзæ æма зæрдæбæлдарæн лæвæрдтæ.

    Устур арфиаг æнцæ абони Беллæ æма æ цардæмбал Коляйæй, сæ еунæг кизгæ Анжели тоги ци берæ хуарз æууæлтæ æма менеугутæ бауагътонцæ, куд силгоймаг, уотæ ин Беллæ ци гъомбæладæ равардта, уомæй, ци хæдзарæмæ æрцудæй е, еци Киазумти Ахполати бийнонтæ.

   Ес уæхæн загъд, зæгъгæ, «…куд ес цæрæн æнæ силгоймаги рæсугъд бахудт,  куд мадæ, уотæ æнæ уой фæлмæн рæвдуд, куд цардæмбал, уотæ æнæ уой еузæрдиондзийнадæ, куд хуарз синхон, æмгъæуггаг….» Æма зæгъун æнгъезуй, еци хуарздзийнæдтæ, уæдта ма берæ æндæртæ еугурæйдæр бацудæнцæ еци ниллæг, къæсхуртæгомау, хуæрзтог æма хуæрзæгъдау дигорон силгоймаг Белли уоди медæгæ.

 Цæрæ ма нин, Беллæ, æнæнез, зæрдæрохсæй, нивæ æма амонди хæццæ берæ æнзти, нæ цардмæ нин, куд хуарз дигорон силгоймаг, уотæ фарнæ хæсгæй. Хайгин уо алкæддæр силгоймæгти бæрæгбони хуарзæнхæй.

                           Чихтисти Риммæ