Номерæн

 

      Цард... Еу фæккастæй иннемæ. Уалдзигон деденæгау райхæлуй, цард раеудагъ уй, уæдмæ ба сау мæлæт ба æ базуртæ рауадзуй æма æй æ дзæмбутæй ратонуй, уарзон ин ка исуй, еци адæми æхсæнæй.

    Уотæ фæззæгъунцæ: «Хуарз лæг æрмæст æ бийнонтæн нæ рамæлуй, фал æгас гъæубæстæн дæр». Æнæмæнгæ, аци загъд комкоммæ хауй Суанти Николаййи фурт Морадинмæ дæр. Адæмæн хуæрзгæнæг, муггагæн номгæнæг, зæрдæ æма зунди бæркадæй æнхæст. Æрмæст æ марди бони ци адæм æрцудæй Суанти хæдзарæмæ, Морадинæн фæстаг «фæндараст» зæгъунмæ, уомæй дæр бæрæг адтæй, кæдзос, рæсугъд уоди хецау ке адтæй, ейæ. А дуйнебæл Морадин бацардæй 82 анзи. Æ лæги кари бацудæй. Еци рæстæгмæ ци адæми хæццæ куста æма цардæй, уони зæрдити ниууагъта рохс фæд.

     Берæ рæсугъд фæндтæ адтæй Морадини зæрди. Æ мæтæ алкæддæр адтæнцæ æ бийнонтæ, æ хеуæнттæ, æ уарзон æнсувæртæ æма æ хуæртæ, уони зæнæг. Морадин æ сувæллонæй фæстæмæ бадгæ некæд кодта. А алли бони фудæбонæ æма хъиамæтæй хаста æ бийнонтæ. 35 анземæй фулдæр æнцæ æ кусти æнзтæ. Уонæн сæ фулдæр хай бакуста завод «Янтари», уой фæсте ба шоферæй совхоз «Урухи». Æма алли рауæн дæр е ΄мгосгутæн исуидæ хеуон, уарзон. Кадæ ин кодтонцæ гъæубæстæ.  Суанти  муггаги адтæй кадгин лæгтæ. Морадин дæр фæстаг нæ байзадæй. Æ фиди кадæ нæ бауагъта æрниллæг кæнун. Боц хестæрæн æй агурдтонцæ адæм, æ хуарз гъуддæгтæй син амонд хаста, æ курухон зундæй ирæзгæ фæлтæри рæсугъд надбæл аразта, сæ фæлмæн дзурдæй æй рæвдудтонцæ. Агурдтонцæ æй хуарздзийнади дæр æма зини дæр æгъдау рæсугъд рахæссунмæ. Ахур кодта æ зæнæги дæр ескæмæн балæггадæ кæнунбæл, æндæр адæймаги лæдæрунбæл. Етæ адтæнцæ, æхуæдæг æ царди нисанæн ке ивардта, æнтæстгунæй ке æнхæст кодта, еци гъуддæгтæ.

     Цæйбæрцæ дæр ку дзорон, уæддæр мæ зæгъуйнæгтæн кæрон нæ уодзæй, æвæдзи. Æнæхатир разиндтæй мæлæт аци хатт дæр. Куд батастæй æ къох адæми астæуæй уæхæн лæг, уæхæн адæймаг ратонунмæ? Æ бийнонтæ дзиназгæ ниууагъта Морадин. Берæ хæттити ма æ цардæмбал Римæ, æ кизгæ Светæ, фурттæ Игорь ма Эдик, киндзитæ дуари гуппмæ, сæ зин феронх уогæй, ракæсæ - ракæсæ кæндзæнцæ. Сæ зундамонæг, сæ рахуæцæн фиди мæлæт си нæма æруагæс кæнуй нур ма. Хуарз лæг ке адтæй, йе уомæй дæр бæрæг æй, æма æй æ киндзитæ æгæрон уарзтæй ке уарзтонцæ, лæггадæ ин кодтонцæ.

    Ци зин æй… Æнæкæрон зин… Рацудæй 40 бони, кæдæй нæ астæу нæбал æй, уæдæй. Нæ сабур кæнуй уоди рист. Ци хъæбæр нин нæ фагæ кæнуй не ΄гасемæн дæр абони нæ зундамонæг, нæ федар мæсуг. Зæрдхъурмæй æй имисæн. Æма куд нæ. Кадæй уæлдай, æ фæсте лæгъуз гъуддагæй неци ниууагъта. Æрмæст æ бийнонтæ æма хеуæнттæ нæ, фал æй зæрдхъурмæй имисунцæ æ берæ æмбæлттæ æма æмгæрттæ. Фал ма нæ бон ци æй, «рохсаг» загъунæй уæлдай.

     Æносмæ нæ зæрдити байзайдзæнæ, Морадин, уарзонæй, дæ ном имисуйнагæй. Дуйне скæнæгæй ба корæг ан, цæмæй дæ фарнæ мæрдтæмæ дæ хæццæ ма фæххæссай, фал æй дæ кæстæртæн, муггагæн ниууадзай.

                                          Суанти Валя хеуӕнтти номæй.